قاراعاندى اكىمى قالا تۇرعىندارىنا چەتسكايا كوشەسىنىڭ بويىنداعى جولعا جۇرگىزىلگەن كۇردەلى جوندەۋ جۇمىستارى اياقتالىپ قالعانىن، ءوزى دە بۇل حاباردى اسىعا كۇتىپ جۇرگەنىن حابارلادى. "الاقاي! دوستار، ەندى ماعان ۇرىسپايسىزدار، سوعان وتە قۋانىشتىمىن! مەن دە بۇل جاڭالىقتى قاتتى كۇتتىم. چەتسكايا كوشەسىندەگى كۇردەلى جوندەۋ جۇمىستارىن اياقتالىپ قالدى. وتە قۋانىشتىمىن"، - دەپ جازدى اكىم.

مەيرام قوجىقوۆتىڭ ايتۋىنشا، بۇعان دەيىن بۇل اۋماقتا جوندەۋ جۇمىستارى جۇرگىزىلىپ، دۇيسەمبەكوۆ كوشەسىنەن بۇقار جىراۋ داڭعىلىنا دەيىن اينالما كوشەدەن وتەتىن جول اشىلعان. "جوندەۋ جۇمىستارى نەگە كەشىكتىرىلگەنىن تۇسىندىرەيىن، بىرىنشىدەن، جول وتە ۇزاق – 4،5 كم. بۇل ءبىر جاز ماۋسىمى ءۇشىن وتە كوپ. مۇنداي جوبانى جۇزەگە اسىرۋ ءبىزدىڭ كليماتتىق جاعدايىمىزدى ەسكەرىپ، مەملەكەتتىك ساراپتامانىڭ قورىتىندىسى 20 ايعا سوزىلادى. ەكىنشىدەن، جول استىنداعى باستاپقى زەرتتەۋ كەزىندە كورىنبەگەن كوپتەگەن جەلىنى تاپتىق. بولاشاقتا اپات بولا قالسا، جاڭا جول جامىلعىسىن بۇزباۋ ءۇشىن ولاردى باسقا جەرگە كوشىردىك. ۇشىنشىدەن، ەكى جەرۇستى جىلۋ كومپەنساتورىن جەراستىنا اۋىستىرۋ كوپ ۋاقىتتى قاجەت ەتتى. تورتىنشىدەن، جاڭبىر سۋىنىڭ جاڭا جۇيەسىن ورناتتىق. بەسىنشىدەن، كوشە قيىلىستارىن قالپىنا كەلتىرۋ جۇمىستارىن جۇرگىزىپ، سىرتقى جارىقتاندىرۋدىڭ جاڭا جەلىسىن ورناتتىق"، - دەدى اكىم.

قوجىقوۆتىڭ ايتۋىنشا، الداعى جىلى قاراعاندىدا تەك تروتۋارلاردى اباتتاندىرۋ جۇمىستارى جۇرگىزىلمەك.