اۋىلدان ءبىلىم قۋىپ كەلگەن ستۋدەنت ءۇشىن باستى قاجەتتىلىك – جاتاقحانا. ءبىر وكىنىشتىسى، جاتاقحاناعا قول جەتكىزۋ بارلىق ستۋدەنتكە بۇيىرا بەرمەيدى. ويتكەنى ستۋدەنتتەر كوپ، ال جاتاقحاناداعى ورىن ادەتتەگىدەي جەتكىلىكسىز. ونىڭ ۇستىنە، ەلىمىزدە مۇقتاج ستۋدەنتتى باسپانامەن قامتاماسىز ەتۋدى مىندەتتەيتىن ارنايى زاڭ جوق. ءار جوعارى وقۋ ورنى ستۋدەنتتەرگە جاتاقحانا بەرۋدىڭ وزىندىك ىشكى ەرەجەلەرىنە ساي ارەكەت جاسايدى. ماسەلەن، كوپتەگەن ۋنيۆەرسيتەتتەردە جاتاقحانا ەڭ الدىمەن مەملەكەتتىك گرانت يەلەنگەن 1-كۋرس ستۋدەنتتەرىنە، «التىن بەلگى» يەگەرلەرىنە، جەتىم بالالارعا، كوپ بالالى وتباسىنان شىققان، اكە-شەشەسى نەمەسە ءوزى مۇگەدەك ستۋدەنتتەرگە بەرىلەدى. ەكىنشى كەزەكتە ۋنيۆەرسيتەتتىڭ قوعامدىق جۇمىستارىنا بەلسەنە ارالاساتىن ستۋدەنتتەر، ستۋدەنتتىك قۇرىلىس جاساعىنىڭ مۇشەلەرى مەن قابىلداۋ كوميسسياسىندا جۇمىس ىستەگەن ستۋدەنتتەر تۇرادى. وسىلايشا جاتاقحاناعا مۇقتاج وزگە ستۋدەنتتەر كەيىنگە ىسىرىلىپ قالا بەرەدى. ۋنيۆەرسيتەت ماماندارى جوعارىدا اتالعانداردان كەيىن عانا جالپى تىزىمدە تۇرعان ستۋدەنتتەردىڭ جاتاقحانامەن قامتاماسىز ەتىلەتىندىگىن ايتادى. سونداي-اق، جاتاقحاناعا قول جەتكىزۋ ءۇشىن جالپى تىزىمدە تۇرعان ستۋدەنتتەردىڭ كەلگەن جەرىنىڭ الىس-جاقىندىعى دا ەسكەرىلەدى ەكەن. ءقازىر شەت ايماقتاردان الماتىعا ءبىلىم ىزدەپ كەلگەن جاستاردىڭ كوپشىلىگى جاتاقحاناعا قول جەتكىزە الماي، اۋرە-سارساڭعا ءتۇسىپ ءجۇر. مۇنداي جايت ءتىپتى، سوڭعى ۋاقىتتاردا داستۇرگە اينالىپ كەتكەندەي-اق. ال اقىلى وقۋعا تۇسكەندەردىڭ جاتاقحاناعا قول جەتكىزۋى تىپتەن قيىن. ويتكەنى ولاردى جاتاقحانامەن قامتاماسىز ەتۋدى وقۋ ورىندارى ەڭ سوڭىنان قاراستىرادى. بۇل تۋرالى قامشى پورتالى تۇركىستانعا سىلتەمە جاساي وتىرىپ حابارلايدى.
جاتاقحاناعا جايعاسۋ بۇگىندە وڭاي شارۋا ەمەس. ستۋدەنتتەردىڭ بۇل ماسەلەمەن جىل سايىن بەتپە-بەت كەلەتىنى سوندىقتان. ستۋدەنتتەر قاتارى ارتقان سايىن، جاتاقحانا ماسەلەسى كۇردەلەنە تۇسۋدە. ونىڭ ۇستىنە، ۋاقىت وتكەن سايىن جوعارى كۋرس ستۋدەنتتەرىنىڭ جاتاقحانادان قاعىلۋى دا ادەتكە اينالىپ بارادى. اۋەلى 1-كۋرس ستۋدەنتتەرىن جاتاقحانامەن قامتاماسىز ەتۋدى ماقسات تۇتاتىن جوعارى وقۋ ورىندارى 4-كۋرس ستۋدەنتتەرىن كوبىنە تىپتەن تىزىمگە المايدى. ال ءبىتىرۋشى ستۋدەنتتەر امالسىزدان جاتاقحاناداعى ورىندارىن بوساتىپ بەرۋگە ءماجبۇر. مامانداردىڭ ايتۋىنشا، جوعارى كۋرس ستۋدەنتتەرىن الدىن الا پسيحولوگيالىق تۇرعىدان دا دايارلايدى ەكەن. «جوعارى كۋرس ستۋدەنتتەرى قالانى بىلەدى، ءومىر ءسۇرۋ جاعدايىنان حاباردار. سوندىقتان، پاتەر جالداپ كۇنەلتۋگە مۇمكىندىك تابادى» دەگەندى جەلەۋ ەتكەن ۋنيۆەرسيتەت قىزمەتكەرلەرى 4-كۋرس ستۋدەنتتەرىن جاتاقحاناسىز قالدىرادى. مۇنداي جاعداي 2،3-كۋرس ستۋدەنتتەرىنىڭ دە باسىنا تۇسە باستاعانعا ۇقسايدى.
قورعانسىزدىڭ كۇنى
بىلتىر جاتاقحاناعا ورنالاسىپ، بيىلعى جىلى ورنىنان ايرىلىپ قالعان ستۋدەنتتەردىڭ ءبىرى – اسەم. ق.ساتبايەۆ اتىنداعى قازاق ۇلتتىق تەحنيكالىق ۋنيۆەرسيتەتىنىڭ 2-كۋرس ستۋدەنتى. اسەمنىڭ ايتۋىنشا، جاتاقحانا الۋ ءۇشىن مامىر ايىنىڭ سوڭىندا ءوتىنىش جازىپتى. ءبىراق ول كەزدە تىزىمگە ىلىنبەي قالعان. مۇعالىمدەر «وقۋ جىلىنىڭ باسىندا قايتادان ءوتىنىش جازىپ كور، 1-كۋرستان ارتىلسا، جاتاقحانا الىپ قالارسىڭ» دەپ شىعارىپ سالادى. ءبىراق قىركۇيەكتە وقۋعا كەلگەن اسەم جاتاقحاناعا ءالى قول جەتكىزگەن جوق.
«ءوزىم وڭتۇستىك قازاقستان وبلىسىنان كەلگەنمىن. بىلتىر جاتاقحانادا تۇردىم. ءبىراق بيىل بەرمەي جاتىر. مۇعالىمدەر «جاتاقحانادا ورىن جوق، بولا قالسا، بەرەمىز» دەپ سەندىرۋدە. ءقازىر تۋىستارىمنىڭ ۇيىندەمىن. ەندى جاتاقحانا الا الماسام، پاتەر ىزدەۋىم كەرەك»، – دەيدى 2-كۋرس ستۋدەنتى. اسەم كوپ بالالى وتباسىنان شىققان، سونىمەن قاتار، اناسىنىڭ 3-توپتاعى مۇگەدەكتىگىن دالەلدەيتىن انىقتاماسى دا بار. وكىنىشكە قاراي، بۇل قۇجاتتار دا اسەمنىڭ جاتاقحاناعا ورنالاسۋىنا سەپتىگىن تيگىزە الماعان. سوندا جوعارى وقۋ ورىندارىنىڭ جاتاقحانا ەڭ الدىمەن كوپ بالالى وتباسىنان شىققاندارعا جانە اكە-شەشەسى مۇگەدەك ستۋدەنتتەرگە بەرىلەدى دەگەن ەرەجەلەرى قايدا قالدى؟ ولار نەگە ەرەجەگە باعىنباي ءجۇر؟ سويتسەك، ولار بۇل ەرەجەنى تەك 1-كۋرس ستۋدەنتتەرى ءۇشىن جارامدى دەپ تانيدى ەكەن. «مەن 1-كۋرستا وسى قۇجاتتارىمدى تاپسىرىپ، جاتاقحانا الدىم. سول كەزدە ماعان كەلەسى جىلى جاتاقحاناعا قول جەتكىزۋ ءۇشىن قوعامدىق جۇمىستارعا بەلسەنە ارالاسۋىم كەرەكتىگىن ەسكەرتكەن. مەن وسىنى ەسكەرىپ، جىل بويى بارلىق شارالارعا قاتىستىم. ەشقانداي قوعامدىق جۇمىستاردان تىس قالمادىم»، – دەپ وتىر اسەم. دەمەك، جاتاقحانا بەرۋدەگى ەرەجەلەردىڭ ماڭىزدىلىعى شامالى. اسەمنىڭ ايتۋىنشا، الەۋمەتتىك جاعدايى جاقسى، ءتىپتى، قوعامدىق جۇمىستارعا ارالاسپاعان قاتارلاستارى جاتاقحاناعا ورنالاسىپ الىپتى. ءبىراق، اسەم سەكىلدى ستۋدەنتتەرگە ورىن جەتكىلىكسىز.
ءقازىر قازۇتۋ-دا جاتاقحاناعا قول جەتكىزە الماي جۇرگەن اسەمنىڭ ءبىر توپ قۇربىلارى بار. ال ۋنيۆەرسيتەت قىزمەتكەرلەرى قازان-قاراشا ايلارىندا جاتاقحانا بولمەلەرىنە بەسىنشى توسەكتەردى كىرگىزەتىندىگىن، سول كەزدە ولارعا ورىن بۇيىرىپ قالۋى مۇمكىن ەكەندىگىن ايتىپ، جۇباتىپ ءجۇر. ءوزى 4 ادامعا جوسپارلانعان تار بولمەگە 5ء-ىنشى ادامدى كىرگىزۋ بيىل عانا ورىن الىپ وتىرعان جوق. جىل سايىن وقۋ جىلى باستالعاننان سوڭ-اق جاتاقحانالاردا وسى جايت قايتالانادى. اياداي تار بولمەدە 5 ادامنىڭ بىرىگىپ تۇرۋى قيىنداۋ. ءبىراق شالعايدان كەلگەن ستۋدەنتتەر ءۇشىن سول تار بولمەنىڭ ءوزى حان سارايىنداي. از دا بولسا جاتاقحانادان ءبىر ورىن بۇيىرىپ قالار دەپ ۇمىتتەنىپ جۇرگەن اسەم ءقازىر دەمالىس كۇندەرىن جۇمىس ىزدەۋگە ارناپتى. «ەگەر پاتەرگە شىعاتىن بولىپ قالسام، اتا-انام ءۇشىن اي سايىن پاتەر اقىسىن تولەۋ قيىندىق تۋدىرادى. سوندىقتان ءوزىم دە جۇمىس ىستەپ، اتا-اناما كومەكتەسۋىم كەرەك. ءبىر جاعىنان ساباعىما ۇلگەرمەي قالامىن با دەپ قورقامىن. ءقازىر وقۋ باعدارلامامىز دا كۇردەلى. الايدا جۇمىسقا ورنالاسۋدان باسقا امال جوق»، – دەيدى قاپالى قىز.
جاتاقحانا قۇنى نەگە قىمبات؟
ءبىلىم جانە عىلىم مينيسترلىگىنىڭ سوڭعى مالىمەتتەرىنە سۇيەنسەك، بىلتىرعى وقۋ جىلىنىڭ سوڭىنداعى جاعداي بويىنشا، ەلدەگى جوعارى وقۋ ورىندارى ستۋدەنتتەرىنىڭ 70 پايىزى عانا جاتاقحانامەن قامتاماسىز ەتىلگەن. الماتىدا بۇل كورسەتكىش – 66، ال استانادا – 61 پايىز. ءقازىر ەلىمىز بويىنشا تاعى دا 10 جاتاقحانانىڭ قۇرىلىسى جۇرگىزىلۋدە. بيىلعى وقۋ جىلىنىڭ سوڭىنا دەيىن سونىڭ 8ء-ى پايدالانۋعا بەرىلىپ، ستۋدەنتتەردىڭ جاتاقحانا ماسەلەسى ءبىرشاما شەشىمىن تاپپاق. ازىرگە ءبىلىم جانە عىلىم مينيسترلىگىنىڭ وكىلدەرى وسىعان سەندىرىپ وتىر. «مينيسترلىك ستۋدەنتتەردى جاتاقحانامەن قامتاماسىز ەتۋ ماسەلەسىنە قاتىستى ءتيىستى شارالار قابىلداۋدا. وقۋ جىلىنىڭ اياعىندا ەكى جاڭا جاتاقحانا ىسكە قوسىلدى. ولار پاۆلودار جانە استانا قالالارىندا. بۇل باعىتتاعى جۇمىستار ءارى قاراي جالعاسا بەرەدى»، – دەيدى ق ر ءبىلىم جانە عىلىم مينيسترلىگىنىڭ وكىلدەرى.
جالپى، ەلىمىزدەگى ستۋدەنتتىك جاتاقحانالاردىڭ ايلىق اقىسى بەكىتىلگەن بۇيرىق بويىنشا ستۋدەنت شاكىرتاقىسىنىڭ 15 پايىزىنان اسپاۋى قاجەت. بيىلعى شاكىرتاقى كولەمى – 17500 تەڭگە. ال اي سايىنعى شاكىرتاقىنىڭ 15 پايىزى 2625 تەڭگەگە تەڭ. دەمەك، ستۋدەنتتەردىڭ جاتاقحانادا 10 اي تۇراتىنىن ەسكەرسەك، جىلدىق اقى 26250 تەڭگەنىڭ كولەمىندە بولۋى ءتيىس. ءبىراق بۇگىندە ەلىمىزدەگى جوعارى وقۋ ورىندارىنداعى جاتاقحانا قۇنى ءارتۇرلى. الماتىداعى قازاقستان مەنەدجمەنت ەكونوميكا جانە بولجاۋ ينستيتۋتىندا (كيمەپ) جاتاقحانادا تۇرۋ ءۇشىن ءاربىر ستۋدەنت 1 سەمەسترگە 135 مىڭ تەڭگە تولەۋى كەرەك. ال ت.رىسقۇلوۆ اتىنداعى قازاق ەكونوميكالىق ۋنيۆەرسيتەتىندە جاتاقحانانىڭ جىلدىق باعاسى – 120 مىڭ تەڭگە ەكەن. جاتاقحانانىڭ جىلدىق تولەمى قازاق ۇلتتىق اگرارلىق ۋنيۆەرسيتەتىندە – 26 مىڭ، ق.ساتبايەۆ اتىنداعى قازاق ۇلتتىق تەحنيكالىق ۋنيۆەرسيتەتىندە – 22 مىڭ، قازاق مەملەكەتتىك قىزدار پەداگوگيكالىق ۋنيۆەرسيتەتىندە – 25 مىڭ، الماتى ەنەرگەتيكا جانە بايلانىس ۋنيۆەرسيتەتىندە – 28 مىڭ، الماتى تەحنولوگيالىق ۋنيۆەرسيتەتىندە – 50 مىڭ، س.اسفەندياروۆ اتىنداعى قازاق ۇلتتىق مەديسينالىق ۋنيۆەرسيتەتىندە – 36 مىڭ، حالىقارالىق بيزنەس اكادەمياسىندا – 25-35 مىڭ، اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە – 38-40 مىڭ تەڭگەنى قۇراپ وتىر. جوعارىدا كورسەتىلگەن جاتاقحانا باعاسىنا قاراپ وتىرساق، مينيسترلىكتە بەكىتىلگەن بۇيرىققا ەلىمىزدەگى ەشقانداي جوعارى وقۋ ورنىنىڭ اسا ۇلكەن نازار اۋدارماعاندىعى بايقالادى. ءتىپتى، ءبىر عانا الماتى قالاسىنىڭ وزىندەگى ۋنيۆەرسيتەتتەردە جاتاقحانانىڭ باعاسى سان قيلى. 22 مىڭنان باستالعان جاتاقحانا باعاسىنىڭ شەگى 130 مىڭعا دەيىن جەتەدى.
«ستۋدەنتتىك باسپانا» ماسەلەنى شەشە مە؟
ستۋدەنتتەردى جاتاقحانامەن قامتاماسىز ەتۋ ماقساتىندا مەملەكەت باسشىسىنىڭ تاپسىرماسى بويىنشا ءبىلىم جانە عىلىم مينيسترلىگى 2011-2015 جىلدارعا ارنالعان «ستۋدەنتتىك باسپانا» باعدارلاماسىن قابىلداعان بولاتىن. «ستۋدەنتتىك باسپانا» باعدارلاماسى بويىنشا ەلىمىزدە 32 جاتاقحانا سالىنىپ، 54 جاتاقحانا كۇردەلى جوندەۋدەن وتكىزىلۋى كەرەك. سونداي-اق، استانا مەن الماتى قالالارىندا ستۋدەنتتىك قالاشىقتار سالۋ جوسپارى بەكىتىلدى. ءبىلىم جانە عىلىم مينيسترلىگى ەنگىزگەن باعدارلاما اياسىندا 2010-2014 جىلدار ارالىعىندا ەلىمىزدە 4423 ورىندىق 10 ستۋدەنتتىك جاتاقحانا بوي كوتەرىپتى. ولاردىڭ ەكەۋى ەۋرازيا ۇلتتىق ۋنيۆەرسيتەتىندە، قالعاندارى قازاق مەملەكەتتىك قىزدار پەداگوگيكالىق ۋنيۆەرسيتەتى، جاڭگىرحان اتىنداعى باتىس قازاقستان اگرارلىق تەحنيكالىق ۋنيۆەرسيتەتى، ەسەنوۆ اتىنداعى كاسپيي مەملەكەتتىك تەحنولوگيا جانە ينجينيرينگ ۋنيۆەرسيتەتى، التىنسارين اتىنداعى ارقالىق مەملەكەتتىك پەداگوگيكالىق ينستيتۋتى، وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتى، ياسساۋي اتىنداعى حالىقارالىق قازاق-تۇرىك ۋنيۆەرسيتەتى، قورقىت اتا اتىنداعى قىزىلوردا مەملەكەتتىك ۋنيۆەرسيتەتىندە ورنالاسقان.
سونداي-اق، «ستۋدەنتتىك باسپانا» شەڭبەرىندە وتكەن جىلى قاراعاندى مەملەكەتتىك تەحنيكالىق ۋنيۆەرسيتەتىندە 822 ورىندىق، نۇر-مۇباراك ۋنيۆەرسيتەتىندە 610 ورىندىق، ءال-فارابي اتىنداعى قازاق ۇلتتىق ۋنيۆەرسيتەتىندە 274 ورىندىق جاتاقحانا اشىلدى. ال بيىلعى وقۋ جىلىندا قازاق مەملەكەتتىك قىزدار پەداگوگيكالىق ۋنيۆەرسيتەتىندە «ستۋدەنتتىك باسپانا» مەملەكەتتىك باعدارلاماسىنىڭ اياسىندا 450 ورىندىق جاڭا ستۋدەنتتەر ءۇيى پايدالانۋعا بەرىلدى.
قازاقستاندا 75 904 ورىنعا ەسەپتەلگەن 237 جاتاقحانا بار. ءبىراق بۇل جاتاقحانالار قازاقستاندىق ستۋدەنتتەر ءۇشىن جەتكىلىكسىز. بۇل رەتتە ءبىلىم جانە عىلىم مينيسترلىگى 2012-2015 جىلدارعا جاتاقحانالاردىڭ جەلىلەرىن دامىتۋ بويىنشا كەشەندى جوسپار ازىرلەدى. 2010-2013 جىلدار ارالىعىندا رەسپۋبليكادا جوعارى وقۋ ورنىندا ءبىلىم الۋ ۋاقىتىندا 3601 ستۋدەنتتى تۇرعىن ۇيمەن قامتاماسىز ەتۋگە قابىلەتتى جاڭا 9 جاتاقحانا سالىنىپ، پايدالانۋعا بەرىلدى. 2014 جىلى رەسپۋبليكالىق بيۋدجەتتىڭ ەسەبىنەن جاتاقحانالاردىڭ قۇرىلىسى بويىنشا 16 ينۆەستيسيالىق جوبا ىسكە اسۋدا. ق ر ءبىلىم جانە عىلىم مينيسترلىگى ەكونوميكا جانە بيۋدجەتتىك جوسپارلاۋ مينيسترلىگىنە 16 جاتاقحانانىڭ قۇرىلىسىنا 2015-2017 جىلدارعا بيۋدجەتتىك تاپسىرىس جولدادى. بيۋدجەتتىك تاپسىرىس قۇنى 15 ملن. 599 مىڭ 030 تەڭگە. ءبىلىم جانە عىلىم مينيسترلىگى اتالمىش جوسپار بويىنشا 2020 جىلعا دەيىن 32،6 مىڭ ستۋدەنتكە ارنالعان جاتاقحانالار جەلىسىن سالۋدى كوزدەپ وتىر. جوسپار بويىنشا بيىلعى وقۋ جىلىندا وقۋ ورىندارىنىڭ مۇقتاج ستۋدەنتتەرىن جاتاقحانامەن قامتاماسىز ەتۋدى 80 پايىزعا دەيىن جەتكىزۋ مىندەتتەلگەن بولاتىن.
اتالمىش مەملەكەتتىك باعدارلامانىڭ ارقاسىندا ءبىرشاما جۇمىستار اتقارىلىپ، جاتاقحانالار سالۋ ءىسى قولعا الىنا باستادى. ءبىراق ستۋدەنتتەردىڭ جاتاقحانا ماسەلەسى ءالى دە كۇيىپ تۇرعان تاقىرىپ. جىل سايىن ستۋدەنتتەر قاتارىنىڭ ارتۋى جاتاقحانا تاپشىلىعىنىڭ قاتتىراق سەزىلۋىنە ىقپالىن تيگىزىپ وتىر. ەڭ باستىسى، كەزىندە كوپتەگەن جاتاقحانالار جەكەشەلەندىرىلىپ كەتتى. سول جاتاقحانالاردىڭ بۇگىندە قانداي ماقساتتا قولدانىلىپ جاتقانىن ىزدەگەن دە، سۇراعان دا جان جوق. بۇرىن جەكە قولدارعا وتكەن بالاباقشالاردىڭ ءبىرازى مەملەكەت مەنشىگىنە قايتارىلدى. الايدا جاتاقحانالار قايتارىلىپتى دەگەندى ەستىمەدىك. بۇگىنگى جاتاقحانا تاپشىلىعىنىڭ ءبىر سەبەبى وسىندا بولسا كەرەك.
كوپ مۇڭعا ءبىر مۇڭ قوسىلىپ…
كۇز مەزگىلى باستالىسىمەن، جاتاقحانادان قۇر قالعان ستۋدەنتتەر جالدايتىن پاتەر ىزدەۋدى باستايدى. الماتىدا ارزان باعاعا پاتەر تابۋ دا وڭاي شارۋا ەمەس. ونىڭ ۇستىنە پاتەر يەلەرى جالداۋ اقىسىن ءدال وسى كۇز ماۋسىمىندا شارىقتاتىپ جىبەرەدى. ءقازىر الماتى قالاسىندا ءبىر بولمەلى پاتەردى جالعا الۋ ءۇشىن ايىنا كەمىندە 60 مىڭ تەڭگە تولەۋ كەرەك. ەكى نەمەسە ودان دا كوپ بولمەلى پاتەردىڭ قۇنى 100 مىڭ تەڭگەدەن اسىپ جىعىلادى. ايتا كەتەيىك، پاتەر اقىسىنا كوممۋنالدىق قىزمەت اقىسى كىرمەيدى. ال مۇنداي سومانى اي سايىن تولەپ تۇرۋ قاراپايىم ستۋدەنت ءۇشىن مۇمكىن ەمەس. سوندىقتان، بىرنەشە ستۋدەنت بىرىگىپ، ءبىر پاتەر جالداۋعا تىرىسادى. پاتەر يەلەرى كوبىنەسە ستۋدەنتتەرگە پاتەرىن بەرۋدەن قاشقاقتايدى. جاستارعا سەنىم بىلدىرمەيتىندىكتەن بولار، بالكىم. كەيبىر پاتەر يەلەرى جىگىتتەرگە جالعا بەرۋگە مۇلدەم قارسى. سونداي-اق، پاتەر اقىسىن ءوز ۋاقىتىندا بەرۋ پاتەر يەلەرى قوياتىن باستى تالاپتاردىڭ ءبىرى. پاتەر اقىسىن ۋاقىتىندا تولەمەگەن ستۋدەنتتەردىڭ مۇڭىن تىڭدايتىن دا ەشكىم جوق. سول ساتتە-اق ولاردى پاتەردەن قۋىپ شىعادى. بۇل ۇلكەن قالادا كۇن سايىن ورىن الاتىن جايت. ستۋدەنتتەردىڭ وقۋ جىلىنىڭ سوڭىنا دەيىن جالدايتىن تۇراقتى پاتەر تابا الماۋىنىڭ باستى سەبەبى دە سول.
جاتاقحانادان ورىن بۇيىرماعان بەيباق ستۋدەنتتىڭ پاتەر جالداۋدان وزگە امالى جوق. وقۋ جىلى باستالعاننان-اق ارزان پاتەردەن ۇمىتتىلەر جەتىم بۇرىشتى جاعالاپ، وزگەلەرى ينتەرنەت سايتتارى ارقىلى ۋاقىتشا باسپانا تابۋعا تىرىسادى. پاتەر جالداپ تۇراتىن ستۋدەنتتەردىڭ كوپشىلىگى – اقىلى بولىمدە وقيتىندار. ويتكەنى الەۋمەتتىك جاعدايى تومەن بولماسا، ولاردى جاتاقحانامەن قامتاماسىز ەتۋگە كەپىلدىك بەرىلمەيدى. ال ەلىمىزدەگى وقۋ باعاسىنىڭ قىمباتتىعىن ەسكەرسەك، بالاسىن 4 جىل بويى ۋنيۆەرسيتەتتە وقىتۋ ءۇشىن اتا-انالار ءبىراز شىعىندانادى. قازىرگى ۋاقىتتا قازاقستانداعى جوعارى وقۋ ورىندارىنداعى ورتاشا وقۋ اقىسى 500-600 مىڭ تەڭگە. وعان اي سايىن ستۋدەنتتىڭ جول ءجۇرۋ قۇنى، ازىق-تۇلىگى، وزگە دە شىعىندارىن قوسقاندا، قاراپايىم اتا-انا ءۇشىن ناعىز قيىندىق تۋدىراتىنى ءسوزسىز.
پاتەردىڭ اقىسىن تولەۋ ءۇشىن ستۋدەنتتەردىڭ كوپشىلىگى قوسىمشا جۇمىس ىستەۋگە تالپىنادى. ءوز كەزەگىندە بۇل ستۋدەنتتەردىڭ ءبىلىم الۋىنا كەرى اسەر ەتەدى. وسىلايشا، ۇلكەن قالاعا ءبىلىم ىزدەپ كەلگەن جاستار امالسىزدان وقۋىن ىسىرىپ قويىپ، ءوز شىعىندارىن وتەۋ ءۇشىن تابىس تابۋدى كوزدەيدى. جاستاردىڭ اتا-اناسىنا قول ۇشىن بەرىپ، ەڭ بولماعاندا كۇندەلىكتى شىعىندارىن وتەۋگە تىرىساتىندىقتارى ورىندى-اق. ءبىراق جاستاردىڭ ءبىلىم الۋى – باستى مىندەت ەمەس پە؟
"قامشى "سىلتەيدى
پىكىر قالدىرۋ