مەملەكەت باسشىسى قاسىم-جومارت توقايەۆتىڭ باستاماسىمەن ەل تۇرعىندارىنىڭ نەسيەسى كەشىرىلىپ، قارا حالىقتىڭ قۋانىشىندا شەك بولماعانى بەلگىلى. بۇل باستاما ارينە پرەزيدەنت جولداۋىندا ايتقان تۇرعىنداردىڭ تۇرمىسىن تۇزەۋگە باعىتتالعانى بەلگىلى. وسىعان وراي جامبىل وبلىسى جۋالى اۋدانىنىڭ «كۇمىس القا» يەگەرى قاسىم-جومارت كەمەل ۇلىنىڭ شاراپاتى ءۇشىن شەكسىز العىسىن جەتكىزۋدە، دەپ جازادى Qamshy.kz اقپارات اگەنتتىگى. مەملەكەت باسشىسى قاسىم-جومارت توقايەۆ پرەزيدەنت قارىزعا باتقان ازاماتتاردىڭ جاعدايىنا بەي-جاي قاراي المايتىنىن ايتىپ، ولارعا ءتيىستى الەۋمەتتىك كومەك كورسەتۋ تۋرالى شەشىم قابىلدادى. جارلىققا سايكەس ومىرلىك قيىن جاعدايدا قالعان جانداردىڭ ەكىنشى دەڭگەيدەگى بانكتەر مەن ميكروقارجى ۇيىمدارىنداعى كەپىلسىز تۇتىنۋشىلىق قارىزدارى وتەلۋدە.

وسى رەتتە ءوز اتىنا رەسىمدەلگەن تۇتىنۋشىلىق نەسيەسى مەرزىمىنەن بۇرىن جابىلىپ، قۋانىشقا كەنەلگەندەر اراسىندا جۋالىلىقتار دا بار. اسىرەسە، نۇرلىكەنت اۋىلىنىڭ تۇرعىنى، كوپبالالى انا، «كۇمىس القا» يەگەرى رايحان اقجىگىتوۆانىڭ ريزالىعىندا شەك جوق.

– مەن «ءسىزدىڭ بانكتەگى نەسيەڭىز وتەلدى» دەگەن حابارلاما كەلگەندە، وعان ءاۋ باستا سەنگەن جوقپىن. «كاسپيي بانكتەن» العان ەكى نەسيەم، ال «حوۋم كرەديت» بانكتە ءبىر نەسيەم بار ەدى. وتكەن جىلى ءدال تاۋەلسىزدىك كۇنى مەرەكەسىندە «تەحنودوم» ساۋدا ۇيىندەگى «كاسپيي بانك» وكىلدەرى ارقىلى 206 مىڭ تەڭگەگە نەسيە راسىمدەپ، پلازمالىق تەلەديدار العان ەدىم. تاعى 300 مىڭ تەڭگە كولەمىندە اقشالاي نەسيە، ناۋرىز ايىندا «حوۋم كرەديتتەن» ۇيالى تەلەفوندى نەسيەگە الدىم. العان نەسيەمدى ءار ايدىڭ باسىندا ايما-اي ءوزىم تولەپ كەلە جاتىر ەدىم.ەندى، مىنە، نەسيەمنىڭ وتەلگەنى وتباسىمنىڭ تابىسىنا، تۇرمىس جاعدايىنا اجەپتاۋىر اسەر ەتىپ وتىر. قيىن ساتتە دەم بەرىپ، بىزدەي كوپبالالى انانى ءوز قامقورلىعىنا العانى ءۇشىن پرەزيدەنت توقايەۆ مىرزاعا جانە ۇكىمەتكە ايتار العىسىم شەكسىز،- دەيدى كوپبالالى انا.

رايحان اقجىگىتوۆا ودان بولەك، بالالارىنا الەۋمەتتىك جاردەماقى الاتىنىن، مەكتەپ، سپورت كيىمدەرى بەرىلەتىنىن، مەكتەپتە ءبىر مەزگىل ىستىق تاماقپەن قامتاماسىز ەتىلىپ وتىرعانىن ريزاشىلىق سەزىممەن ايتتى.

ءيا بۇل ءبىر عانا رايحاننىڭ جۇرەك جاردى العىسى ەمەس. مۇنداي كۇيدى جامبىلدىقتاردىڭ دەنى كەشكەنى انىق. بارلىعىنىڭ ءبىر عانا نيەتى مەن تىلەۋى مەملەكەت باسشىسىنىڭ اماندىعى. سوندىقتان كوپبالالى انالاردىڭ العىسىن ارقالاعان پرەزيدەنتتىڭ دە عۇمىرى ۇزاق بولعاي دەگەن نيەتتە جۋالىلىق جۇرتشىلىق.