كەشە قازاقستان رەسپۋبليكاسىنىڭ پرەزيدەنتى نۇرسۇلتان ءابىش ۇلى ءبىرقاتار مەملەكەتتىك قىزمەتكەرلەرگە تاعايىنداۋلار جاسادى. اتاپ ايتار بولساق، قازاقستاننىڭ شەتەلدەگى ەلشىلەر قوسىنى ءۇش فيگۋرامەن تولىقتى. بۇل تۋرالى «قامشى» پورتالى  اقوردانىڭ باسپا ءسوز قىزمەتىنە سىلتەمە جاساي وتىرىپ حابارلايدى. سونىمەن، پرەزيدەنت جارلىعىمەن ا.بەردىباي يراك، ليۆان جانە پالەستينا رەسپۋبليكالارىنداعى قازاقستاننىڭ توتەنشە جانە وكىلەتتى ەلشىسى بولىپ تاعايىندالدى. ال،  وسىعان دەيىن قازاقستاننىڭ  يزرايلدەگى توتەنشە جانە وكىلەتتى ەلشىسى بولىپ قىزمەت اتقارىپ كەلگەن د.قۋانىشبايەۆ مىرزا ەندى كيپر رەسپۋبليكاسىندا ەلشىلىك قىزمەت اتقاراتىن بولدى. سونداي-اق،  پرەزيدەنت ن.نازاربايەۆتىڭ جارلىعى بويىنشا قازاقستاننىڭ ءۇندىستانداعى وكىلەتتى ەلشىسى قوسىمشا شري-لانكا دەموكراتيالىق رەسپۋبليكاسىنداعى توتەنشە جانە وكىلەتتى ەلشىسى قىزمەتىن اتقاراتىن بولادى. ق ر پرەزيدەنتىنىڭ جارلىعى بويىنشا ەلشىلەر قوسىنىنا ءبىرقاتار وزگەرىستەر ەنگىزىلدى. ەندى اتالمىش ەلدەر مەن قازاقستاننىڭ اراسىنداعى بايلانىس ارتاتىنىنا سەنىم بىلدىرەمىز. الايدا، سوڭعى ۋاقىتتا قازاق قوعامىندا كوپ تالقىعا تۇسكەن تاعى ءبىر داۋلى ماسەلە – قازاق-وزبەك شەكاراسىنداعى كەلەڭسىز جاعدايلار. كەيبىر دەرەككوزدەرىنە سۇيەنەر بولساق،  قازاقستان مەن وزبەكستان رەسپۋبليكاسى شەكاراسىندا وزبەك ساربازدارىنىڭ قولىنان 33 قازاقستاندىق ازامات قازا تاپقان. سونىڭ ءبىرى، كۇنى كەشە عانا شەكارالىق ايماقتاعى قازاقستانعا تيەسىلى تەرريتوريادا جۇرگەن ەكى بىردەي قازاقستاندىققا وزبەك شەكارا قىزمەتكەرلەرى  قارسى وق اتىپ، سالدارىنان ءبىرى قازا تاپقان، ال ەكىنشىسى پسيحيكالىق كۇيزەلىسكە ۇشىراعان. بۇل تۋرالى قازاقستاندىق ب ا ق از جازبادى. ەڭ بولماعاندا، ادامگەرشىلىك قاعيدالارىن ەسكەرىپ، وزبەكتىڭ وكىلەتتى ەلشىسى قازا تاپقان ازاماتتىڭ وتباسىنا كوڭىل ايتىپ، جاعداي سۇراۋعا جاراماعانى ويلاندىرادى. ەلدەستىرمەك ەلشىدەن ەمەس پە ەدى؟.. وسىنداي ورىنسىز جاعدايلاردى ەسكەرە كەلە، ق ر پرەزيدەنتى ەلشىلەر قوسىنىن جاڭارتىپ جاتقاندا، قازاقستان رەسپۋبليكاسىنىڭ وزبەكستانداعى وكىلەتتى ەلشىسىن اۋىستىرا  ما دەگەن زاڭدى سۇراق تۋىندايتىنى اقيقات. ەكى-ەل اراسىندا  ءتۇرلى جاعدايلاردا وزبەك شەكاراشىلارىنىڭ قولىنان قازا تاپقان ازاماتتاردىڭ  سۇراۋىن قازاق ەلشى ءبورىباي جەكسەنبين مىرزا نەگە سۇرامايدى؟