قازاقستان رەسپۋبليكاسىنىڭ ىشكى ىستەر ءمينيسترى قالمۇحامبەت قاسىموۆتىڭ نازارىنا

كەشە تۇندە الماتى قالاسىنىڭ تۇرعىنى، قىتايدان كەلگەن قانداسىمىز ەرجاننىڭ وتباسى ورىنى تولماس قازاعا ۇشىرادى. ەرجاننىڭ ۇيىندە جوقتىعىن پايدالانىپ، ونىڭ جاقىن اعايىنى 19 جاستاعى ەلمۇرات شەشەنقۇل ۇلى مەن جارى 34 جاستاعى نۇرگۇل مەنەسبايەۆانى ولتىرگەن قانىشەرلەر دالادا ويناپ جۇرگەن 7 جاستاعى سىلامنۇر مەن 3 جاستاعى سىرمۇحاممەتتى ۇيگە شاقىرىپ، تۇنشىقتىرىپ ولتىرگەن. ولار كاسىپكەرلىكپەن اينالىساتىن ەرجاننىڭ ۇيىندە مول اقشا بار دەپ ويلاسا كەرەك، ۇيدەگى شاعىن سەيفتى الىپ ءىز سۋىتقان.

قازىرگى قولدا بار مالىمەتتەرگە سۇيەنسەك، كۇدىكتىلەر 1983 جىلى تۋىلعان ءبىر وزبەك ازاماتى مەن 25 جاستار شاماسىنداعى ەكى تالدىقورعاندىق جىگىت. ەرجاننىڭ ۇيىندە ەۋرورەمونت جاساپ جۇرگەن ولار سەيفتى كوكتوبە ماڭىندا ءبىر ۇيگە اپارىپ، اشپاق بولىپ جاتقان جەرىنەن تۇتقىندالعان.

بۇل سۇمدىق وقيعانى ەستىگەن الماتىداعى اعايىندار مەن قىتايداعى قانداستارىمىز قازاق قوعامىنداعى مۇنداي قاتىگەز قىلمىستاردىڭ كۇن ساناپ كوبەيىپ كەلە جاتقانىنا الاڭداۋلى. قازالى وتباسىنا كوڭىل ايتقالى بارعان قاراپايىم جۇرت قازاقستاندا ءولىم جازاسىنا ماراتوريي جاريالانۋىنا بايلانىستى ءدال وسىنداي ادام توزگىسىز قىلمىستاردىڭ جيىلەپ كەتكەندىگىن ايتادى.

ءبىزدىڭ جۋرناليستەر قاۋىمىنان كەلگەنىمىزدى بىلگەن جۇرت قانىشەرلەردىڭ قاتاڭ جازالانۋىن سۇراپ، ەگەر ءتيىستى جازاسىن الماسا ەل بولىپ قىلمىستىلاردان قاندى كەگىن الاتىندىقتارىن ايتىپ وتىر. قارشاداي سابيلەردىڭ جازىقسىز ءولىمى كىم-كىمنىڭ دە جۇرەگىن قان جىلاتادى.

ەتەكتەرى جاسقا تولعان مارقۇمداردىڭ تۋىستارى قازاقستان رەسپۋبليكاسىنىڭ ىشكى ىستەر ءمينيسترى قالمۇحامبەت ءقاسىموۆتىڭ بۇل وقيعاعا تىكەلەي نازار اۋدارۋىن جانە بولاشاقتا وسىنداي قاندى قىلمىستاردىڭ بولۋىن ازايتۋ ءۇشىن قازاقستاندا ءولىم جازاسىنىڭ قالپىنا كەلتىرىلۋىن  سۇرايدى. مۇنداي پىكىردى سوندا جينالعان قارا ورمان حالىق قۇپتاپ وتىر.

ايدىڭ-كۇننىڭ امانىندا ەرتەڭ ەل تىزگىنىن ۇستايتىن سىلامنۇر، سىرمۇحاممەت سياقتى سابيلەرىمىزدى ءومىردىڭ ەسىگىن اشپاي جاتىپ، قانىپەزەلەردىڭ قۇربانىنا اينالدىرساق ەلدىڭ ەرتەڭى نە بولماق؟!

ەگەر، وسى بەتىمىزبەن كەتە بەرسەك، كەز كەلگەن قازاقتىڭ وتباسىندا وسىنداي قۇلاق ەستىمەس وقيعانىڭ ورىن الماسىنا كىم كەپىل؟ قاسيەتتى قۇراننىڭ وزىندە بىرەۋدىڭ مۇرىنىن كەسكەن ادامنىڭ مۇرىنىن كەسۋ كەرەكتىگىن، ەش جازىقسىز بىرەۋدى ولتىرگەن ادامدى ءولتىرۋ كەرەكتىگى ايتىلعان. سوندىقتان ادام ولىمىنە قاتىستى جۇرتتىڭ جاعاسىن ۇستاتقان وسىنداي قىلمىستارعا، ار-ۇياتتان جۇرداي بولعان قىلمىسكەرلەرگە ەشقانداي اياۋسىز جازا بەرۋ كەرەك. ول جازا – ءولىم!

ەرتەڭ، ياعني ماۋسىمنىڭ 13-ى كۇنى ساعات 10.00-دە ماقاتايەۆ كوشەسى مەن قونايەۆ كوشەلەرىنىڭ قيىلىسىندا مارقۇمداردىڭ جەرلەۋ ءراسىمى وتەدى.

qamshy.kz