جاپون يمپەراتورى – باتىس ساياساتىندا اتى كوپ اتالا بەرمەيتىن فيگۋرا بولعانىمەن، ونىڭ ءسوزى اتالعان مەملەكەتتە ايتارلىقتاي باعالانادى جانە ونىمەن ساناسادى. ول جاڭالىقتار مەن شۋلى وقيعالاردا كوپ اتالمايدى. كونستيتۋسيالىق شەكتەۋلەرگە قاراماستان، ونىڭ سالماعى بارشىلىق بۇل ەلدە.

30ء-ساۋىر كۇنى يمپەراتور تاعىنان حەيسەي ءوز ەركىمەن ءتۇسىپ، جولىن مۇراگەرلىك سالتىمەن ۇلى نارۋحيتوعا بەردى. جاڭا يمپەراتور تۋرالى قانداي دەرەكتەر بار؟ بىرگە ساراپتاپ كورەلىك.

نارۋحيتو 1960 جىلى 23-اقپاندا توكيو قالاسىندا دۇنيەگە كەلگەن. اكيحيتونىڭ ۇلكەن ۇلى بالا كەزىنەن باستاپ تاق مۇراگەرى رەتىندە دايىندىقتان ءوتتى.

العاشقى ەرەكشەلىك

ول – بىرنەشە عاسىردان بەرى جالعاسىپ كەلە جاتقان ءداستۇردى بۇزعان يمپەراتور. عاسىرلار بويى جاپونيا يمپەراتورلارى وزدەرىنە جار ەتىپ جۇڭگو يمپەرياسىنان قالىڭدىق الىپ كەلگەن. ءبىراق نارۋحيتو بۇل ساناتقا جاتپايدى.

نارۋحيتونىڭ اناسى – ءومىر بويى كاتوليكتىك سەنىمدە كەلە جاتقان قاراپايىم جاپون ايەلى. قازىرگى ۋاقىتتىڭ وزىندە شىعىستىڭ ايتۋلى باسپاسوزدەرىندە جاڭا يمپەراتوردىڭ تەگى جونىندە ءتۇرلى اڭگىمە تاراپ جاتىر. جۇڭگو حانشايىمنان تۋماعان يمپەراتور بۇل ەلدە تەكسىز سانالادى ەكەن-مىس.

جاڭا يمپەراتور – "ورمەكشى ادام"

نارۋحيتو بالا كەزىنەن تاۋعا ورمەلەۋمەن، ۆيولونچەلدە ويناۋمەن جانە بەيسبولمەن اۋەستەنگەن. ول «يومۋري الىپتارى» كلۋبىنا جانكۇيەرلىك ەتەدى.

مەكتەپ جاسىندا جاڭا يمپەراتور فيلوسوفيانى تەرەڭدەتە وقىپ، كەيىننەن وسى باعىت بويىنشا جوعارى ءبىلىم الادى. ونىڭ ديپلومدىق جۇمىسى ارحەولوگيالىق قازبا جۇمىستارى بارىسىندا ءوزى تاپقان ەسكى تاريحتىڭ ىزدەرىنە باعىتتالعان. تاريحتى جانداندىرۋ مەن دامىتۋ – نارۋحيتونىڭ عىلىمي تاقىرىبى.

وكسفوردتىڭ وعلانى

وقۋىن تەرەڭدەتە ءتۇسۋ ءۇشىن بولاشاق يمپەراتور ۇلىبريتانياعا كەلەدى. وكسفوردتىڭ كوللەدجىندە ەكى جىل وقىعان نارۋحيتو "تەمزا جانە مەن. وكسفوردتاعى جىلداردان ەستەلىك" اتتى كىتاپ جازىپ شىعادى. اتالمىش تۋىندىسىندا ول بريتانياداعى جىلدارىن، ءومىرىنىڭ باقىتتى ساتتەرىن سۋرەتتەيدى. ءبىلىم الۋ بارىسىندا ول ەشقاشان تەگىمەن كوكىرەك قاقپادى، ءتىپتى، قىزمەتشىلەر دە ۇستامادى. باسقا ستۋدەنتتەر سەكىلدى نارۋحيتو دا بىرنەشە جىگىتپەن بىرگە جاتاقحانانىڭ بولمەسىندە تۇرعان.

بولاشاق يمپەراتوردىڭ جۇرەگىن جاۋلاعان كىم؟

80-جىلداردىڭ ورتاسىندا نارۋحيتو توكيوعا قايتا ورالدى. كەلە سالا يمپەراتورلىق اۋلەتتىڭ ءتۇرلى شارالارىنا بەلسەندى تۇردە قاتىسا باستايدى. وسىنداي شارالار كەزىندە ول وكسفورد پەن گارۆاردتىڭ تۇلەگى، ديپلوماتيالىق قىزمەتپەن جۇرگەن ماساكو وۆادانى كەزدەستىرىپ، وعان عاشىق بولادى. ەكەۋى سول ۋاقىتتان بەرى ءبىر ساتكە دە اجىراماي، قول ۇستاسىپ بىرگە كەلە جاتىر. دەگەنمەن، وۆادا جاۋاپكەرشىلىكتەن قورقىپ، نارۋحيتونىڭ ۇسىنىسىنان ەكى رەت باس تارتقان. سويتكەن ماساكو كۇنى ەرتەڭنەن باستاپ جاپونيانىڭ يمپەراتريساسى اتانباق. مىنە، جولى بولدى دەگەن – وسى.

جاڭا يمپەراتوردىڭ مۇراگەرى كىم؟

2001 جىلى جۇپتاردىڭ اراسىندا ايكو اتتى قىز بالا دۇنيەگە كەلەدى. ءبىراق جاپون زاڭى ايەل ادامعا تاققا وتىرۋعا رۇقسات بەرمەگەندىكتەن، نارۋحيتوعا ءبارىبىر تاق مۇراگەرى كەرەك ەدى. قازىرگە دەيىن بولاشاق يمپەراتوردىڭ بالاسى جالعىز. نارۋحيتونىڭ ءىنىسى فۋميحيتونىڭ ۇلى حيساكيتو بۇگىندە تاق مۇراگەرى رەتىندە سانالۋدا. ۇل بالانىڭ جاسى ءقازىر 13-تە.

سۋ رەسۋرسىنىڭ "سۇلتانى"

2000 جىلداردان باستاپ، نارۋحيتو ەلدەگى سۋ رەسۋرسىنىڭ پايدالانۋ ۇردىسىنە قاتتى شۇيلىكتى. ول اتالمىش ماسەلەگە بايلانىستى الەمدىك ۇيىمداردىڭ مۇشەلىگىندە بولىپ، ءتىپتى، ءۇشىنشى حالىقارالىق سۋ فورۋمىنىڭ پرەزيدەنتى اتاندى.

2009 جىلى نارۋحيتو ۆەتنامعا ىسساپارمەن كەلدى. يمپەراتور اۋلەتىنەن بۇل ەلدى كوممۋنيستىك كۇشتەر باسىپ العاننان كەيىن كەلگەن العاشقى وكىل رەتىندە تاريحتا قالدى. 2012 جىلى وعان يمپەراتور قىزمەتىن اتقارۋ باقىتى بۇيىردى. بۇل ۋاقىتتا ونىڭ اكەسى وتادان كەيىنگى قالپىنا كەلۋ ەم-شارالارىن قابىلداپ جاتقان. دەگەنمەن، يمپەراتورلىق قىزمەتىندەگى ەكى اپتالىق جۇمىسىندا نارۋحيتو ەشقانداي ماڭىزدى شەشىم قابىلداعان جوق.

جاڭا يمپەراتور ءوزىنىڭ تاريحي قىزمەتىنە 1-مامىردان باستاپ، ياعني، بۇگىننەن باستاپ كىرىسەدى.