جىلدا ءتىلسىز جاۋدان تالاي جان اجال قۇشىپ جاتقانى بەلگىلى. ال ق ر كونستيتۋسياسىندا ەڭ ءبىرىنشى قۇندىلىق ادام ءومىرى ەكەنى بەلگىلى. وسىعان وراي جامبىل وبلىسى توتەنشە جاعدايلار دەپارتامەنتىنىڭ «ءورت ءسوندىرۋ جانە اۆاريالىق-قۇتقارۋ جۇمىستارى قىزمەتى» مەملەكەتتىك مەكەمەسى ءورت ءسوندىرۋ بولىمشەلەرىنىڭ جۇرگىزۋشىلەر قۇرامىنىڭ اراسىندا كاسىبي شەبەرلىكتەرىن ارتتىرۋ ماقساتىندا، «جىلدامدىق مانيەۆرى بويىنشا ۇزدىك جۇرگىزۋشى» بايقاۋى-كونكۋرسى وتكىزىلدى، دەپ جازادى Qamshy.kz اقپارات اگەنتتىگى.  اتالعان شارانىڭ ماقساتى - جۇرگىزۋشىلەر اراسىندا ءورت ءسوندىرۋ اۆتوكولىگىن باسقارۋعا داعدىلانۋ، تاجىريبە دەڭگەيىن انىقتاۋ بولىپ تابىلادى. جالپى جارىسقا 19 جۇرگىزۋشى قاتىستى.

ءورت ءسوندىرۋ اۆتوكولىگىمەن جۇمىس ىستەۋ ءۇشىن جۇرگىزۋشىدەن قوسىمشا ءبىلىم الۋ تالاپ ەتىلەدى. ءورت ءسوندىرۋ اۆتوكولىگىنىڭ جۇرگىزۋشىسىنە تالاپتاردان باسقا جۇرگىزۋشىنىڭ بىلىكتىلىك سيپاتتاماسىندا قاراستىرىلعان ترانسپورت قۇرالدارىن دارەجەسىنە سايكەس ءورت ءسوندىرۋ اۆتوكولىگىن ءقاۋىپسىز باسقارۋ نەگىزدەرىن، تاكتيكو-تەحنيكالىق سيپاتتامالارىن، تاعايىندالۋىن، قۇرىلىسىن، ارەكەت ەتۋ پرينسيپتەرىن، ارنايى اگرەگاتتارعا قىزمەت كورسەتۋ مەن جۇمىس ىستەۋىن، ءورت ءسوندىرۋ اۆتوكولتەرىندە بەكىتىلگەن اسپاپتار مەن مەحانيزمدەرىن؛ ولاردىڭ جارامسىزدىعىن: بەلگىسى، سەبەپتەرى، ءقاۋىپتى سالدارىن انىقتاۋ جانە قالىپقا كەلتىرۋ ادىستەرىن؛ ءورت ءسوندىرۋ اۆتوكولىكتەرىنىڭ بارلىق تۇرلەرى مەن ماركالارىن باسقارا ءبىلۋى، ارنايى اگرەگاتتار مەن مەحانيزمدەردە جۇمىس ىستەي ءبىلۋى قاجەت.

اتالعان تالاپتاردىڭ بارلىق كريتەرييلەرىن انىقتاۋ ءۇشىن 2 كەزەڭنەن تۇراتىن جارىس رەگلامەنتى بەكىتىلدى. ءبىرىنشى كەزەڭىندە قازاقستان رەسپۋبليكاسى ىشكى ىستەر مينيسترلىگى توتەنشە جاعدايلار كوميتەتىنىڭ مەملەكەتتىك ورتكە قارسى قىزمەت ورگانىنىڭ تەحنيكالىق ۇسىنىس قوسىمشاسىنا سايكەس الدىن الا دايىندالعان جانە بەلگى سالىنعان الاڭدا جىلدامدىق مانيەۆرى جانە ءورت ءسوندىرۋ اۆتوكولىگىن باسقارۋ بويىنشا وتكىزىلدى.

ال ەكىنشى كەزەڭ – تەوريالىق بولىگىندە جۇرگىزۋشىلەر قاۋىمى الدىن الا دايىندالعان بيلەت سۇراقتارى بويىنشا جاۋاپ بەردى. وندا اۆتوكولىكتىڭ تەحنيكالىق سيپاتتاماسىنا بايلانىستى ءبىرشاما ماسەلەلەرگە ەرەكشە كوڭىل بولىنگەن. سونداي-اق، جولدا ءجۇرۋ ەرەجەلەرى دە قامتىلعان. اتالعان شاراعا ىشكى ىستەر دەپارتامەنتىنىڭ وكىلى، پوليسيا كاپيتانى ايدىن ابدراحمانوۆ تا قوناق رەتىندە شاقىرىلدى.

ورىندالعان تاپسىرمالاردىڭ قورىتىندىسى بويىنشا بايقاۋ جەڭىمپازدارى انىقتالدى. ءبىرىنشى ورىندى تاراز قالاسى №1 مامانداندىرىلعان ءورت ءسوندىرۋ ءبولىمىنىڭ جۇرگىزۋشىسى ءاليبي ءابدى ۇلى، ەكىنشى ورىن –تالاس اۋدانى قۇلان اۋىلى №10 ءورت ءسوندىرۋ ءبولىمىنىڭ جۇرگىزۋشىسى ەرسۇلتان باعىلبەكوۆ، ءۇشىنشى ورىندى – تاراز قالاسى №4 ءورت ءسوندىرۋ ءبولىمىنىڭ جۇرگىزۋشىسى ابزال تۇرىسبەكوۆ يەلەندى.