«بالداۋرەن» بالالاردى ساۋىقتىرۋ ورتالىعىندا بالالاردى قابىلداۋدىڭ ەكىنشى ماۋسىمى باستالدى. ءقازىر مۇندا شاھار مەكتەپتەرىنەن جينالعان جۇزگە جۋىق بالعىن ءتۇرلى ۇيىرمەلەرگە قاتىسىپ، ۋاقىتىن ءتيىمدى وتكىزىپ ءجۇر. تاڭعى ساعات 8:30 بولدى دەگەنشە بالالار مەن جاسوسپىرىمدەر ورتالىعىندا قايناعان ءومىر باستالادى. ساپقا تىزىلگەن «بالداۋرەندىكتەر» دەنەسىن شىنىقتىرىپ الىپ، تاماققا تويىنادى. ودان سوڭ دوپ تەۋىپ، شومىلۋ مەن ءتۇرلى ۇيىرمەلەرگە باستاۋىشتىڭ وقۋشىلارى كىرىسەدى دە كەتەدى.

ساۋىقتىرۋ ورتالىعىندا 10 ۇيىرمە بار. ەبى مەن قىزىعۋشىلىعى باسىم وقۋشىلار ءار ءتۇرلى ۇيىرمەگە جازىلىپ، وسىندا كەلگەن 8 كۇنىن بوس وتكىزبەيدى. ءارقايسىسى ءبىر-بىر ءۇيدىڭ ەركەسىمەن جۇمىس ىستەۋ مۇنداعىلارعا دا وڭاي ەمەس. لاگەرگە كەلگەن ءاربىر بالانىڭ ءتىلىن تاپسا — ماقساتتىڭ ورىندالعانى.

«بالداۋرەن» ساۋىقتىرۋ ورتالىعى بالالاردى جەتى جىل قاتارىنان قابىلداپ كەلەدى. مۇندا تىنىعاتىن بالعىنداردىڭ 35 پايىزى جەتىم جانە الەۋمەتتىك جاعدايى تومەن، سونىمەن قاتار، كوپبالالى وتباسىلاردان شىققان بالالار.

يسلام كوپجاساروۆ، شىمكەنت قالالىق بالالار مەن جاسوسپىرىمدەر ورتالىعى ديرەكتورىنىڭ ورىنباسارى: «بالالار كەلگەن ساتتە ءبىرىنشى، ەكىنشى كۇندەرى لاگەرگە ازداپ ۇيرەنىسە الماي قينالىپ جاتادى. ال وسىنداعى بالالارمەن تانىسىپ، دوستاسىپ كەتكەن سوڭ كەتەردە ءبىر-بىرىن قيماي، باۋىر باسىپ قالاتىنى بار. سوندىقتان مۇنداي ساۋىقتىرۋ ورىندارى بارشا بالاعا كەرەك. بۇل — دوستىقتىڭ مەكەنى. مۇندا كەلگەن بالا ءارى دوس تابادى، ءارى كاسىپتىك تە باعدار الادى.»

Cاۋىقتىرۋ لاگەرى تامىز ايىنىڭ اياعىنا دەيىن جۇمىس ىستەيتىن بولادى. وسى 6 ماۋسىم بويى بالالاردى ءتۇرلى ونەر تۇرىنە باۋليمىز دەپ وتىرعان ماماندار قىركۇيەككە دەيىن 500-دەي وقۋشىنى قامتىماق.