تاڭ اتىسىمەن سازگەر ۇلىقپان جولداسوۆ «داۋىس KZ» توبىمەن شۆەسياعا، ناقتىراق ايتساق، ستوكگولمگە اتتاندى.
دىتتەگەن جەرىنە جەتكەن توپ، سونداعى پاتەرىنە ازىق-تۇلىك الىپ، تىرشىلىك قامىن جاساۋدى باستاپ كەتىپتى.
بۇعان دەيىن ءمالىم ەتكەنىمىزدەي ونىڭ اندەرى ەندى ەۋروپا ساحناسىندا شىرقالىپ، شەتەلدىك انشىلەردىڭ رەپەرتۋارىنا ەنەدى.
شۆەدتىك ارىپتەستەرىمەن كەلىسىم شارتقا وتىرعان ۇلىقپان جولداسوۆتىڭ اۆتورلىق اندەرى جيناقتالعان البوم جارىق كورەدى. قازاقستاننان اتتانعان ونەر يەلەرى جاز بويى ستوكگولمدە بولادى، ولار قازىردەن-اق بىلەكتى سىبانىپ ەڭبەككە كىرىسىپ كەتتى.
ۇلىقپاننىڭ البومىنان بولەك، «داۋىس KZ» توبىنا بەينەكليپ ءتۇسىرۋ دە جوسپاردا بار ەكەن.
شىلدە ايىندا استانادا سازگەردىڭ اۆتورلىق كەشىن وتكىزۋ جوسپارلانىپ وتىر. ۇلىقپان جولداسوۆ جەتەگىندەگى جىگىتتەرمەن سول كەشكە كەلىپ، قاتىسىپ، كەيىن شۆەسياعا قايتادان كەتپەك.
دەرەككوز: Nur.kz
