بۇگىن  اقتاۋ قالاسىندا حيميا-بيولوگيا باعىتىندا ءبىلىم بەرەتىن نازاربايەۆ زياتكەرلىك مەكتەبىنىڭ اشىلۋ ءراسىمى ءوتتى. سالتاناتتى شاراعا ماڭعىستاۋ وبلىسىنىڭ اكىمى اليك ايداربايەۆ، اقتاۋ قالاسىنىڭ اكىمى سەرىكباي ترۇموۆ، ساياسات جانە قوعام وكىلدەرى، ۇستازدار، وقۋشىلار مەن اتا-انالار جانە ب ا ق وكىلدەرى قاتىستى.

نازاربايەۆ زياتكەرلىك مەكتەپتەرىنىڭ اشىلۋى مەملەكەت باسشىسىنىڭ باستاماسىمەن قولعا الىنعان «20 زياتكەرلىك مەكتەپ» مەملەكەتتىك باعدارلاماسىنىڭ اياسىندا جۇزەگە اسقان بولاتىن. ەڭ العاش فيزيكا-ماتەماتيكا باعىتىندا ءبىلىم بەرەتىن نازاربايەۆ زياتكەرلىك مەكتەبى 2009 جىلى استانا قالاسىندا اشىلدى. بۇگىندە رەسپۋبليكا بويىنشا 19 زياتكەرلىك مەكتەپ جۇمىس ىستەيدى.

اقتاۋ قالاسىنداعى نازاربايەۆ زياتكەرلىك مەكتەبى 720 ورىنعا ارنالعان. عيماراتتا جاڭا وقۋ قۇرالدارىمەن جابدىقتالعان 54 وقۋ كابينەتى، 24 لابوراتوريا ورنالاسقان. مەكتەپتە حيميا-بيولوگيا، فيزيكا-ماتەماتيكا، ينتەگراسيا، تەحنيكالىق مودەلدەۋ كابينەتتەرى، نانو-بيوتەحنولگوگيا، روبوتەحنيكا لابوراتورياسى مەن اقپاراتتىق بولمە جۇمىس ىستەيدى.

سونىمەن قاتار، مەكتەپ تەلەستۋدياسى وقۋشىلاردىڭ شىعارماشىلىق جانە عىلىمي قابىلەتىن ارتتىرۋعا ارنالعان. ۇستازداردىڭ وقۋ پروسەسسىن جۇيەلەرىمەن، مۋلتيمەديالىق كابينەتتەرمەن، زاماناۋي كومپيۋتەرلىك تەحنيكامەن، ينتەراكتيۆتى ەلەكتروندى تاقتالارمەن، جىلدام ينتەرنەت جۇيەسى جانە يننوۆاسيالىق باعدارلاما قۇرالدارىمەن قامتىلعان.

 زياتكەرلىك مەكتەپتە ءۇش زالدان تۇراتىن كىتاپحانا جۇمىس جاسايدى. العاشقى وقۋ جىلىندا وقۋشىلار مەن ۇستازدارعا 6-7 مىڭ كىتاپ قولجەتىمدى بولسا، كەلەسى جىلى كىتاپحاناداعى كىتاپ قورى 20 مىڭ داناعا دەيىن تولىعادى دەپ كۇتىلۋدە. كىتاپحانادا قازاق، ورىس جانە اعىلشىن تىلدەرىنەن باسقا جۇڭگو، فرانسۋز، نەمىس تىلىندەگى كىتاپتار بار.

اتالعان مەكتەپ ەكى سپورت زالىنان تۇراتىن سپورتتىق-ساۋىقتىرۋ بلوگى بار. وقۋ عيماراتى جانىندا فۋتبول، ۆوللەيبول، ءارتۇرلى جەڭىل اتلەتيكامەن اينالاسۋعا ارنالعان الاڭدار، تەننيس كورتى  مەن بالالار دەمالىسى ءۇشىن ارنايى بولىنگەن ورنى بار جاڭا سپورت كەشەنى ورنالاسقان.

قازىرگى تاڭدا اتالعان مەكتەپكە 477 وقۋشى قازاقستان رەسپۋبليكاسىنىڭ ءبىرىنشى پرەزيدەنتىنىڭ «وركەن» ءبىلىم گرانتىنىڭ يەگەرى اتانىپ، ولارعا ىرىكتەۋ كەزەڭدەرىنەن وتكەن 80-نەن استام ءمۇعالىم ساباق بەرەتىن بولادى. 

دەرەككوزى: اقتاۋ قالاسى اكىمىنىڭ رەسمي سايتى