دۇنيەجۇزىلىك دەنساۋلىق ساقتاۋ ۇيىمىنىڭ عالىمدارى كوروناۆيرۋستىڭ تارالۋى مەن شىعۋىن زەرتتەۋ ءۇشىن قىتايدىڭ ۋحان قالاسىنا كەلدى، دەپ حابارلادى 24.kz.

10 ادامنان قۇرالعان ساراپشىلار توبى ءبىر ايعا جۋىق ۋاقىت بويى زەرتتەۋ جۇمىسپەن اينالىسادى. اراسىندا اقش، اۆستراليا، گەرمانيا، جاپونيا، ۇلىبريتانيا، رەسەي، نيدەرلاند، كاتار مەن ۆەتنام ەلدەرىنىڭ ۆيرۋسولوگتارى بار. الايدا ىسكە كىرىسپەس بۇرىن ماماندار الدىمەن كارانتيندە وتىرىپ شىعۋى كەرەك. دەسە دە، كەي جۇمىستار قىتايلىق عالىمدارمەن ۆيدەوبايلانىس ارقىلى قاشىقتان پىسىقتالادى.

ايتا كەتەيىك، كۇنى بۇگىندە دەيىن جەر جاھاندى جايلاعان كوروناۆيرۋستىڭ شىعۋ سەبەبى جايىندا ءتۇرلى بولجام كەلتىرىلدى. باستاپقىدا ۆيرۋس قىتايدىڭ ۋحان قالاسىننان تارالدى دەلىنسە، كەيىن اۋرۋدىڭ قىتايدا تىركەلمەي جاتىپ، ەۋروپادا شىققانى جايلى دا مالىمدەمەلەر جاسالدى. ەندى عالىمدار ۆيرۋستىڭ ادامعا العاش قالاي جۇققانىن انىقتاۋ ءۇشىن كۇش بىرىكتىردى.

مارگارەت حارريس، دۇنيەجۇزىلىك دەنساۋلىق ساقتاۋ ۇيىمىنىڭ وكىلى:

– عالىمدار وتە كۇردەلى جۇمىس اتقارماق. جانۋارلار مەن ادامدارعا جۇققان ۆيرۋستى تولىق زەرتتەۋ ءۇشىن قىتايدىڭ ۋحان قالاسىنا اتتاندى. ىندەتتى ەڭ العاشقى جۇقتىرعان تۇرعىندارمەن كەزدەسىپ، ولاردىڭ قايدا بارعانىن، كىممەن قارىم-قاتىناستا بولعانىن انىقتايدى. زەرتحانالىق جۇمىستارمەن دە جاقىن تانىسادى. بۇل كۇللى الەمگە ورتاق ماسەلە بولعاندىقتان، ءتۇرلى ەلدەردىڭ عالىمدارى بىرلەسە جۇمىس ىستەپ وتىر. وسىنىڭ ارقاسىندا از عانا ۋاقىت ىشىندە ۆاكسينا شىعارىلدى. مۇنىڭ ءبارى تىعىز ىنتىماقتاستىقتىڭ ناتيجەسىندە جۇزەگە اسقان ءىس.