اقتوبەدە وبلىس اكىمدىگىنىڭ قولداۋىمەن وبلىستىق مادەنيەت، ارحيۆتەر جانە قۇجاتتاما باسقارماسى، حالىق شىعارماشىلىعى ورتالىعىنىڭ ۇيىمداستىرۋىمەن ۇلت ونەرىن ۇلىقتاۋ جولىنداعى «ەدىگە دەگەن ەر ەكەن» اتتى رەسپۋبليكالىق جىرشىلار بايقاۋى باستالدى. وعان ماڭعىستاۋ، قىزىلوردا، جامبىل، باتىس قازاقستان، اقتوبە وبلىستارى مەن نۇر-سۇلتان جانە الماتى قالالارىنان 18 ۇمىتكەر قاتىسۋدا.

بايقاۋدى ەرەكشە ونەرىمەن الەمدى مويىنداتقان «تۇران» ەتنو-فولكلورلىق ءانسامبلى "ۇلى تۇران - ماڭگىلىك"، "قارا جورعا"  كومپوزيسيالارىمەن اشتى. ونەر دوداسىندا قازىلار القاسىنا ماڭعىستاۋ وبلىستىق عىلىمي-ادىستەمەلىك، مادەني قىزمەت كورسەتۋ ورتالىعىنىڭ مامانى، جىرشى-جىراۋ ەلدوس ەمىل ءتوراعالىق ەتتى.

قۇرامىندا قىرعىزستان رەسپۋبليكاسىنىڭ ماناسشىسى، ماناس وردو ۇلتتىق كومپلەكسىنىڭ عىلىمي قىزمەتكەرى كاميل مامادالييەۆ، جامبىل اتىنداعى قازاق مەملەكەتتىك فيلارمونياسىنىڭ ديرەكتورى، ق ر مادەنيەت سالاسىنىڭ ۇزدىگى، مۋزىكانت-مۋلتياسپاپشى سەرىك نۇرمولدايەۆ، اقتوبە وبلىسىنىڭ مادەنيەت، ارحيۆتەر جانە قۇجاتتاما باسقارماسىنىڭ باسشىسى التىناي يۋنيسوۆا، جىراۋ، «ەر ەدىگە» جىر مەكتەبىنىڭ ۇستازى ادىلبەك سارين سىندى قازىلار القاسى جىرشىلاردىڭ ورىنداۋشىلىق شەبەرلىگىنە، ساحنا مادەنيەتى مەن جىردىڭ سىرىن كورەرمەنگە جەتكىزە ءبىلۋ، كاسىبي دەڭگەيلەرىنە قاراپ باعا بەرەدى.

بايقاۋ تالابىنا ساي العاشقى كەزەڭدە قاتىسۋشىلار باتاقتىڭ سارىسى، شەرنياز جارىلعاس ۇلى، اقتان كەرەي ۇلى، ابۋباكىر كەردەرى، نۇرپەيىس بايعانيندەي ءانشى-جىراۋلار مەن حالىق كومپوزيتورلارىنىڭ شىعارمالارىن ورىنداسا، ال ەكىنشى كەزەڭدە «ەدىگە» جىرىنان ءۇزىندى (ش.ءۋاليحانوۆ، مۇرىن جىراۋ، نۇرتۋعان نۇسقالارى) جىرلاپ، ەركىن تاقىرىپتا دا ونەر كورسەتەدى.