قازاقستان پرەزيدەنتى رەسەيلىك تەلەارناعا سۇحباتىندا رەسەيگە قارسى سانكسيا جانە "قىتايدىڭ قازاقستانعا ءقاۋپى" تۋرالى ايتتى. بۇل - نازاربايەۆتىڭ سايلاۋدان كەيىنگى العاشقى سۇقباتى.

رەسەيدىڭ "روسسيا 24" تەلەارناسى مامىردىڭ 26-سىندا قازاقستان پرەزيدەنتى نۇرسۇلتان نازاربايەۆتان الىنعان سۇحباتىن جاريالادى. سۇحباتتا قازاقستان پرەزيدەنتى الەمدىك ەكونوميكالىق داعدارىس، ۋكرايناداعى جاعداي، "قىتايدىڭ قازاقستان ەكونوميكاسىنا ىقپالى" جايلى ايتقان.

نازاربايەۆ "قازاقستان ءۇشىن داعدارىس سىرتقى ءۇش فاكتوردىڭ اسەرىنەن تۋىندادى. العاشقىسى - قازاقستان ەكسپورتتايتىن مۇناي-گاز بەن مەتالل باعاسىنىڭ ارزانداۋى. ەكىنشى سەبەپ - رەسەيگە سالىنعان زاڭسىز سانكسيا. سانكسيا بۇۇ-نىڭ ماقۇلداۋىنسىز سالىندى. بۇلار ارينە، كورشىمىز رەسەيدىڭ دامۋىنا كەدەرگى كەلتىرىپ وتىر. رەسەي - بىزگە كورشى ءارى ءبىز ءۇشىن ۇلكەن نارىق. قازاقستان رەسەيمەن بىرگە ەۋرازيا ەكونوميكالىق وداققا مۇشە" دەدى.

جۋرناليست قازاقستان پرەزيدەنتىنەن "پوستسوۆەتتىك كەڭىستىكتەگى دانا ساياساتكەر رەتىندە" "سانكسيا سالىنعان ەكەن، ەندى وعان قالاي بولعاندا دا بەيىمدەلۋ كەرەك پە الدە سانكسيانىڭ جويىلعانىن كۇتكەن ءجون بە؟" دەپ سۇرادى.

نازاربايەۆ "سانكسياعا ۇيرەنىپ كەتۋ مۇمكىن ەمەسىن" جانە ونىڭ "بارلىعىنا بىردەي زيانى تيەتىنىن" ايتتى.

 - ەۋروپانىڭ وزىندە بىر-بىرىنە سانكسيا سانكسيا سالعاندى كەيبىرەۋلەر قولداي بەرمەيدى. بىرىنشىدەن، ەۋروپالىق ىسكەر ادامداردىڭ كوبى كاپيتال سالىپ، اقشا تاباتىن رەسەي سياقتى ۇلكەن نارىقتان ايىرىلدى. رەسەي جاعىنىڭ دا بۇدان تارتقان شىعىنى ۇلكەن. سوندىقتان دا، سانكسيادان ەشكىم ۇتپايدى. ءبىراق مۇنداي قيىندىقتار بۇرىن دا بولعان، - دەگەن نازاربايەۆ ءسسسر-دىڭ دە سانكسيا استىندا ءومىر سۇرگەنىن ايتتى.

 - مۇنداي سانكسيالار 1980 جىلعى ماسكەۋ وليمپياداسى كەزىندە سالىندى، اۋعان سوعىسىنان سوڭ ءتىپتى كۇشەيدى. ءبىراق مۇنىڭ بارلىعىنىڭ نە كەرەگى بار؟ - دەدى نازاربايەۆ.

نۇرسۇلتان نازاربايەۆ سانكسيالىق ساياساتتىڭ ۋكرايناداعى جاعدايمەن بايلانىستى ەكەنىن، ۋكرايناداعى احۋالدىڭ ۇشتىعى رەسەيگە دە تيگەنىن ايتتى. "رەسەي مەن ۋكراينانىڭ ءوزارا تۇسىنىستىككە كەلىپ، ءتىل تابىساتىن ۋاقىتى تايادى. ەۋروپالىق جەتەكشىلەر دە مۇنى قالاپ وتىر" دەدى قازاقستان پرەزيدەنتى.

نازاربايەۆ بۇعان قوسا قازاقستان تاۋەلسىزدىك جىلدارى "بۇرىن-سوڭدى بولماعان ينفراقۇرىلىمدى دامىتۋمەن اينالىسقانىن" جانە تەڭىزگە رەسەي مەن جۇڭگو ارقىلى شىعاتىنىن ايتتى. قازاقستان پرەزيدەنتى رەسەيدىڭ قىتايمەن بىرىگىپ مۇناي-گاز، كوممۋنيكاسيا سالالارىندا ءىرى جوبالاردى ىسكە اسىرۋى رەسەي ەكونوميكاسىنىڭ ازيا-تىنىق مۇحيتى ايماعى ەكونوميكاسىنا قوسىلۋىنا مۇمكىندىك تۋدىرعانىن دا ايتتى.

نۇرسۇلتان نازاربايەۆ قازاقستان ەكونوميكاسىندا جۇڭگو ىقپالى ارتادى دەگەن ءقاۋىپتى "فانتومدىق ۇرەي" دەپ اتادى. "قىتايدىڭ بەلگىلى شارتتارمەن ەكونوميكامىزعا ينۆەستيسيا سالۋعا مۇمكىندىگى بولسا، تۇرعان نە جامانشىلىق بار؟ حالىقارالىق ەكونوميكانىڭ ءوز ەرەجەلەرى بار. بۇگىن ەشنارسە ىستەمەسەك، كەيىن نە بولادى؟" دەدى نازاربايەۆ. ايتۋىنشا، استانا پەكينمەن بىرنەشە كاسىپورىن قۇرىلىستارىنا قاتىستى كەلىسىم جاساسۋ ۇستىندە.

بۇل - بيىل 26 ساۋىردە بەسىنشى رەت پرەزيدەنت بولىپ سايلانعان كەيىنگى نۇرسۇلتان نازاربايەۆتىڭ اقپارات قۇرالىنا بەرگەن العاشقى ارنايى سۇقباتى. 74 جاستاعى پرەزيدەنت نازاربايەۆ 1989 جىلدان بەرى قازاقستان باسشىسى قىزمەتىن اتقارىپ كەلەدى.

"ازاتتىق"