الماتى. قامشى پورتالى - اقتاۋدا جاستارعا ارنالعان ءۇش كۇندىك «Aktau Open Fest» حالىقارالىق فەستيۆالى اياقتالدى. اتا زاڭىمىزدىڭ 20 جىلدىعىنا ارنالعان شارانى ءۇش كۇندە 60 مىڭداي ادام تاماشالادى. 

فەستيۆالگە ەلىمىزدىڭ ونەرلى جاستارىمەن قاتار، فرانسيا، كورەيا، تاجىكستان، رەسەي مەن تۇرىكمەنستاننان قوناقتار كەلىپ، كەرەمەت شوۋ كورسەتتى. ولار برەيك-دانس، پاركۋر، ستريتبول جانە باسكەتبول سياقتى كوشە بيلەرى مەن سپورتتىڭ 7 ءتۇرى بويىنشا ءوزارا مىقتىنى انىقتادى.

اقتاۋدا AKTAU OPEN FEST 2015 اتتى حالىقارالىق مۋزىكا جانە سپورت فەستيۆالى اياسىندا برەيك-دانس بويىنشا الەم چەمپيوناتى ءۇشىن ىرىكتەۋ كەزەڭى ەنگەن بولاتىن. وعان تاجىكستاننان، وزبەكستاننان جانە قازاقستاننىڭ بارلىق دەرلىك وڭىرلەرىنەن كەلگەن سپورتشىلار قاتىستى. 

تۋرنير جەڭىمپازدارى رەتىندە استانادان كەلگەن ەگىزدەر، «23 Style» كومانداسىنىڭ قاتىسۋشىلارى ادىلەت جانە داۋلەت اناربەكوۆتەر تانىلدى. 

«بۇرىن ءبىز «Simple system» كومانداسىنىڭ قۇرامىندا ونەر كورسەتكەن ەدىك. جەڭىسكە جەتۋ ءۇشىن وتە كوپ جاتتىقتىق. ماڭعىستاۋ وبلىسىنىڭ اكىمدىگىنە چەمپيوناتتى ۇيىمداستىرعانى، وڭتۇستىك كورەياعا بارۋعا مۇمكىندىك بەرگەنى ءۇشىن زور العىس ايتامىز. ءبىز جەڭىسكە قول جەتكىزەمىز! بۇل ءبىز ءۇشىن برەيك-دانس بويىنشا ءۇشىنشى الەم چەمپيوناتى بولماق»، - دەيدى ادىلەت اناربەكوۆ.

بۇل ماڭعىستاۋ وڭىرىندە ءوتىپ جاتقان الەم چەمپيوناتىنا ءۇشىنشى ىرىكتەۋ كەزەڭى. ونىڭ العاشقىسى 2010 جىلى جاڭاوزەن قالاسىندا وتكەن بولاتىن. سايىسقا بارلىعى 80 ادام قاتىسۋدا.

سونداي-اق، جاعالاۋدا ورتالىق ازيا سپورتشىلارى اراسىندا برەيك-بيىنەن الەم چەمپيوناتىنىڭ ىرىكتەۋ كەزەڭى ءوتتى. جۇزدەن جۇيرىك شىققاندار وڭتۇستىك كورەيادا وتەتىن الەم بىرىنشىلىگىنە قاتىسپاق.

سونىمەن قاتار، AKTAU OPEN FEST 2015 جاستار سپورتى فەستيۆالىنىڭ ۇيىمداستىرۋشىلارىنا گراففيتي ستيلىندە جۇمىس جاسايتىن جەرگىلىكتى سۋرەتشىلەر سەرگەي رۋدەنكو مەن الەكساندر پريحودكو اۋماعى 103 شارشى مەتر سۋرەتتى تارتۋ ەتتى.

سۋرەت 3D فورماتىندا ورىندالعان. 

«كومپيۋتەرلىك گرافيكا كومەگىمەن 3D ستيلىندە سۋرەت سالۋدىڭ وڭايلاتىلعان ءتاسىلىن ويلاپ تاپتىم. ءارى، ونىڭ ءتيىمدى ەكەنىنە كوز جەتكىزدىم. دوس سۋرەتشىلەردى تارتا وتىرىپ، جوبانى قولعا الدىق. فەستيۆال لوگوتيپىن سالۋعا شەشىم قابىلداپ، سۋرەتىن ازىرلەدىك. بۇل يدەيانى شارا ۇيىمداستىرۋشىلارىمەن بىرلەسىپ تالقىلاپ، كولەمىن ناقتىلادىق. سۋرەتتى سالۋعا ءبىر ايداي ۋاقىت جۇمسادىق»، - دەيدى سەرگەي رۋدەنكو.

سۋرەتشىنىڭ ايتۋىنشا، سۋرەتتى سالۋدا ونىڭ ەكى جازىقتىقتان تۇراتىنى قيىندىق تۋدىرعان. 

وسىنداي كوركەم تۋىندىنى دۇنيەگە اكەلۋگە كاتيا پوناماريەۆا، ۆلاديمير ۆيالكوۆ، كونستانتين باسكاكوۆ، مارينا دەمچەنكو ءتارىزدى ونەر يەلەرى ءوز ۇلەستەرىن قوسقان. ولاردىڭ ايتۋىنشا، سۋرەتتى سالۋعا ءتۇرلى ءتۇستى 98 بوياۋ باللوندارى قاجەت بولعان. 

«بۇل تۋىندىعا ءبىز كۇشىمىز بەن قاراجاتىمىزدى عانا جۇمساعان جوقپىز، ونى بار جان-تانىمىزبەن سالدىق. تۇرعىندارعا ۇناپ جاتسا، قۋانىشتىمىز»، - دەيدى شەبەرلەر.

فەستيۆال اياسىندا دۇنيەجۇزىنىڭ ايگىلى كوشە ءبيىنىڭ مىقتىلارى جاستارعا شەبەرلىك ساباقتارىن وتكىزدى. Aktau Open Fest مەرەكەسى وسىمەن ءۇشىنشى جىل قاتارىنان ۇيىمداستىرىلىپ وتىر.