13-14 قازان كۇندەرى اقتوبەدە ەل تاۋەلسىزدىگىنىڭ 30 جىلدىعىنا ارنالعان جانە «رۋحاني جاڭعىرۋ» باعدارلاماسىن جۇزەگە اسىرۋ ماقساتىندا وتكەن «ەدىگە دەگەن ەر ەكەن» اتتى رەسپۋبليكالىق جىرشىلار بايقاۋى ءوز مارەسىنە جەتتى. جىرشىلار بايقاۋىنا ەلىمىزدىڭ ءار وڭىرىنەن 17 جىرشى قاتىستى.

ونەر دوداسىن جىرشى-جىراۋ، ماڭعىستاۋ وبلىستىق عىلىمي-ادىستەمەلىك، مادەني قىزمەت كورسەتۋ ورتالىعىنىڭ مامانى ەلدوس ەمىل ءتوراعالىق ەتكەن قازىلار القاسى سارالادى.

باعزى ونەردى ۇلىقتاۋ جولىنداعى ەكى كۇنگە سوزىلعان بايقاۋدا جەڭىمپازدار انىقتالىپ، قاتىسۋشىلارعا ديپلوم، «ەر ەدىگە - نوعايلى ءداۋىرىنىڭ جىرى» اتتى مۋزىكالىق انتولوگياسى، ارنايى «ەدىگە» قوعامدىق قورىنىڭ «ەدىگە» توسبەلگىسى تابىستالدى.

قازىلار القاسىنىڭ شەشىمىمەن باس جۇلدەگە ماڭعىستاۋلىق سارسەنباي راحمانبەردييەۆ لايىقتى دەپ تانىلدى. جەڭىمپازعا 700 مىڭ تەڭگەنىڭ سەرتيفيكاتى تابىستالدى.

ءبىرىنشى ورىن مەن 500 مىڭ تەڭگەنىڭ جۇلدەسى بەردىباي تويگۋلىيەۆكە بۇيىردى (اقتوبە وبلىسى). ەكىنشى ورىن جۇلدەگەرلەرى فارحاد ورازوۆ (باتىس قازاقستان وبلىسى) پەن جەڭىس ەلەمەسوۆ (اقتوبە وبلىسى) اتاندى. ءارقايسىسى 350 مىڭ تەڭگەگە يە بولدى. ءۇشىنشى جۇلدەنى ماناش ادىلبايەۆ (ماڭعىستاۋ وبلىسى)، نۇرايىم ەرتالاپ قىزى (نۇر-سۇلتان ق.) جانە سامال مەدەۋبايەۆا (اقتوبە وبلىسى) ءوزارا ءبولىستى.

ولاردىڭ ءارقايسىسىنا 250 مىڭ تەڭگەنىڭ سەرتيفيكاتتارى بەرىلدى.
سونداي-اق «ەر ەدىگە" اتىنداعى ارنايى جۇلدە مەن 350 مىڭ تەڭگەنى امانكەلدى ساڭكىبايەۆ (ماڭعىستاۋ وبلىسى)، "اقتوبە وبلىسى اكىمىنىڭ" ارنايى جۇلدەسى مەن 150 مىڭ تەڭگەنى ابدۋرراحمان ەستاي ۇلى (نۇر-سۇلتان ق.)، "جاس جىرشى» جۇلدەسى مەن 150 مىڭ تەڭگە عاني قايروللايەۆقا بۇيىردى (اقتوبە وبلىسى).

جىرشىلار بايقاۋىن اقتوبە وبلىسى اكىمدىگىنىڭ قولداۋىمەن وبلىستىق مادەنيەت، ارحيۆتەر جانە قۇجاتتاما باسقارماسى مەن حالىق شىعارماشىلىعى ورتالىعى ۇيىمداستىردى.