«تاراز» قايتا ءتىرىلدى. ولاي دەيتىنىمىز «وقجەتپەسپەن» وتكەن سوڭعى ويىندا جەرلەستەرىمىز سەنساسيا جاسادى. 2:0 ەسەبىمەن ۇتىلىپ جاتىپ، ايدى اسپاننان ءبىر-اق شىعاردى. بۇل ءسوز جوق، جاڭا باپكەر نۇرمات مىرزابايەۆتىڭ تاكتيكالىق شەبەرلىگى ەكەنى داۋسىز، دەپ جازادى Qamshy.kz اقپارات اگەنتتىگى. راس العاشقى مينۋتتارىندا قاقپامىزعا پەنالتي اكەلىپ، كلۋب جەڭىلىستىڭ كەرمەك ءدامىن قايتا تاتاتىنداي كورىنگەن. ءتىپتى ەكىنشى دوپ تورتا تۋلاعاندا تالايلار قولىن ءبىر سىلتەگەنى دە اقيقات. الايدا كۇتپەگەن جەردەن كەزدەسۋدىڭ باستى قاھارمانى الىشەر سۇلەي ءبىرىنشى تايمدا ەسەپ ايىرماسىن ءبىر گولعا قىسقارتىپ، ءۇمىت وتىن قايتا جاقتى.

ۇزىلىستەن كەيىن «تاراز» الاڭعا ەرەكشە ەكپىنمەن شىققانى بايقالدى. ءبىراق تورەشى دورەكى ويناعانى ءۇشىن جوانا ءمارتينستى الاڭنان قۋىپ، جەلپىنگەن كوڭىلدى سۋ سەپكەندەي باستى. بۇدان كەيىن جىگىتتەردىڭ جىگەرى قۇم بولىپ، سالى سۋعا كەتەدى دەپ ويلاعانبىز. الايدا الىشەر سۇلەي قايتا ەرلىك تانىتىپ قاقپاشىدان ايلاسىن اسىرىپ دوپتى تورعا قاراي باعىتتادى. باعاناعا ءتيىپ كەرى سەرپىلگەن دوپتىڭ قاسىنان ەلگۋدجا لوبجانيدزە تابىلا كەتىپ، ەسەپتى تەڭەستىرىپ كەتتى. ءبىر ويىنشىعا كەم ويناپ جاتقان «تارازعا» تەڭ ۇپاي دا تاقياسىنا تار كەلمەيتىن. ءبىراق جىگىتتەر ناعىز ەرلىك جاسادى. توقسان مينۋت تۇگەسىلەر تۇستا لوبجانيدزە قورعاۋشىلاردىڭ ورەسكەل قاتەتىلىگىن ءساتتى پايدالانىپ، ەسەپتى 2:3-كە جەتكىزدى. وسىلايشا «تاراز» اۋاداي قاجەت ءۇش ۇپايعا قول جەتكىزدى.

ويىننان كەيىنگى باسپا ءسوز ءماسليحاتىندا «تارازدىڭ» باس باپكەرىنىڭ مىندەتىن اتقارۋشى نۇرمات مىرزابايەۆ كومانداعا تاماشا كامبەك ءۇشىن العىسىن ءبىلدىردى.

- ويىن وتە اۋىر بولدى. اسىرەسە الاڭنان ءبىر ويىنشىمىز قۋىلعاننان كەيىن جاعدايىمىز مۇشكىلدەي كورىنگەن. ءبىراق جىگىتتەر جەڭىسكە دەگەن جىگەر تانىتتى. العىسىم شەكسىز. كلۋبتىڭ قازىرگى جاعدايىندا بىزگە ءاربىر ۇپاي اۋاداي قاجەت. سوندىقتان قالعان ويىنداردا دا بارىمىزدى سالاتىن بولامىز، -دەدى باس باپكەر.

قالاي دەگەندە دە، «تاراز» كوپتەن كۇتكەن ءۇش ۇپايىنا قول جەتكىزدى. ەندى تەك وسى باعىتتان تايماۋ كەرەك. «وقجەتپەستى» ۇتقاننان كەيىن ءقاۋىپتى ايماقتاعى «اتىراۋدان» ءتورت، ال «اقتوبەدەن» ون ەكى ۇپاي العا شىعىپ كەتكەنىمىز قۋانتادى. دەسە دە تۋرنير كەستەسىندە 10-ورىندا تۇرۋ ابىروي ەمەس. قالعان ءتورت ويىنداعى قارسىلاستارىمىز «شاحتەر»، «جەتىسۋ»، «قايسار» جانە «ورداباسى» الىنبايتىن قامال ەمەس. سوندىقتان جىگىتتەر بار كۇشتەرىڭدى سالىڭدار. قازىرگى باستى ماقسات تومەنگى ليگاعا قايتا ءتۇسىپ قالماۋ.