جاقىن ارادا ورتا سالماقتاعى بوكستان ەكس-چەمپيونى گەنناديي گولوۆكين مەن ونىڭ باپكەرى سانچەس ءوزارا كەلىسىمشارتتىڭ اياقتالعانىن جاريالاعان ەدى. وسى جاعدايدان كەيىن ابەل سانچەس حالىقتىڭ سۇيىكتى بوكسشىسىنىڭ ومىرىنە قاتىستى ءبىرقاتار دەرەكتەردى جايىپ سالدى. بۇل تۋرالى Qamshy.kz اقپارات اگەنتتىگى Sports.kz پورتالىنا سىلتەمە جاساپ حابارلايدى.

گەنناديي ۇزاق جىل بىرگە شەبەرلىك شىڭداعان باپكەرىمەن جولدارىنىڭ ەكى بولىنگەنىنە اسا رەنىش كورسەتە قويماعانىەن، ابەل سانچەستىڭ وكپەسى قارا قازانداي. ايتۋىنشا، بىلعارى قولعاپ شەبەرى ونىڭ جالاقىسىن تولەۋدى كۇرت توقتاتقان.

"العىسى جوق ساراڭ ەكەن. ول جاقىن ارادا عانا DAZN حولدينگىمەن 100 ميلليون دوللارلىق كەلىسىمشارت جاساستى. ماعان تولەيتىن اقشاسى جوق دەگەنگە سەنە الاسىز با؟ بۇل مەنى قورلاۋ عوي. مەن ەشقاشان بۇل جىگىتتىڭ قاتە قادامعا بارا الاتىنى، بارۋى مۇمكىن ەكەندىگى تۋرالى ويلاماپپىن. مەن ونىڭ بويىندا ار-ۇيات، ادامدىق بيىك تۇرادى دەپ ويلادىم. مەن ونى اقشا وزگەرتەدى دەپ ويلامادىم. وعان قاتتى وكپەلىمىن"، - دەيدى ەكس-چەمپيوننىڭ ەكس-باپكەرى ابەل سانچەس.

ۇسىنعان: ادىلەت مادەنيەت