"برازيليانىڭ نوۆو-گامبۋرگ قالاسىندا "MOSTRATEC" اتتى 35ء-شى حالىقارالىق ءبىلىم كورمەسىنىڭ اياسىندا وتكەن عىلىمي جوبادا اتىراۋلىق وقۋشىلار جۇلدەلى ورىنعا يە بولدى" دەپ حابارلادى اتىراۋ وبلىستىق ءبىلىم بەرۋ باسقارماسىنىڭ باسپا ءسوز قىزمەتى. 

يدەيالار مەن تەرەڭ زەرتتەۋ جۇمىستارىنىڭ باسىن قوسقان دوداعا  35 ەلدىڭ 752 ۇمىتكەرى قاتىستى. ولاردىڭ قاتارىندا قازاقستان مەكتەپتەرىنەن 25  وقۋشى بار. سونىڭ ىشىندە اتىراۋ وبلىسى دارىندى بالالارعا ارنالعان مامانداندىرىلعان مەكتەپ-ليسەي-ينتەرناتىنىڭ ەكى وقۋشىسى توپ جارىپ، جەڭىمپازدار قاتارىنان كورىندى. 

اتاپ ايتقاندا، 11-سىنىپ وقۋشىلارى اقبوتا جۇباتقان  ماتەماتيكا پانىنەن ءى ورىندى يەلەنسە، ايدانۋر دەميردجي تاريح پانىنەن ءىىى ورىن الدى. 

اقبوتا جۇباتقاننىڭ ايتۋىنشا، ولار ءوز جوبالارىن اعىلشىن تىلىندە قورعاعان.

– جازدىڭ اياقتالۋىنا ون شاقتى كۇن قالعان كەزدە مەنىڭ سىنىپ جەتەكشىم “Mostratec” اتتى حالىقارالىق عىلىمي جوبالار جارىسى بولاتىنىن حابارلاعان بولاتىن. مىنە، سول كۇننەن باستاپ مەن دايىندالا باستادىم. پاندەمياعا بايلانىستى قاشىقتان وتكىزىلگەنىنە قاراماستان سايىس وتە قىزىقتى جانە تاجىريبەگە تولى بولدى. بايقاۋ «Jitsi meet» اتتى ۆيدەو كونفەرەنسيالارعا ارنالعان ءموبيلدى قوسىمشانىڭ كومەگىمەن ءوتتى. مەن ءۇشىن بۇل دودا ۇمىتىلماستاي بولدى، كوپ تاجىريبە الدىم، – دەيدى ول. 

جەڭىمپازداردى جوباعا قىزدار ليسەيىنىڭ بەيىندى وقۋ ءىسىنىڭ مەڭگەرۋشىسى وكسيۋز راحمان مەن اتىراۋ ۋنيۆەرسيتەتىنىڭ ءمۇعالىمى، ماتەماتيكا ءپانىنىڭ كانديتاتى اققابىل ابيروۆ دايىنداعان.