وڭتۇستىك قازاقستان وبلىسى تۇلكىباس اۋدانىنداعى «ارمان» بالالاردى ساۋىقتىرۋ لاگەرىندە 2015 جىلدىڭ العاشقى دەمالىس كەزەڭى اشىلدى، دەپ حابارلادى وبلىس اكىمىنىڭ باسپا ءسوز قىزمەتى. تۇرمىس جاعدايى تومەن وتباسىلار مەن جەتىم بالالار ساناتىنداعى 300 بالا جازعى دەمالىس كەزەڭىنىڭ العاشقى كۇندەرىن وزىمەن تەتەلەس بالالارمەن وتكىزۋگە مۇمكىندىك الدى. لاگەر باسشىلىعى بالالاردىڭ تىڭعىلىقتى دەمالۋى ءۇشىن كوپتەگەن قىزىقتى شارالار ۇيىمداستىرماق. ولاردىڭ قاتارىندا ءتۇرلى سپارتاكيادالار، اسكەري-پاتريوتتىق ويىندار، ءجۇزۋ مەن باسسەيندەگى ويىندار، اركەلكى بايقاۋلار مەن وزگە دە قىزىقتى شارالار بار. سونىمەن قاتار لاگەردە بىرنەشە ونەر ۇيىرمەلەرى دە اشىلىپ، جۇمىس جۇرگىزۋدە. مۇندا بالالار 5 مەزگىل تاماق ىشەدى. دەمالۋشىلارعا ۇسىنىلاتىن تاعامدار سانيتارلىق قاۋىپسىزدىك تالاپتارىنا سايكەس قاتاڭ تەكسەرىلەدى. دەمالىپ جاتقان بالالاردىڭ دەنساۋلىعىن ساقتاۋ مەن نىعايتۋ ماسەلەسى دە لاگەردەگى مەديسينا قىزمەتكەرلەرىنىڭ قاتاڭ باقىلاۋىندا. «لاگەردە بالالار ۋاقىتىن ءتيىمدى وتكىزىپ، جاقسى تىنىعادى دەپ ويلايمىن. ولاردىڭ ءاربىر كۇنى قىزىقتى ءوتۋى ءۇشىن ءبىز ءبىلىم دەڭگەيىن انىقتايتىن ۆيكتورينا ويىندارىنان باستاپ سپورتتىق جارىستارعا دەيىن قامتىلعان جارقىن باعدارلامالار ازىرلەدىك»، - دەيدى لاگەر ديرەكتورى كلارا دينايەۆا. العاشقى دەمالۋشىلار لەگىن قابىلداعان لاگەردە وسى اتاۋلى كۇنگە وراي سالتاناتتى شارا ءوتتى. كەش قوناقتارى «ايگولەك» حالىقتىق حورەگرافيالىق انسامبل ۇجىمى مەن ءانشى، كومپوزيتور مارات وماروۆ ءوز كونسەرتتىك باعدارلامالارىن ۇسىنىپ، بالالاردى ۇلكەن قۋانىشقا بولەدى. بيىل جازعى ماۋسىمدا وڭتۇستىك قازاقستانداعى 24 جازعى ساۋىقتىرۋ لاگەرىندە 50 مىڭعا جۋىق بالا دەمالادى. وسى دەمالىس ورىندارىنا وبلىستان الەۋمەتتىك تۇرمىسى تومەن، جەتىم جانە جارتىلاي جەتىم ون مىڭعا جۋىق ءبۇلدىرشىن لاگەرلەرگە تەگىن جىبەرىلەدى. سونداي-اق، 6500 بالا وزگە وڭىرلەر مەن شەت ەلدەردەگى لاگەرلەرگە بارسا، قالا ىشىندەگى وقۋشىلار سارايىنىڭ جانىنداعى «بالداۋرەن» لاگەرى 600 بالانى تەگىن قابىلدايدى.