كەشە قىرعىز استاناسىندا ق ر پرەزيدەنتى نۇرسۇلتان نازاربايەۆتىڭ بالالىق، بوزبالالىق  شاعىنان سىر شەرتەتىن جاڭا قويىلىمنىڭ (سپەكتاكل) پرەمەراسى ءوتتى. قويىلىمدا بوزبالا نۇرسۇلتاننىڭ قىرعىز بالالارىمەن اراداعى دوستىعى تۋرالى باياندالعان. بۇل تۋرالى «قامشى» پورتالى ازاتتىقتىڭ قىرعىز رەداكسياسىنا سىلتەمە جاساي وتىرىپ حابارلايدى.

قويىلىم سەنارييى بويىنشا، جاپ-جاس قازاق جىگىتى مەن قىرعىز بالاسى دوستاسىپ، بىرگە ءبىلىم الادى. قيىن-قىستاۋ كەزەڭدەرىندە بىر-بىرلەرىنە دەمەۋ بولىپ، ومىرلىك اينىماس دوسقا اينالادى. قازاق جىگىتى – نۇرسۇلتان نازاربايەۆ بولسا، قىرعىز بالاسى – قىرعىزستانداعى ەڭ ىقپالدى ساياسي تۇلعالاردىڭ ءبىرى بولعان مارات اكماتوۆ. سپەكتال ومىردە بولعان وقيعالار جەلىسىندە قويىلعان.

كانىبەك اكماتوۆ- مارات اكماتوۆتىڭ كىشى ۇلى:

— شىنىندا بۇكىل قويىلىم بارىسىندا  كوزىمنەن جاس توقتامادى. ەرەكشە تولقىدىم، تولعاندىم. مەن بالا كەزىمنەن نۇرسۇلتان نازاربايەۆ پەن اكەم اراسىنداعى باۋىرلاستىقتى، دوستىقتى كورىپ ءوستىم. بالا كۇنىمدە اكەم ماعان ونىڭ سۋرەتىن كورسەتىپ، «بۇل دا سەنىڭ اكەڭ» دەيتىن. مەن 20 جاسقا تولعاندا  اكەم ەكەۋمىز چولپان-اتاعا باردىق. وندا دەم الىپ جاتقان نۇرسۇلتان ابىشۇلىمەن كەزدەستىك. مىنە، سول كەزدە ولاردىڭ اراسىنداعى دوستىقتىڭ ماڭگىلىك ەكەنىنە كوزىم تاعى ءبىر جەتكەن بولاتىن. كەيىن ءبىلدىم، ولار ۋكراينادا دا بىرگە وقىعان ەكەن.

كايىرگۇل سارتبايەۆا، قىرعىزستان حالىق ءارتىسى:

— بۇل قويىلىم وتە جوعارعى دەڭگەيدە دايىندالعان ەكەن. ءوز كورەرمەنىن تاباتىن، ماعىنالى جانە شىنايى قويىلىم بولدى. مەنىڭ ويىمشا، مۇنى قىرعىزستاننىڭ بارلىق وبلىستارىنا كورسەتۋ كەرەك. تەك قىرعىز ساحناسىندا عانا ەمەس، قازاقستانعا دا قويىلۋى ءتيىس دەپ ويلايمىن. ويتكەنى، بۇل اكتۋالدى سپەكتاكل جانە ەڭ باستىسى، قويىلىمعا اكتەرلەر ءساتتى تاڭدالعان.

قانات سادىقوۆ، قىرعىزستاننىڭ بۇرىنعى ءبىلىم ءمينسيترى:

— سپەكتالدىڭ باستى تاقىرىبى – دوستىق. ەكى ادامنىڭ ءومىرى ارقىلى ەكى ەلدىڭ دوستىعىن كەرەمەت سۋرەتتەگەن. ونىڭ ءبىرى – نۇرسۇلتان نازاربايەۆ. ءبىز بۇل تۇلعانى جاقسى بىلەمىز. قۇرمەتتەيمىز.نۇرسۇلتان ءابىش ۇلىنىڭ ارقاسىندا قازاق-قىرعىز دوستىعىنا سىزات تۇسپەي، ىنتىماعىمىز جاراسىپ كەلەدى. سول ءۇشىن ول كىسىگى العىس ايتۋ كەرەكپىز.

قويلىمدى امانبەك جاپاروۆتىڭ «ەر دوستۋگۋ — ەگيز، ەل دوستۋگۋ — دەڭيز» دراماسىنىڭ نەگىزىندە قىرعىزدىڭ تالانتتى رەجيسسەرى – مارات قوزۋكەيەۆ ساحنالاعان.

ال وسىعان دەيىن قازاقستاندا ەلباسى ومىرىنەن سىر تارتاتىن، اۆتوبيوگرافيالىق «پۋت ليدەرا» كينوەپوپەياسى تۇسىرىلگەن بولاتىن. سونداي-اق، «مەنىڭ بالالىق شاعىمنىڭ اسپانى»، «رازرىۆايا زامكنۋتىي كرۋگ» اتتى بىرنەشە كوركەم فيلمدەر تۇسىرىلگەن.

نۇرگەلدى ءابدىعاني ۇلى

سۋرەت: azattyq.org