«جانۇيا» وتباسى ينستيتۋتىن قولداۋ ورتالىعى سۇيەمەلدەۋىندە جۇرگەن كوپ بالالى، از قامتىلعان وتباسىلارعا ارنالعان «وتباسى – جان قازىناسى» اتتى سپورتتىق ءىس-شاراسى ۇيىمداستىرىلدى، دەپ حابارلايدى ەلوردا اكىمدىگىنىڭ رەسمي سايتى.

«قازىرگى ساتتە «جانۇيا» وتباسى ينستيتۋتىن قولداۋ ورتالىعىندا 418 وتباسى سۇيەمەلدەۋدە ءجۇر. ولارعا قۇقىقتىق، پسيحولوگيالىق جانە الەۋمەتتىك كومەك كورسەتىلەدى. بۇگىنگى «وتباسى كۇنىنە» ارنالعان ءىس-شارامىز دا قولداۋدىڭ ءبىر ءتۇرى رەتىندە سانالادى»، - دەدى «جانۇيا» وتباسى ينستيتۋتىن قولداۋ ورتالىعىنىڭ باسشىسى باحتيار ايتپايەۆ.

وسىناۋ كۇنگە وراي، ورتالىق ساياباقتا جاقىن ارادا عانا اشىلعان بياتلون سپورتىنان 5 اۋداننان جينالعان 21 وتباسىنىڭ اراسىندا باسەكە ءوتتى.

«بۇگىن كوپ بالالى، از قامتىلعان وتباسىلارى اراسىندا ءبىرىنشى مارتە سپورتتىق جارىستى قولعا الىپ جاتىرمىز. بۇعان دەيىنگى جىلدارى مادەني، كونسەرتتىك ءىس-شارالاردى وتكىزىپ كەلىپ ەدىك. قازىرگى ساتتە وتباسىلارعا تەك ماتەريالدىق قولداۋ كورسەتۋ جەتكىلىكسىز دەپ ويلايمىن. سوندىقتان جانۇيالارعا قىزىقتى بولۋى ءۇشىن، سپورتتىق ءىس-شارانى تاڭدادىق. نەگە؟ بىرىنشىدەن، سالاۋاتتى ءومىر سالتىن ناسيحاتتاۋ. كەي وتباسىلار بياتلون دەگەن سپورتتى ءبىرىنشى رەت ەستۋى دە مۇمكىن. بۇگىنگى ءىس-شارا ارقىلى جاڭا سپورت تۇرىمەن تانىستىرىپ، تۇرعىنداردىڭ ءوي-ورىسىن كەڭەيتەمىز. بالكىم، بۇگىنگى ءىس-شارا ارقىلى بالا ءوزىنىڭ بويىنداعى تالانتىن اشۋى مۇمكىن. ءارى سپورت سەكسيالارىنىڭ قولجەتىمدى ەكەنىن كورسەتەمىز. ەكىنشىدەن، سپورتتىق باسەكەدە اتا-انامەن بالا جاقسى ءتىل تابىسىپ، ءوزارا تۇسىنىستىگى ارتادى. ۇشىنشىدەن، دەمالىس كۇنى وتباسىلارىمىز قالامىزداعى كوركەم جەرلەرىمىزدىڭ ءبىرى ورتالىق ساياباقتا كەرەمەت ەموسيا الادى»، - دەدى جارىس ۇيىمداستىرۋشىسى زۋلفيا سادۆاكاسوۆا.

ايتا كەتسەك، «جانۇيا» وتباسى ينستيتۋتىن قولداۋ ورتالىعى 2019 جىلدىڭ تامىزىندا اشىلعان بولاتىن.

«بۇگىنگى بياتلون جارىسىنان العان اسەرىم كەرەمەت. تابيعات اياسىندا اتا-انالارمەن بىرگە بالانى سپورتقا باۋلۋ جاقسى ءادىستىڭ ءبىرى دەپ سانايمىن. بۇعان دەيىن بياتلونمەن اينالىسىپ كورمەگەنمىن. ءبىراق جارىس بارىسىندا كوزىمنىڭ قىراعىلىعىنىڭ ارقاسىندا 10 نىساناعا دا ءدال تيگىزدىم. بۇل – بالالارىمىزعا ونەگە. ءوزىم وقۋشى كەزىمدە اۋەسقوي رەتىندە جۇگىرۋمەن شۇعىلداندىم. بالامدى دا باستاۋىشتا كاراتە سەكسياسىنا بەرگەنمىن. وسىنداي ءىس-شارانى ۇيىمداستىرعانى ءۇشىن بارىنە العىسىمدى بىلدىرەمىن»، - دەدى الماتى اۋدانىنىڭ تۇرعىنى اسەل وماروۆا ەموسياسىمەن ءبولىسىپ.

سايىس ەرەجەسى بويىنشا، ءبىر وتباسىدان 2 ادام ونەر كورسەتىپ، ءار قاتىسۋشى 800 مەتر جۇگىرىپ، 10 مارتە نىسانانى كوزدەپ اتتى.

جارىس «جانۇيا» وتباسى ينستيتۋتىن قولداۋ ورتالىعى جانە قازاقستان بياتلون فەدەراسياسى، استانا قالاسىنىڭ بياتلون فەدەراسياسى، استانا قالاسىنىڭ دەنە شىنىقتىرۋ جانە سپورت باسقارماسى، №2 بالالار - جاسوسپىرىمدەر سپورت مەكتەبىمەن بىرلەسىپ، جۇزەگە اسىرىلدى.

شارا سوڭىندا بارلىق وتباسىلاردىڭ اراسىندا جەڭىمپازدار ارنايى كۋبوك، ەستەلىك سىيلىقتارمەن ماراپاتتالدى.