مەككە مەشىتتەرىنىڭ بىرىندە اقشام نامازى ۋاقىتىندا مۇسىلماندارمەن بىرگە اۋىزاشار ۋاقىتىن كۇتكەن مىسىقتىڭ بۇل قىلىعى بارشا جۇرتتىڭ تاڭدانىسىن تۋدىردى.
مەشىتتە جايىلعان داستارحان باسىندا الدىنداعى تاماققا تيىسپەي، مۇسىلماندارمەن بىرگە اۋىزاشار ۋاقىتىن كۇتىپ وتىرعان مىسىق جايلى فوتو الەۋمەتتىك جەلى قولدانۋشىلارى اراسىندا قىزۋ تالقىعا ءتۇسىپ، قارالىم سانى شارىقتاپ كەتكەن.
احمەت ءال-جاۋحاري ەسىمدى ازامات: «مىسىقتىڭ ءوزى ورازا ۇستاعان ادامداردى سىيلاپ، سولارمەن بىرگە اۋىز اشۋدى كۇتىپ وتىر. مىسىقتىڭ بويىندا ەرەكشە قاسيەتى بولسا كەرەك»، – دەگەن پىكىر قالدىرعان.
«وتە سيرەك كەزدەسەتىن جاعداي. مىسىق مۇسىلماندارمەن بىرگە ءبىر داستارحاندا وتىر. ءبىر قىزىعى، الدىندا تۇرعان تاعامدى تۇرتپەي، اۋىز اشار ۋاقىتىن كۇتىپ وتىرعانى تاڭ قالدىرادى. مۇنداي قاسيەتى اللانىڭ ءوزى بەرىپ وتىر»، – دەپ جازعان ەكەن ازايي بۇحاري ەسىمدى قولدانۋشى.
