رف جوعارعى دۋماسىنىڭ دەپۋتاتى، رلدپ-نىڭ جەتەكشىسى، رەسەيلىك ساياساتكەر، ينتەرنەتتىڭ جۇلدىزى، دۋماداعى داۋقۇمار دەپۋتات – ۆلاديمير جيرينوۆسكييدىڭ جاڭا ۆيدەوسى قازاقستاندىق باق-تا قىزۋ تالقىعا ءتۇستى.  وندا جيرينوۆسكيي مىرزا «رازگوۆور پو دۋشام» ۆيدەوبلوگىنىڭ اۆتورىمەن كەزدەسىپ، قازاقستان تۋرالى شىنايى كوزقاراسىن جەتكىزگەن-مىس. بۇل تۋرالى «قامشى» پورتالى www.nur.kz-كە سىلتەمە جاساي وتىرىپ حابارلايدى.

ءوز  باياندامالارىندا ارنەگە ءبىر شۇيلىگىپ، اقىلعا قونىمسىز دەرەكتەرمەن ەلدى دۇرلىكتىرىپ جۇرەتىن رەسەيلىك ساياساتكەر ساباسىنا ءتۇسىپتى، تاۋبەسىنە كەلىپتى.

ول قازاقستان جايلى ايتقان سوزدەرىن جۋرناليستەر بۇرمالادى دەپ اقتالعان. “الماتى – مەنىڭ تۋعان قالام. مەن قازاقستاندا 18 جىل تۇردىم… رەسەيدە ەشكىم قازاقستاننىڭ مارتەبەسى مەن شەكاراسىنا كۇمان كەلتىرمەيدى. ءبىزدىڭ سوزدەرىمىزدى كەي جۋرناليستەر بۇرمالاپ جەتكىزىپ جاتادى. ماسەلەن “ەحو موسكۆى” راديوسىندا پليۋششيەۆكە سۇحبات بەرگەن بولاتىنمىن. وندا ءبىز ۋكراينا، دونباسستى تالقىلاپ وتىردىق. ول “كەلەسى كەزەكتە كىم، قازاقستان با؟” دەگەن سۇراق قويدى. مەن “كەيىن” دەپ بۇل ماسەلەنى تالقىلاپ جاتپاعانىمىزدى اڭداتۋ ءۇشىن ايتقان ەدىم. الايدا جۋرناليستەر قيىپ الىپ كورسەتىپتى. سودان قازاقستاندىقتار مۇنى وزدەرىنشە ءتۇسىنىپ، كەلەسى كەزەكتە قازاقستان تۇر دەپ ۇعىپ قالدى”، – دەپ تۇسىندىرگەن.

ءيا، ءوزىنىڭ ۋلى تىلىمەن انانى ءبىر، مىنانى ءبىر شاعىپ جۇرەتىن رەسەيلىك ساياساتكەر(جيرەن سارى) قازاقستاننىڭ تەرريتورياسىنا ەشكىمنىڭ كوز الارتىپ وتىرماعانىن، شەكارانى ەشكىمنىڭ وزگەرتۋگە ارەكەتتەنبەگەنىن ايتا كەلە، ورتاداعى ارانداتۋشىلار قازاقستان مەن رەسەيدىڭ اسىنداعى قارىم-قاتىناستارعا سىزات ءتۇسىرۋدى كوزدەگەندەر ەكەنىن جەتكىزگەن.

سونىمەن قاتار، قىرعىزستانمەن بولعان تۇسىنىسپەۋشىلىكتەردى دە تىزبەكتەدى. بۇعان دەيىن قىرعىزستانعا ەكونوميكالىق داعدارىستان شىعۋ ءۇشىن ىستىقكولدى ساتىپ جىبەرۋ تۋرالى ۇسىنىسى جاي عانا كەڭەس بولعانىن جانە كەزىندە رەسەي دە الياسكانى ساتىپ، تىعىرىقتان شىققانىن العا تارتتى.

ءوز كەڭسەسىندە جۋرناليستكە جاپ-جاقسى سۇحبات بەرىپ وتىرعان جيرينوۆسكيي مىرزا،  قازاقستانعا، قىرعىزستانعا قاراتا ايتقان مالىمدەمەلەردىڭ جالعان ەكەنىن، ونى بۇرمالاپ جىبەرگەنىن، ءوزىنىڭ ورتا ازيا ەلدەرىنە جاقسى كوزقاراستا ەكەنىن ايتىپ اقتالا كەلە، ءسوز سوڭىندا باياعى ادەتىنە باسقان.

ول الماتى قالاسىندا ورنالاسقان مەكتەپتەردىڭ بىرىنە جانە ماسانچي كوشەسىنە ءوزىنىڭ ەسىمىن بەرۋگە قارسى ەمەس ەكەندىگىن جەتكىزگەن.

“قازاقستان – مەنىڭ تۋعان جەرىم. مەن ءتىپتى الماتىداعى ماسانچي كوشەسىنىڭ اتاۋىن جيرينوۆسكيي دەپ وزگەرتسە دە قارسى ەمەسپىن. ال ءوزىم وقىعان №25 مەكتەپتى جيرينوۆسكيي اتىنداعى دەپ تە اتاي بەرسىن. مۇمكىن بولاشاقتا سولاي ىستەگىسى كەلەتىندەر تابىلار، بالكىم؟ ەسەسىنە تۋريستەر كوپ كەلەتىن بولادى. بۇل وزدەرىڭە ءتيىمدى. سوندىقتان الدىن-الا كەلىسىمىمدى بەرەمىن”، – دەپ ءسوزىن اياقتاعان.

نۇرزات توعجان