تالاي جىلدان بەرى قازاقستاندىق قوعامنىڭ قىزۋ تالقىسىنا ءتۇسىپ كەلگەن بايقوڭىرداعى قازاق مەكتەپتەردىڭ پروبلەماسى اقىرى وڭ شەشىمىن تاپتى. «جۇلدىزدى قالاداعى» 6 قازاق مەكتەبى ەلىمىزدىڭ ءبىلىم بەرۋ ستاندارتىنا كوشتى، – دەپ حابارلايدى «قامشى» پورتالى www.qazaquni.kz  سايتىنا سىلتەمە جاساي وتىرىپ. بۇل تۋرالى قازاقستاندىق باق-قا وبلىس باسشىسىنىڭ باسپا ءسوز قىزمەتى مالىمدەگەن.

ەستەرىڭىزدە بولسا، بىلتىرعى جىلى ورتالىق كوممۋنيكاسيا قىزمەتىنىڭ بريفينگىندە قىزىلوردا وبلىسىنىڭ اكىمى قىرىمبەك كوشەربايەۆ وسى ءبىر تۇيتكىلدى ماسەلەنى وتكىر كوتەرىپ، قوعامدا ۇلكەن تالقىلاۋعا تۇسكەن بولاتىن.

“قازاقتىڭ بالالارى قازاق مەكتەبىندە كىتاپ بەتىن اشادى دا مەنىڭ پرەزيدەنتىم پۋتين دەيدى. ولاردىڭ بولاشاعى قالاي قالىپتاسادى؟ ولاردان قانداي پاتريوت، قانداي ازامات شىعادى؟ ەكىنشى ءبىر پروبلەماسى بار. ولار ءبىزدىڭ ۇبت-عا قاتىسا المايدى. سونىڭ كەسىرىنەن قازاقستاننىڭ جوعارعى وقۋ ورىندارىنا تۇسە المايدى. ولاردىڭ زاڭدى قۇقىقتارىنا شەكتەۋ. ءبىز بۇل ماسەلەنى شەشۋىمىز كەرەك”، – دەگەن بولاتىن.

(سۋرەت)

ال بيىلعى جىلدىڭ شىلدە ايىندا ق.كوشەربايەۆ مىرزا « «بايقوڭىر قالاسىنداعى مەكتەپتەرىمىزدى قازاقستاندىق ستاندارتقا كوشىرۋ ماسەلەسى وڭ شەشىمىن تابۋدا. جىل اياعىنا دەيىن ەكى ەلدىڭ ءبىلىم جانە عىلىم مينيسترلىكتەرى اراسىندا بارلىق قاجەتتى قۇجاتتارعا قول قويىلادى دەگەن سەنىمدەمىن. ءسويتىپ، 2015 جىلدان باستاپ بايقوڭىرلىق مەكتەپتەر ءبىزدىڭ ەلدىڭ ستاندارتى بويىنشا جۇمىس ىستەيتىن بولادى»، - دەگەن بولاتىن. 
قىرىمبەك كوشەرباييەۆ بەرگەن ۋادەسىندە تۇردى. 2015 جىلدىڭ 1-قىركۇيەكتەن باستاپ بايقوڭىرداعى 6 قازاق مەكتەبى ءوزىمىزدىڭ ءبىلىم بەرۋ ستاندارتىمەن جۇمىس ىستەيدى. بيىلعى وقۋ جىلىندا 642 بايقوڭىرلىق ءبۇلدىرشىن جوعارىداعى مەكتەپتەردىڭ ءبىرىنشى سىنىبىنا بارعان.

№277 ك.توقمۇحامەدوۆ اتىنداعى مەكتەپتە وتكەن «العاشقى قوڭىراۋ» سالتاناتىندا وبلىس اكىمى قىرىمبەك كوشەربايەۆتىڭ ءوزى قاتىسىپ، ەلباسىنىڭ اتىنان ءبىرىنشى سىنىپ وقۋشىلارىنا «مەنىڭ وتانىم – قازاقستان» اتتى ق ر پرەزيدەنتى نۇرسۇلتان ءابىش ۇلىنىڭ كىتابىن تابىس ەتكەن.

“بيىلعى وقۋ جىلى بارشامىزعا ۇلكەن قۋانىشپەن باستالىپ وتىر. ويتكەنى رەسەيدىڭ وقۋ ستاندارتىنا ءوتىپ كەتكەن قازاق مەكتەپتەرىن وزىمىزگە قايتارىپ الدىق. بۇگىننەن باستاپ وسىنداعى 6 قازاق مەكتەبى وتاندىق ءبىلىم بەرۋ جۇيەسىمەن جۇمىس ىستەيدى. بۇل تاۋەلسىز ەلىمىز ءۇشىن جانە وسىنداعى قاراكوز بالالارىمىزدىڭ بولاشاعى ءۇشىن ماڭىزدى”،- دەدى ق.كوشەربايەۆ.

اتا-انالاردىڭ دا قۋانىشىندا شەك جوق. تۇيتكىلدى پروبلەمانى شەشىپ بەرگەن ەل باسشىلىعىنا العىستارىن ايتىپ جاتتى.

2015 جىلعا اتالعان 6 ءبىلىم بەرۋ نىساندارىنىڭ شىعىندارىنا رەسپۋبليكالىق بيۋدجەتتەن 982،1 ملن. تەڭگە قارجى ءبولىندى. مۇنداعى مەكتەپتەرگە قاجەتتى 90442 دانا وقۋلىق تولىعىمەن جەتكىزىلگەن. ءبىر سوزبەن ايتقاندا، بارلىق كەرەك-جاراعى تۇگەلدەندى.

نۇرزات توعجان