كوكتەم كەپ، كوك مايساسىن توسەگەن بە،
گۇلدەر ولەڭ وقىپ تۇر كوشەلەردە!
جيىرما ءتورت جىل جۇرەگىم جايقالعالى،
قانشا كوكتەم قالدى ەكەن پەشەنەمدە؟!
كوكتەم كەپ، كوگەرتكەن بە اينالانى،
قىز-عۇمىر، قىر باسىندا ويلانادى.
كوبەلەك-كوڭىل قۇرعىر الىپ-ۇشىپ،
كوكتەمنىڭ بۇرىمىنا بايلانادى.
گۇل-الەم، شىمىلدىعىن اشقانى ما،
كوركەمدىك،قوناپ الدى اسپانىما.
ءتۇننىڭ عانا ءيىسى شىعۋشى ەدى-اۋ،
كۇننىڭ ءيىسى ءسىڭىپتى شاشتارىما!
شىنىمەن، قانات ءبىتىپ ۇشقانىم با؟
عاشىق بوپ قالسام قايتەم، قاس-قاعىمدا؟
ءار ساۋلەسىن كەۋدەمە قۇيىپ تۇرمىن،
ايىرباستاپ الا الماي باسقا مۇڭعا.
كوكتەم كەپ كوك مايساسىن توسەگەن بە،
گۇلدەر ولەڭ وقىپ تۇر كوشەلەردە!
***
ءبىر جۇلدىزدىڭ ساۋلەسىنە جالعانىپ،
جەرگە تۇسكەن ءبىر ءومىردى جالعا الىپ.
ساعان عاشىق بولعان ەكەم، قايتەيىن،
بۇيىرماعان تاعدىرىڭا الدانىپ.
...ءبىر وتكىنشى نوسەر بولىپ سەلدەتىپ،
دالا دەرتىن ءمولدىر سۋمەن ەمدەتىپ.
كەتىپ قالسام، ءسونىپ قالسام دەپ ەدىم،
ەشكىم بىلمەس جالعىزدىقتى اندەتىپ...
وشاعىمدا مەنى كۇتكەن جار قالىپ،
ول ادامعا جالعىز ولەڭ ارنالىپ.
وقىپ تۇرسام سەنى سۇيگەن قىزدارعا،
ساعان جازعان ءجۇز ولەڭدى قولعا الىپ!
...سوسىن، سوسىن كىنالاسىن جارىق كۇن،
ءتۇن ىشىنەن تاڭ ىزدەگەن ءعارىپپىن.
اق قاعازعا ارماندارىم توگىلىپ،
كۇندەي ىستىق كۇناھار بوپ قالىپپىن...
****
قارا جەر دە ءجۇر مە مەنى كەشىرمەي،
نەگە كەتتىم ءوز-وزىمدى تۇسىنبەي.
ءبىر اۋىز ءسوز قالاتىنداي ايتىلماي،
ءبىر ۇرتتام سۋ قالاتىنداي ىشىلمەي.
سەنى ءسۇيۋ مەندىك سىردىڭ قۇنى ما؟
سەنى ءسۇيۋ تار عۇمىردىڭ شىنى ما؟
مەن ومىرگە بارا جاتسام جۇتىلىپ،
سەن جۇرەكتىڭ شىعىپ الدىڭ شىڭىنا!
ءبىر سەن ءۇشىن جاراتقانداي كوركىمدى،
ەلەسىڭ كەپ، ۇرلاپ الدى ەركىمدى.
ءبىر-اق جۇتىم اۋا جەتپەي تۇرادى،
ءوزىڭ كەلىپ ەمدەيتىندەي دەرتىمدى...
ءبىر-اق قادام العا باسپاي تۇرامىن،
جارىق عالام، سوندىرەردەي شىراعىن!
كىنام مەنەن كۇنام كەتتى كۇرمەلىپ،
سەن شىعارسىڭ بۇل ومىردە سىناعىم...
***
جالعىز عانا بار ەدى عوي، شىندىعىم،
تۇبىنە تىرلىك جەتتى مە ؟
قاي قيىردا ءجۇر ەكەنسىڭ مۇڭلىعىم،
مەنسىز ءومىر ءتاتتى مە؟
جالعىز عانا بار ەدى عوي ارمانىم،
تەك پەرىشتە كۇيىندە.
بۇل ءومىردىڭ ءبىلىپ تۇرىپ جالعانىن،
بولا ما ەكەن سۇيۋگە...
كەلەر كۇندەر جاۋابى جوق جۇمباقتاي،
قالساق قايتەم ءتۇيىسىپ؟
سەن دە تۇرساڭ، مەن دە تۇرسام ءتىل قاتپاي،
كولەڭكەمىز ءسۇيىسىپ...
كەلەر بولساڭ بۇل شاھاردان كەت الىپ،
(سەن جاقتىڭ دا تاڭى وسىلاي اتا ما؟)
سەنسىز ءومىر سۇرە المايمىن دەپ الىپ،
...ءالى ءتىرى ءجۇر ەكەنمىن و، توبا؟!!!
***
قارا جولدار، سەنى ءسۇيسىن ماڭدايىم،
جۇرەكتەگى ءسابيىمدى الدايىن...
ماعان قاراي اكەلمەسەڭ جەتەلەپ،
ءبىلىپ بەرشى سول ادامنىڭ حال-جايىن...
قاي قيىرعا ءتيدى ەكەن تابانى،
مەكەن ەتىپ، ءجۇر مە وسى قالانى...
جولدار...جولدار...
جىرلارىمدى قۇشاقتاپ،
كوز-جاسىمنان ءۇمىت جاساپ الادى...
اكەلەردەي سول ءبىر جاننىڭ دەرەگىن،
جول بويىنا جاۋتاڭ قاعا بەرەمىن...
كوشەلەردە كوشە الماعان كۇلكىم ءجۇر،
سەنسىز وسى بار ما مەنىڭ كەرەگىم...
ءبىر حابارىڭ جەتەتىندەي ەلەڭدەپ،
عۇمىرىمدى ۇزارتامىن "كەلەر" دەپ.
ساعىنىشىم حاتقا اينالىپ جاۋاپسىز،
سەنەن بۇرىن الار ما ەكەن جەر ەمدەپ...
***
تاعدىرىما جازسام با ەكەن ارىزدى،
جوعالتتىم دەپ، اياۋلىمدى جانى ىزگى...
باسىم، كەۋدەم، جۇرەگىم دە قۇداي-اۋ،
مەنىكى ەمەس ءتارىزدى...
كوزدەرىمنەن مۇڭ اۋىرلاپ كەتكەندەي،
سوزدەرىمنىڭ قۇنى جەرگە شوككەندەي.
سۇرە الاتىن ادام كوپ قوي ءومىردى،
سۇيە الاتىن جان جوق دەپ ەم تەك مەندەي!
جاراتقانعا اۋىر وپكە ايتا الماي،
سەنى سۇيگەن جار جولىمنان قايتا الماي...
تىنىش ۇيىقتاپ ءجۇر مە ەكەنسىڭ تۇندەردە،
جەر ۇستىندە قالاي ءجۇرسىڭ شايقالماي!
ۇنسىزدىگىم شەكسىزدىككە تىعىلىپ،
ءتۇن ىشىنەن تاعى شىقتىم ءتىرىلىپ.
جانارىمنان جىلاپ تۇسكەن ساعىنىش،
كىرپىگىڭە قالدى مە ەكەن ءىلىنىپ...
الدە ونى ءجۇر مە ەكەنسىڭ جاسىرىپ،
قۇلاتۋعا، ۇمىتۋعا اسىعىپ.
ەكەۋمىزدى ءبىر ادامبىز دەپ جۇرگەم،
قاي قيىردا قالدىق ەكەن شاشىلىپ...
***
كوزگە كورىنبەس كۇنالارىمدى،
وقىلماي قالعان دۇعالارىمدى...
اللادان بۇرىن پەندە بىتكەندى،
بەس كۇنگە قيماي سىناعانىمدى...
...وشىرە الام با كەۋدەمنەن؟
ەسىمدى بىلمەس ەسسىز كۇنىمدى،
تۇگەسىلگەن ءتوزىم...كوزسىز مۇڭىمدى...
جاريا ەتىپ...جالعاننان بەزدىم،
قاراڭعى دەدىم، ءسىزسىز عۇمىردى...
وزگەرەرىن ءبارىن كىم بىلگەن؟
"جالعىزبىن" دەپپىن...سەزبەدى جانىم،
ءتۇننىڭ دە تۇنىق كوزدەرى بارىن.
سەزىمگە ۇيىپ سىڭار ەتىپپىن،
وزىمە تىلەپ، وزگەنىڭ باعىن...
كوڭىلدى قالاي سەندىرگەم؟
باعالاي الماي باقىتتارىمدى،
جالعانعا قيىپ جاقۇت-تاڭىمدى.
نۇرىنان كۇننىڭ جاسقاندى ءجۇزىم،
كىم ءبىلسىن...بۇگىن ءعارىپ ءحالىمدى...
جانىمدى شەرگە كوندىرگەن...
قايعىعا بالاپ، شۇكىر كۇنىمدى،
تاعدىرعا تەلگەن بۇكىل مۇڭىمدى...
تىلىمنەن شىققان توعىز كۇنامدى،
ايتىلىپ قالعان كۇپىرلىگىمدى...
وشىرە الام با كەۋدەمنەن؟
دينارا مالىكوۆا
