تاتۋلىقتى تۋ ەتكەن ەلىمىزدە ەڭ ءبىرىنشى ورىندار ۇلتتار مەن ۇلىستاردىڭ ىنتىماعى تۇراتىنى بەلگىلى. ەلباسى دا ءاربىر جولداۋىندا بىرلىكتىڭ بەكەمدىگىن ايتىپ، كوپكە ۇلگى تىرلىك جاسادى. كۇنى كەشە مەملەكەت باسشىسى قاسىم-جومارت توقايەۆ تا اسسامبلەيا جۇمىسىنا ايرىقشا كوڭىل مەن باسىمدىق بەرىلە بەرەتىنىن تىلگە تيەك ەتتى. بۇل ورايدا جامبىل وبلىسىنداعى وزگە ۇلتتارىنىڭ ىنتىماعى ۇيىسقانى كوپكە ايان، دەپ جازادى Qamshy.kz اقپارات اگەنتتىگى. ماسەلەن قورداي اۋدانى اكىمدىگىنىڭ باسپا ءسوز قىزمەتىندە وتكەن بريفينگتە ستەپنوە اۋىلدىق وكرۋگىنىڭ اكىمى جۇسىپبەك سپانوۆ «اۋىلداعى ۇلتارالىق كەلىسىمدى نىعايتۋعا باعىتتالعان جۇمىستارى» تاقىرىبىندا بايانداما جاساپ، بۇقارالىق اقپارات قۇرالدارى وكىلدەرى مەن الەۋمەتتىك جەلىلەردەگى تىكەلەي ەفير ارقىلى تۇسكەن سۇراقتارعا جاۋاپ بەردى.

– بۇگىنگى كۇنگە ستەپنوە اۋىلدىق وكرۋگىندە سەگىزدەن استام ۇلت وكىلدەرى تۇرادى. ەتنومادەني بىرلەستىكتەردىڭ جۇمىسىن جانداندىرۋ ماقساتىندا اۋىلدىق وكرۋگتىڭ مادەنيەت ۇيىندە ۇلتارالىق قارىم-قاتىناستى ساقتاۋ، ۇلتتار بىرلىگىن نىعايتۋ، ەتنومادەني بىرلەستىكتەردىڭ جۇمىسىن جانداندىرۋ ماقساتىندا اۋىل تۇرعىندارىمەن «ۇلتارالىق قارىم-قاتىناستى نىعايتۋ، ۇلتتار بىرلىگىن ساقتاۋ» تاقىرىبىندا كەزدەسۋلەر، دوڭگەلەك ۇستەلدەر، سپورتتىق جارىستار، «دوستىق فەستيۆالدەرى» ۇدايى ۇيىمداستىرىلىپ تۇرادى، – دەگەن اۋىل اكىمى حالىق اراسىنداعى بىرلىك پەن بىرەگەيلىكتى ساقتاي وتىرا، كەلەشەك ۇرپاققا وسى قۇندىلىقتاردى ناسيحاتتاۋ، ۇلگى كورسەتۋ، تاربيەلەۋ ماقساتىندا قوعامدىق، اقساقالدار جانە ايەلدەر كەڭەستەرىنىڭ قۇرىلعانىن ايتتى.

سونىمەن قاتار، جوعارىدا اتالعان كەڭەس مۇشەلەرى تاراپىنان ەتنوستاردىڭ ءسالت-داستۇرىن، ءدىني سەنىمدەرىن، ەتنيكالىق ۇستانىمدارىن ناسيحاتتاۋ، بىرەگەيلىك پەن بىرلىكتى نىعايتۋ، پاتريوتتىق سەزىمدى جانداندىرۋ باعىتىندا ءبىرقاتار جۇمىستار جۇرگىزىلگەنىن ءمالىم ەتتى. ونىڭ ىشىندە، 2019 جىلى «پاتريوتتىق ساباقتار»، «ەدينستۆو ناسيي ەدينستۆو نارودا»، «مى درۋجبوي سيلنى» تاقىرىپتارىندا دوڭگەلەك ۇستەلدەر، كەزدەسۋلەر، جيىندار، ال ءبىلىم بەرۋ مەكەمەلەرىندە جاستار اراسىندا دوستىق پەن بىرلىكتى، ءوزارا سۇيىسپەنشىلىكتى ناسيحاتتاۋ ماقساتىندا اشىق ساباقتار وتكىزىلىپتى. قازىرگى تاڭدا ستەپنوە اۋىلدىق وكرۋگى بويىنشا ەتنوسارالىق جانە كونفەسسياارالىق سالاداعى جاعداي تۇراقتى دەپ ءسوزىن قورىتىندىلادى اۋىل اكىمى.

ءيا، ىنتىماعى جاراسقان اۋىلدىڭ اجارى كىرە بەرسىن دەپ تىلەيمىز.