بريتاندىق  «The Independent» باسىلىمى قازاقستاندىق “استانا” كومانداسىن اۋعانستاندىق  كلۋب دەپ جاريالاپ، كەيىن وسى قاتەلىگى ءۇشىن كەشىرىم سۇرادى. ال، تانىمال نەمىس فۋتبولشىسى لۋكاش پودولسكي قازاقستاندى كەلەكەگە اينالدىردى. بۇل تۋرالى "قامشى" پورتالى  NUR.KZ -كە سىلتەمە جاساي وتىرىپ حابارلايدى.

باسىلىم Manchester Unitedء-تىڭ ءساتتى جانە ءساتسىز قارسىلاستارىنىڭ ءتىزىمىن جاريالاعان. “استانا” بريتاندىق كوماندا ءۇشىن جەڭىل قارسىلاستاردىڭ تىزىمىنە كىردى.

ماقالادا “استانا” – اۋعانستاننان چەمپيوندار ليگاسىنىڭ پلەي-وفف كەزەڭىنە وتكەن العاشقى كوماندا دەپ جازىلعان.

فۋتبولدان گەرمانيا قۇراماسى مەن “گالاتاساراي” كلۋبىنىڭ ويىنشىسى لۋكاش پودولسكي “بورات ەلىنە” كەلۋگە دايىن ەكەنىن ايتىپ، قازاقستاندى كەلەمەجدەدى. موناكودا چەمپيوندار ليگاسىنىڭ جەرەبە تارتۋ ءراسىمى اياقتالعان سوڭ، تۇركيانىڭ “گالاتاساراي” كلۋبى “بەنفيكا”، “اتلەتيكو” جانە “استانامەن” ءبىر توپقا تۇسكەنى انىقتالدى.

وسىدان سوڭ، تۇركيالىق كوماندانىڭ ويىنشىسى “استانانى” كەلەمەجدەپ، تۆيتتەرگە اتىشۋلى بوراتتىڭ سۋرەتى بار جازباسىن جاريالادى.

فۋتبول ويىنشىسى ءوز پاراقشاسىنا “اسىعا كۇتەمىن” دەگەن سىڭايدا جازبا قالدىرعان.

ەسكە سالا كەتەيىك، پودولسكي ەۋروپا چەمپيوناتىنا ىرىكتەۋ كەزەڭى اياسىندا استاناعا كەلىپ، قازاقستان قۇراماسىنا قاتىستى ويىن وتكىزگەن بولاتىن.

گۇلدەن ءابدىباقىت