IBNS – حالىقارالىق بانكنوت قاۋىمداستىعى. بۇل ۇيىم جىل سايىن الەمدەگى ەڭ ادەمى بانكنوتتار ءتىزىمىن جاسايدى. Qamshy.kz اقپارات اگەنتتىگى وسى ۇيىم بەرگەن اقپاراتتار نەگىزىندە الەمدەگى ەڭ ادەمى دەگەن بانكنوتتار بەستىگىن نازارلارىڭىزعا ۇسىنعىمىز كەلەدى.

بەسىنشى ورىن – سولومون ارالدارىنىڭ 40 دوللارلىق كۋپيۋروسى

سولومون ارالدارى تىنىق مۇحيتىنىڭ وڭتۇستىك-باتىس بولىگىندە ورنالاسقاندىقتان، اقشا بەتىندە مۇحيت سۋرەتتەرىنىڭ بەدەرلەنۋى قالىپتى جايت. كۋپيۋرونىڭ الدىڭعى جاعىندا – تەڭىز سۋرەتى، ارتقى جاعىندا – بالالار وتىرعان كەمە مەن ەسكەك ۇستاعان ادام مىنگەن ەكى كەمە بەينەلەنگەن. سونىمەن قاتار، بانكنوت بەتىنەن سۇڭگۋىر قايىقتى، بالىقتار مەن تاسباقانى دا كورۋگە بولادى.

ءتورتىنشى ورىن –  100 رەسەي ءرۋبلى

بۇل كۋپيۋرا 2018 جىلى وتكەن فۋتبولدان الەم چەمپيوناتىنىڭ قۇرمەتىنە جارىق كورگەن. الدىڭعى بەتىندە فۋتبول دوبىن ۇستاعان بالا مەن اڭىزعا اينالعان قاقپاشى ليەۆ ياشين بەينەلەنسە، ارتقى جاعىندا – جەر شارىنا ۇقساس فۋتبول دوبىنىڭ سۋرەتى سالىنعان.

ءۇشىنشى ورىن – 500 نورۆەگيا كرونى

بۇل بانكنوتتىڭ ءسانىن نورۆەگيالىق ايگىلى كەمە جاساۋشى كولين ارچەردىڭ قۇتقارۋشى كەمەسى كەلتىرىپ تۇر. ءدال وسى ارچەردىڭ كەمەسىمەن اتاقتى عالىم فريتوف نانسەن سولتۇستىك ءپوليۋستى باعىندىرعان، ال ساياحاتشى رۋال امۋدسەن وڭتۇستىك پوليۋسكە بارۋ جوسپارىن ءساتتى اياقتاعان.

ەكىنشى ورىن – 200 شۆەيساريا فرانكى  

بۇل ۆاليۋتا بەتىندەگى بەينە باسقالارىنا قاراعاندا وتە ەرەكشە. ءۇش كووردينات ءوسىن نۇسقاپ تۇرعان ءۇش ساۋساق. بۇل شۆەيساريا عىلىمىنىڭ دامىعاندىعىنان كورىنىس بەرەدى. اقشانىڭ جالعان كوشىرمەسى جاسالماۋىن قاداعالاۋ ءۇشىن قارجى بەتىنە 15 ءتۇرلى ەرەكشەلىكتەر ەنگىزىلگەن.

ءبىرىنشى ورىن – 10 كانادا دوللارى

2018 جىلدىڭ ەڭ ادەمى بانكنوتى اتاعىنا  كانادانىڭ 10 دوللارى يە بولدى. بانكنوت بەتىندە كاناداداعى ناسىلدىك سەگرەگاسيامەن كۇرەستە ۇلكەن ەڭبەك سىڭىرگەن قارا ءناسىلدى كاسىپكەر ۆيولا دەسموند حانىمنىڭ پورترەتى بەينەلەنگەن. ال كەلەسى بەتىندە 2014 جىلى اشىلعان ادام قۇقىقتارى جونىندەگى كانادا مۇراجايى عيماراتىنىڭ سۋرەتىن كورۋگە بولادى.