قوستانايمەن كورشى چەليابى وبلىسىنداعى ماسكەۋ-چەليابى تاس جولىنىڭ بويىندا التى اۆتوموبيل قاقتىعىسقان ءىرى جول-كولىك اپاتى ورىن الدى. سونىڭ سالدارىنان 6 ادام قازا تاپتى. بۇل تۋرالى "قامشى"  پورتالى egemen.kz-كە سىلتەمە جاساي وتىرىپ حابارلايدى.

 كولىكتەردىڭ اراسىنداعى Volvo جۇك كولىگىندە 1986 جىلى تۋعان قازاقستاندىق بولعان.  DAF جۇك كولىگىنىڭ جۇرگىزۋشىسى قورعان وبلىسىنىڭ تۇرعىنى، 1966 جىلعى ازامات تىزگىنە يە بولا الماي، چەليابى وبلىسىنىڭ 1992 جىلى تۋعان تۇرعىنى جۇرگىزىپ كەلە جاتقان KIA Carens، كراسنويارسك وبلىسىنىڭ 1976 جىلى تۋعان تۇرعىنى جۇرگىزىپ كەلە جاتقان Honda Freed اۆتوموبيلدەرىنە سوقتىعىسادى، سونىڭ سالدارىنان ماشينالار جولدان تومەنگە ۇشىپ كەتەدى.

مۇنان كەيىن DAF جۇك كولىگى ۆاز-2115، Mitsubishi Pajeroجانە Ford Focus جەڭىل ماشينالارىنا سوقتىعىسادى، ءتورت ماشينا بارىپ، رولىندە قازاقستاندىق ازامات كەلە جاتقان Volvo جۇك ماشيناسىنا سوقتىعىسادى. سوڭىندا بارلىق 4 ماشينا وتقا ورانادى. 

 اپاتتىڭ سالدارىنان ۆاز-2115 كولىگىندەگى 4 جولاۋشى، Mitsubishi Pajero كولىگىنەن ەكى ادام سول جەردە قازا بولدى. KIA ماشيناسىنىڭ جۇرگىزۋشىسى مەن Honda كولىگىنىڭ جولاۋشىسى ءتۇرلى جاراقاتتارمەن اۋرۋحاناعا جەتكىزىلەدى. 

الدىن الا مالىمەتتەرگە قاراعاندا، قايعىلى ءىرى اپاتقا DAF جۇك كولىگى تەجەگىشىنىڭ ىستەن شىعۋى سەبەپكەر بولسا كەرەك. قازاقستاندىق ازاماتتىڭ ءولى-تىرىسى، كىم ەكەندىگى جونىندە مالىمەت جوق.

"قامشى" سىلتەيدى