حالىقتىڭ پىكىرى ەسكەرىلمەيىنشە، اەس سالۋ شەشىمى جۇزەگە اسپايدى. بۇل تۋرالى قازاقستان پرەزيدەنتى قاسىم-جومارت توقايەۆ سەمەيدە وتكەن كەزدەسۋ بارىسىندا مالىمدەدى دەپ حابارلايدى Qamshy.kz اقپارات اگەنتتىگى Qazaq Times جۋرنالىنا سىلتەمە جاساپ.

رەسەي پرەزيدەنتىنىڭ قازاقستان اۋماعىندا اەس تۋرالى ۇسىنىسىنا بايلانىستى مەملەكەت باسشىسى ق.توقايەۆ: "اتوم ەلەكتر ستانسياسىن سالۋ سالۋ ماسەلەسى قوعامدا قىزۋ تالقىعا ءتۇسىپ، پىكىرتالاس تۋىنداپ وتىر. بۇل – كۇردەلى ماسەلە. 2030 جىلى قازاقستاندا ەلەكتر ەنەرگياسىنىڭ جەتىسپەۋشىلىگى بايقالۋى مۇمكىن. سوندىقتان، وسى ماسەلەنى ءقازىر شەشۋىمىز قاجەت. بۇل ءبىزدىڭ بۇكىل حالىقتىڭ مۇددەسىنە قاتىستى بولعاندىقتان، وتە كۇردەلى ماسەلە. سوندىقتان حالىق پىكىرى نازارعا الىنادى. سوعان قاراي ارەكەت ەتەمىز"، – دەپ مالىمدەدى.

وسىعان دەيىن ق ر ەنەگرەتيكا مينيسترلىگى تاراتقان حابارلامادا: "2030 جىلعا قاراي قازاقستاننىڭ وڭتۇستىگىندە 2،7 گۆت-قا دەيىن بازالىق قۋات تاپشىلىعى كۇتىلۋدە. ەلىمىزدىڭ وڭتۇستىگىندە بۋ-گاز، گيدرو جانە اتوم ستانسيالارىن سالۋ سياقتى ءارتۇرلى وتىن جانە ەنەرگيا كوزدەرىن پايدالانا وتىرىپ، بازالىق جانە مانيەۆرلىك گەنەراسيانى ەنگىزۋ ارقىلى تاپشىلىقتى جابۋ مۇمكىندىگىن قاراستىرىپ وتىر. تەك مۇمكىندىكتەر جانە ۇسىنىلاتىن جوبالار تياناقتى زەرتتەلگەن سوڭ عانا ەلەكتر ەنەرگياسىن وندىرۋگە قازاقستان ءۇشىن نەعۇرلىم وڭتايلى جانە قولايلى تەحنولوگيالار ايقىندالاتىن بولادى. سول سەبەپتى، الدىن الا داۋرىعىپ، تۇجىرىمدار جاساۋعا جانە نەگىزسىز الاڭداۋعا سەبەپ جوق ەكەنىن حابارلايمىز"، – دەلىنگەن.

نۇر-سۇلتانعا اەس قۇرىلىسىن رەسەيلىك تەحنولوگيامەن جۇرگىزۋدى قازاقستاننىڭ پرەزيدەنتى قاسىم-جومارت توقايەۆپەن كرەملدەگى كەزدەسۋى كەزىندە رەسەي پرەزيدەنتى ۆلاديمير پۋتين ۇسىنعان بولاتىن. 3 ساۋىردە وتكەن جيىندا پۋتين توقايەۆ ەكەۋى "بەيبىت اتوم سالاسىنداعى سەرىكتەستىك" جايلى تالقىلاعانىن ايتقان. ونىڭ سوزىنشە، "ۋران ءوندىرۋ جانە بايىتۋ بويىنشا قازاقستان مەن رەسەيدىڭ بىرلەسكەن التى ونەركاسىبى جۇمىس ىستەيدى".

قازاقستاندا سالىنۋى ىقتيمال اتوم ەلەكتر ستانسياسىنا (اەس) ارنالعان اۋماق رەتىندە الماتى وبلىسىنداعى ۇلكەن اۋىلى مەن شىعىس قازاقستان وبلىسىنداعى كۋرچاتوۆ قالاسى تاڭدالعان. اتالعان مالىمدەمەدەن كەيىن، قازاقستان ازاماتتارى ستانسيادان تونەتىن وراسان زور ءقاۋىپتى ايتىپ، اەس قۇرىلىسىنان باس تارتۋدى تالاپ ەتتى. 

ۇسىنعان: ادىلەت مادەنيەت