14 قازان، بەيسەنبى كۇنى، وبلىس اكىمى وڭداسىن ورازالين اقتوبە قالاسىن اباتتاندىرۋ جانە ينفراقۇرىلىمدىق دامۋى بويىنشا ءبىرقاتار جوبالاردىڭ جۇزەگە اسىرىلۋىمەن تانىستى.

جۇمىس ساپارى نۇر اقتوبە تۇرعىن ءۇي الابىنداعى ءورت سوندىرەتىن اۆتوكولىك قۇرالدارىنا ارنالعان تۇراق – گاراجدىڭ قۇرىلىس بارىسىمەن تانىسۋدان باستالدى.

«قالا اۋماعى ەكپىندەپ ۇلكەيىپ كەلەدى، سونىڭ ىشىندە قازىرگى تاڭدا قارعالىدا ورنالاسقان ءورت ءسوندىرۋ ءبولىمى قىزمەت كورسەتەتىن نۇر اقتوبە تۇرعىن ءۇي الابى دا بار. بۇل جەر ايتارلىقتاي قاشىق، ءبىز ۇلگەرمەيمىز، سوندىقتان ءورت ءسوندىرۋ بەكەتىن اشۋ قاجەتتىلىگى تۋدى»،- دەيدى توتەنشە جاعدايلار دەپارتامەنتى باسشىسىنىڭ مىندەتىن اتقارۋشى قايرات قاسىموۆ.

ءورت ءسوندىرۋ بەكەتى ءبىر ۋاقىتتا ەكى جەرگە شىعۋعا ەسەپتەلگەن، جەكە قۇرام 100 % جاساقتالعان.

«اكىمدىك قولداۋىنىڭ ارقاسىندا جىل سوڭىنا دەيىن 33 بىرلىك تەحنيكا ساتىپ الىناتىن بولادى، ونىڭ 11 بىرلىگى اكەلىنىپ قويىلدى. مەردىگەر جىل سوڭىنا دەيىن وسى نىساننىڭ قۇرىلىسىن اياقتاۋدى مىندەتىنە الدى، سونىمەن بىرگە، نۇر اقتوبەنىڭ قازاندىعى تۇرعان جەردە مامانداندىرىلعان ءورت ءسوندىرۋ ءبولىمى سالىنىپ جاتىر.

ءورت ءسوندىرۋ ءبولىمىنىڭ قۇرىلىسى اياقتالعان سوڭ بۇل بەكەت گارنيزوننىڭ بارلىق تەحنيكاسىنا ارنالعان جوندەۋ بازاسى بولادى. بۇل ءبىز ءۇشىن وتە ماڭىزدى، نىسان قاتتى كەرەك»،- دەدى ءوڭىر باسشىسىنا جوبانىڭ جۇزەگە اسىرىلۋ بارىسى جايىندا بايانداعان قايرات قاسىموۆ.

كەيىن وڭداسىن ورازالين نۇر اقتوبەدەگى كوپقاباتتى تۇرعىن ۇيلەردىڭ قۇرىلىس بارىسىن قاراپ شىقتى.

«اقتوبە ساۋلەت» ج ش س باس ديرەكتورى ارنۇر احمادي ۇلى ەكى توعىز قاباتتى ءۇيدى پايدالانۋعا بەرۋ جۇمىستارى تۋرالى باياندادى.

«ۇيلەر 72 پاتەرلى. ولاردىڭ جارتىسى – ەكى بولمەلى، قالعان جارتىسى – ءۇش بولمەلى. جالپى اۋماعى 5 مىڭ م2. جىل سوڭىنا دەيىن تاپسىرامىز. قۇرىلىس ماتەريالدارىن قارجىلاندىرۋ مەن جەتكىزۋگە بايلانىستى پروبلەما جوق»،- دەدى ءوڭىر باسشىسىنىڭ سۇراقتارىنا جاۋاپ بەرگەن ا.احمادي ۇلى.

بيىل وبلىس بويىنشا بارلىعى 1،1 ملن م2 باسپانا تۇرعىزىلماق. وتكەن 9 ايدا 624،8 مىڭ م2 نەمەسە 4 250 پاتەر پايدالانۋعا بەرىلدى. قازىرگى تاڭدا وبلىس بويىنشا 6 نەسيەلى جانە 11 جالدامالى-كوممۋنالدىق كوپپاتەرلى ۇيلەردىڭ قۇرىلىسى جالعاسۋدا.

وبلىس ورتالىعىنداعى، سونىڭ ىشىندە قالا ورتالىعىنان الىس جەرلەر مەن جاڭا تۇرعىن ءۇي الاپتارىنداعى قوعامدىق كەڭىستىكتەرگە ەرەكشە نازار اۋدارىلادى. نۇر اقتوبە تۇرعىن ءۇي الابىنىڭ 1 شاعىن اۋدانىندا ۇلكەن گۇل باعىن سالۋ باستالدى. جىل سوڭىنا دەيىن جاياۋجول پليتكالارى توسەلىپ، جاياۋجۇرگىنشىلەر جولدارى، جارىق، سۋارۋ جۇيەسى، بالالارعا ارنالعان جانە سپورت الاڭدارى، كۇركە جانە ت.ب. ورناتىلادى. جارىن كوممۋنالدىق قىزمەتتەر گۇل باعىن كوگالداندىرۋ جۇمىستارىمەن اينالىساتىن بولادى.

وبلىس اكىمى ەسكى قالاداعى گۇل باقتارى مەن اللەيالاردى قالپىنا كەلتىرۋ جۇمىستارىن قاراپ شىقتى.

«احتانوۆ شارشىسىن» قالپىنا كەلتىرەمىز، بۇل – قوبىلاندين كوشەسى بويىنداعى گۇل باعى، شەرنياز كوشەسىنىڭ ءبىر بولىگى، سوسىن التىنسارين كوشەسىنەن جانگەلدين ەسكەرتكىشىنە دەيىنگى جەر. قيىرشىق تاس توسەپ، 120 شام ورناتامىز، ەسكى قورشاۋلاردى اۋىستىرامىز، 54 شاعىن ساۋلەت فورمالارى مەن باسپالداقتاردى قالپىنا كەلتىرەمىز»،- دەدى “اەمك جارىق” ج ش س مەردىگەر مەكەمەسى ديرەكتورىنىڭ ورىنباسارى الەكساندر گالسيەۆ.

جۇمىستار قازان ايىنىڭ سوڭىنا قاراي اياقتالادى دەپ جوسپارلانىپ وتىر.

قىزمەتتىك ساپار جاڭاقونىس تۇرعىن ءۇي الابىنداعى الماتى كوشەسى بويىنداعى جولدىڭ جوندەۋ جۇمىستارىمەن تانىسۋمەن جالعاستى.
وسى جىلى جاڭاقونىستا سوۆەتسكايا كوشەسىنىڭ 2 شاقىرىم جانە الماتى كوشەسىنىڭ 2،3 شاقىرىم جولىن جوندەۋ باستالدى. جوبا جالعاسۋدا - بيىل اسفالت توسەمنىڭ ءبىرىنشى قاباتى توسەلدى. جۇمىستار كەلەر جىلى تولىق اياقتالادى دەپ جوسپارلانىپ وتىر.

وبلىس اكىمى سونداي-اق، تاۋەلسىزدىڭ داڭعىلى بويىنداعى «ازاتتىقتىڭ اق تاڭى» كەشەنىنە ارنالعان ورىندى قاراپ شىقتى.

قىزمەتتىك ساپار سوڭىندا وبلىس اكىمى اۋلاسى بار اۋماقتاردىڭ اباتتاندىرىلۋىمەن تانىستى. ول ءابىلقايىر حان داڭعىلى مەن الدياروۆ كوشەسى بويىنداعى ءبىرقاتار اۋلالارعا بارىپ، جەرگىلىكتى تۇرعىندارمەن تىلدەستى.

«بىزگە قاتتى ۇنايدى. اۋلامىزدىڭ جاڭارتىلىپ، بالالار الاڭىنىڭ ورناتىلعانى قۋانتادى، ءقازىر اسفالت توسەپ جاتىر، بورديۋرلار ورنالاستىرىپ جاتىر. وسىلاي جالعاستىرا بەرىڭىزدەر – سول كەزدە قالادا ءبارى جاقسى بولادى»،- دەدى قالا تۇرعىنى ۆياچەسلاۆ سۋحونوسوۆ.
وسى جىلدىڭ قورىتىندىسى بويىنشا وبلىس ورتالىعىندا 220 اۋلا جوندەلىپ، بالالار وينايتىن 67 الاڭ ورناتىلادى، 9 ساياباق پەن گۇل باعى قالپىنا كەلتىرىلەدى.

ساپار سوڭىندا وبلىس اكىمى قالا باسشىلىعىنا وبلىس ورتالىعىن ءارى قاراي اباتتاندىرۋ مەن جۇزەگە اسىرىلىپ جاتقان جوبالاردى ۋاقىتىندا اياقتاۋعا قاتىستى ءبىرقاتار ناقتى تاپسىرمالار بەردى.