وكىنىشتى. الەم سپورتشىلارىنىڭ سايقىمازاق ساشانىڭ (بورات كەيىپكەرىن) قازاقستاندى كەلەمەجدەۋ ءۇشىن الەۋمەتتىك جەلىلەردى پايدالانۋى قالىپتى جاعدايعا اينالىپ كەتكەندەي. اشىقتان- اشىق نامىسىمىزدى اياققا تاپتاپ، مەملەكەتىمىزدى مازاققا اينالدىرىپ جاتسا دا، ءبىزدىڭ قۇزىرلى ورگانداعىلار ءلام-ميم دەپ جاق اشپاۋى- كۇدىك تۋدىراتىنى جاسىرىن ەمەس.

جاقىندا قازاقستاندىق كاسىپقوي بوكسشى گەنناديي گولوۆكيننىڭ كەزەكتى قارسىلاسى، ورتا سالماقتاعى IBF چەمپيونى داۆيد لەمە ءوز تۆيتتەر اككاۋنتىنا بوراتتىڭ فوتوسىن جۇكتەگەن. كانادالىق سپورتشى گولوۆكينمەن جەكپە-جەگى الدىندا وسىلاي ازىلدەمەك بولعان-مىس.

“حالايىق، وسى ۋاقىتقا دەيىن مىنا جىگىت (بورات – رەد. ەسكەرتپەسى) كەلمەي تۇرىپ، قازاقستاندى بىلدىك دەپ وزگەلەردى الداماي-اق قويىڭدار.  GGG ودان كەيىن كەلدى (جاي قالجىڭ، رەنجىپ جۇرمەڭدەر)”، – دەپ جازعان بوكسشى.

بۇل الەمدىك دەڭگەيدەگى سپورت جۇلدىزدارىنىڭ قازاقستاندى جانە قازاقستاندىقتاردى كەلەمەجدەگەن العاشقى جازبا ەمەس.

وسىدان بىرنەشە كۇن بۇرىن، تۇركيالىق «گالاتاساراي» فۋتبول كلۋبىنىڭ ويىنشىسى، شىققان تەگى نەمىس لۋكاش پودولسكيي ءوزىنىڭ تۆيتتەرىنە بوراتتىڭ سۋرەتىن جۇكتەپ ازىلدەگەن بولاتىن. ءازىلىنىڭ ارتى حالىقارالىق جانجالعا ۋشىعىپ كەتە جازداعان نەمىس فۋتبولشىسى دەرەۋ كەشىرىم سۇراعان ەدى.

سونىمەن قاتار، فينليانديالىق «حيك» كومانداسى دا قازاقستاندىق جانكۇيەرلەردى بوراتتىڭ ءتۇرىن باسقان، جالاڭاش دەنەسىنىڭ سۋرەتىمەن اشۋلاندىرعانى ءالى ەسىمىزدە.

2012 جىلى كۋۆەيتتە نىسانا كوزدەۋدەن ءوتىپ جاتقان چەمپيوناتتا قازاقستاندى الەمگە ماسقارا ەتكەن وقيعا ورىن الدى. جارىستا ءبىرىنشى ورىن العان جەرلەسىمىز ماريا دميترەنكونى ماراپاتتاۋ كەزىندە قازاقستان گيمنىنىڭ ورنىنا بريتاندىق سايقىمازاق ساشا بارون كوەننىڭ «بورات» فيلمىندە ايتىلعان ءان ورىندالعان. 

ودان قالسا، الماتى مەن استانادا وتكەن قىسقى ازيادا كەزىندە كوك تۋىمىز اياققا تاپتالىپ، مازاق بولىپ ەدىك.
سوسىن پاريجدە وتكەن اۋىر اتلەتيكادان الەم چەمپيوناتىندا ەلىمىزدىڭ سپورتشىسى زۋلفيا چينشانلو التىننان القا تاققاندا، قازاقستاننىڭ ەسكى ءانۇرانى شىرقالىپ، تاعى ءبىر ماسقارامىز شىققان. بۇعان دا قىڭق دەگەن قۇزىرلى ورگان جوق.
قوستانايداعى شاڭعى فەستيۆالىنىڭ اشىلۋ سالتاناتىندا دا ءانۇراننىڭ ورنىنا ءانشى ريكي ءمارتيننىڭ «Livin 'La Vida Loca» دەگەن ءانى ويناعانى الەمگە جاريا بولدى.
ول از دەسەڭىز، جاقىندا وسى قوستانايداعى وقيعانى ءسوز ەتىپ تۇرىپ تاعى ءبىر سايقىمازاق - ينتەرنەت-شوۋ جۇرگىزۋشىسى ستاس داۆىدوۆ دەگەن بىرەۋ قازاقستان ءانۇرانىن دورەكى سوزدەرمەن ("ەتو دەرمو ي ەست گيمن كازاحستانا؟" دەيدى) مىسقىلدادى. 
ءبىر اقيقاتى  قانشا مارتە مەملەكەتتىك رامىزدەرىمىز قورلانىپ، مەملەكەتىمىزدى اشىق ماسقارالاپ جاتسا دا،  اتالعان وقيعالارعا سەبەپكەر بولعانداردى قاتاڭ جازالاۋعا قۇدىرەتىمىز جەتكەن ەمەس. كەرىسىنشە، ءوزىمىزدىڭ قازاقستاندى ازامات «كوك تۋدى» كوككە كوتەرىپ، پاتريوتتىقتىڭ ناعىز ۇلگىسىن كورسەتىپ جاتسا، ءبىزدىڭ شاش ال دەسە باس الاتىن پوليسيا 300 مىڭداپ ايىپپۇل سالادى. بۇل قازاقستاندىق پوليسەيلەردىڭ اتىنا جاعىلعان داق كوپكە دەيىن وشە قويماس.

بريتاندىق سايقىمازاق ساشا بارون كوەننىڭ «بورات نەمەسە قازاقستان حالقىنىڭ مارتەبەسى ءۇشىن امەريكاداعى مادەني زەرتتەۋلەر» اتتى ءفيلمى قازاقستان تەرريتوريسىندا تىيىم الىنعان فيلمدەر تىزىمىنە ەنگەنىمەن، الەم مەملەكەتتەرىندە ەركىن اينالىمعا شىققان. قازاقستاندى كۇللى الەمگە اشىق ماسقارالاعان بريتاندىق «كلوۋن» اناۋ-مىناۋ ەمەس، «التىن گلوبۋس»  جۇلدەسىنە يە بولعان.

مۇنىمەن قاتار، تانىمال بريتاندىق «The Guardian» باسىلىمى 2014 جىلى  “پوستكەڭەستىك الەم: 15 مەملەكەت جايىندا نە ءبىلۋ قاجەت” دەگەن ماقالاسىندا بورات پەن شىڭعىسحاندى ەڭ تانىمال قازاقتار دەپ كورسەتكەن.

ال قازاقستاندىق كاسىپقوي بوكسشى گەنناديي گولوۆكيننىڭ ءوزى بولسا، «تۋىندىداعى ازىلدەر ورىنسىز جانە اقىل-ەسى دۇرىس ادامنىڭ ىس-ارەكەتىنە جاتپايدى. ول قازاقستان ەمەس. ناعىز قازاقستان مۇلدەم باسقا»،-دەگەن.
ال، فرانسيالىق «پاريزيەنت» گازەتى «قازاق رەجيسسەرى ە.راقىشيەۆ «بوراتتىڭ» جالعاسىن تۇسىرمەك» دەپ جازادى. جاڭادان تۇسىرىلەتىن ءفيلمنىڭ باستى كەيىپكەرى – امەريكاندىق، تەز ەلىگۋگە بوي الدىرعىش بورات قازاقستانعا ساپارمەن كەلەدى. ول الدىمەن «قازاق جەرى شولەيت دالا، ءارى ءبىر ارتتا قالعان، بۇراتانا حالىقتىڭ مەكەنى» دەگەن ويدا بولادى. ءبىراق ول داۋلەتى شالقىعان جانە مۇنايعا باي مەملەكەتكە تاپ بولىپ، تاڭ قالادى، دەپ جازادى باسىلىم. 

ءجا، جوعارىداعى ءبىز اتاپ وتكەن كەلەڭسىزدىكتەردىڭ بىردە-بىرەۋى ءوز ءتيىستى جازالارىن العان ەمەس. الدىمەن ايىزىن قاندىرىپ ابىرويمىزدى ايرانداي توگەدى دە، ارتىنان كەشىرىم سۇراپ قۇتىلادى. بۇل نە باسىنعاندىق؟! ءسىرا، ءبىزدىڭ تۇقىم-قانىمىزدا مۇنداي بولماسا كەرەك ەدى...

كانادالىق بوكسشى دا  گولوۆكيننىڭ شامىنا تيەمىن دەپ بۇكىل قازاقستان جۇرتىنىڭ نامىسىنا تيگەنىن اڭعارماسا كەرەك-تى. ال ق ر سىرتقى ىستەر مينيسترلىگى بۇنداي ماسقارالاۋلارعا نەگە ۇنسىزدىك تانىتىپ وتىر؟  كەزىندەگى رەسەي ساياساتكەرلەرى جيرينوۆسكيي، ليمونوۆ سەكىلدى قازاقستاندى جوققا شىعارعاندارعا قولدانىلعان جازا، «نون گرانتا پەرسونا»  پودولسكيي، لەمەلەرگە نەگە قولدانىلمايدى؟  تاعى دا «جاۋ كەتكەن سوڭ، قىلىشىڭدى بوققا شاپتىڭ» كەرىن كەتىرىپ وتىرا بەرەمىز بە؟

نۇرگەلدى ءابدىعاني ۇلى