نۇرسۇلتان نازاربايەۆ جۇڭگو حالىق رەسپۋبليكاسىنىڭ «دوستىق» وردەنىمەن ماراپاتتالدى دەپ حابارلايدى Qamshy.kz اقپارات اگەنتتىگى اقوردا باسپا ءسوز قىزمەتىنە سىلتەمە جاساپ.

جۇڭگو حالىق رەسپۋبليكاسىنىڭ حالىق جينالاسى ۇيىندە قازاقستان رەسپۋبليكاسىنىڭ تۇڭعىش پرەزيدەنتىن تاتۋ كورشىلىك قارىم-قاتىناستى ىلگەرىلەتۋگە جانە جان-جاقتى ستراتەگيالىق سەرىكتەستىكتى دامىتۋعا قوسقان زور ۇلەسى ءۇشىن  «دوستىق» وردەنىمەن رەسمي ماراپاتتاۋ ءراسىمى ءوتتى. 

– مەن 1992 جىلى ديپلوماتيالىق قاتىناستار ورناعان ساتتەن باستاپ تاۋەلسىز قازاقستاننىڭ قىتايمەن ىنتىماقتاستىعىن دامىتۋ جانە نىعايتۋ جولىندا جۇمىس ىستەپ كەلە جاتقانىمدى اتاپ وتكىم كەلەدى. سىزدەردىڭ مەملەكەتتەرىڭىزبەن ءوزارا سەنىمگە جانە تاتۋ كورشىلىككە نەگىزدەلگەن قاتىناستار ورناتقانىمىزعا قۋانىشتىمىن. ءبىزدىڭ ىنتىماقتاستىعىمىز ۇلگى تۇتارلىق. ەلدەرىمىز وڭىردە جانە جاھاندىق دەڭگەيدە بەيبىتشىلىكتى، تراقتىلىق پەن ورنىقتى دامۋدى قامتاماسىز ەتۋگە ەلەۋلى ۇلەس قوسىپ كەلەدى، – دەدى ەلباسى.  

نۇرسۇلتان نازاربايەۆ «ءبىر بەلدەۋ، ءبىر جول» باستاماسىن ىسكە اسىرۋ ۇدەرىسىنە جانە ونىڭ جاھاندىق سىن-قاتەرلەرگە توتەپ بەرۋ ىسىندەگى ماڭىزدىلىعىنا  توقتالدى.

– قىسقا مەرزىم ىشىندە «ءبىر بەلدەۋ، ءبىر جول» باستاماسى الەمدىك تابىستى جوبالار قاتارىنا ەندى. سي سزينپين مىرزانىڭ ءبارىمىزدى بىرىگۋگە باستايتىن دامۋ يدەياسى بۇگىنگى سىن-قاتەرلەرگە ءتيىمدى جاۋاپ رەتىندە قالىپتاستى. جۇڭگو ۇسىنعان حالىقارالىق ىنتىماقتاستىقتىڭ جاڭا پلاتفورماسى ازيا، ەۋروپا جانە افريكانىڭ كوپتەگەن ەلدەرىنىڭ دامۋىندا اسا ماڭىزدى ساياسي، ەكونوميكالىق جانە مادەني ءرول اتقارۋدا، – دەدى قازاقستاننىڭ تۇڭعىش پرەزيدەنتى.

ەلباسى «ءبىر بەلدەۋ، ءبىر جول» ەكىنشى حالىقارالىق ىنتىماقتاستىق فورۋمى ءوزارا ءتيىمدى قارىم-قاتىناستى دامىتۋ ماسەلەلەرىنە ارنالعان ماڭىزدى باسقوسۋعا اينالعانىن ايتتى.

قازاقستاننىڭ تۇڭعىش پرەزيدەنتى، سونداي-اق، ەكى ەلدىڭ ەكونوميكالىق جوبالاردى ىسكە اسىرۋعا باعىتتالعان بىرلەسكەن جۇمىسىنىڭ ناتيجەلەرىنە توقتالدى.

– وسى مۇمكىندىكتى پايدالان وتىرىپ، ءسىزدى، ءتوراعا سي سزينپين، جۇڭگو ۇكىمەتىن جانە حالقىن «ءبىر بەلدەۋ، ءبىر جول» فورۋمىن تابىستى وتكىزۋلەرىڭىزبەن قۇتتىقتايمىن. قىتايلىق ەرەكشەلىگى بار «جاڭا ءداۋىر» ءسوسياليزمىن قۇرۋ جانە «جۇڭگو ارمانىن» جۇزەگە اسىرۋ جونىندەگى بارلىق ماقساتتار مەن مىندەتتەر ءسىزدىڭ جانە جۇڭگو كوممۋنيستىك پارتياسىنىڭ باسشىلىعىمەن ورىندالادى دەپ سەنەمىن، – دەدى نۇرسۇلتان نازاربايەۆ.

قازاقستاننىڭ تۇڭعىش پرەزيدەنتى جۇڭگو مەملەكەتىنىڭ باسشىلىعى مەن حالقىنا كورسەتكەن قوناقجايلىعى مەن ماراپاتى ءۇشىن ريزاشىلىق ءبىلدىردى.

– قازاقستان مەن قىتايدىڭ جان-جاقتى ستراتەگيالىق سەرىكتەستىگى حالىقتارىمىزدىڭ يگىلىگى جولىندا ودان ءارى نىعايا بەرەدى دەپ ۇمىتتەنەمىن. سىزگە اسا جاۋاپتى مەملەكەتتىك قىزمەتىڭىزدە – جاڭا جەتىستىكتەر، ال دوستاس جۇڭگو حالقىنا باق-بەرەكە تىلەيمىن، – دەدى نۇرسۇلتان نازاربايەۆ.

جۇڭگو حالىق رەسپۋبليكاسىنىڭ ءتوراعاسى سي سزينپين قازاقستاننىڭ تۇڭعىش پرەزيدەنتىنىڭ ەكى جاقتى قاتىناستاردى نىعايتۋعا قوسقان ۇلەسىنە توقتالىپ، ەلباسىنىڭ حالىقارالىق ىنتىماقتاستىقتى دامىتۋ ىسىنە سىڭىرگەن ەڭبەگىن ەرەكشە اتاپ ءوتتى.   

– بۇگىن ءبىز جۇڭگو حالقىنىڭ ناعىز دوسى – قازاقستاننىڭ تۇڭعىش پرەزيدەنتى نۇرسۇلتان نازاربايەۆقا جۇڭگو حالىق رەسپۋبليكاسىنىڭ جوعارى سىرتقى ماراپاتى – «دوستىق» وردەنىن رەسمي تابىس ەتۋ ءراسىمىن وتكىزىپ وتىرمىز. پرەزيدەنت نۇرسۇلتان نازاربايەۆتىڭ بۇكىل الەمدە زور بەدەلى بار. ول قازاقستان مەن جۇڭگو اراسىنداعى جان-جاقتى ستراتەگيالىق سەرىكتەستىكتىڭ نەگىزىن قالاپ، وسى قاتىناستاردى ءاردايىم دامىتىپ كەلەدى. قازاقستان شانحاي ىنتىماقتاستىق ۇيىمىن قۇرىپ، ازياداعى ءوزارا ىقپالداستىق جانە سەنىم شارالارى جونىندەگى كەڭەسكە باستاماشى بولدى. قازاقستاننىڭ تۇڭعىش پرەزيدەنتى ءوزىنىڭ ساياسي كورەگەندىگىنىڭ ارقاسىندا وسى ۇيىمداردى دامىتىپ، وڭىرلىك جانە جاھاندىق دەڭگەيدە بەيبىتشىلىك پەن تۇراقتىلىقتى قولداۋعا زور ۇلەس قوسىپ كەلەدى، – دەدى سي سزينپين.

وقي وتىرىڭىز، ♦نۇرسۇلتان نازاربايەۆ دجەكي چانمەن كەزدەستى (فوتو)

ۇسىنعان: ماقپال سەمباي