3 قاراشا كۇنى 31 ارنادا "ايتىس الاڭى" باعدارلاماسىنىڭ جارتىلاي فينالدىق جانە فينالدىق كەزدەسۋىنىڭ ءتۇسىرىلىمى بولادى دەگەندى ەستىپ، ءتۇسىرىلىم بارىسىن ءوز كوزىمىزبەن باقىلاۋدى ءجون كورىپ، ءتۇسىرىلىم الاڭىنا جول تارتتىق.

          اتالمىش جوبا كورەرمەن نازارىنا 12 قىركۇيەكتەن باستاپ ۇسىنىلعان بولاتىن. "ايتىس الاڭى" جوباسى قازاقستاننىڭ تۇكپىر- تۇكپىرىنەن ادۋىندى، مايتالمان 12 اقىننىڭ الاڭعا جينالۋىمەن باستالعان.  ولاردىڭ قاتارىنا تالاي ايتىستان قانجىعاسى قۇر كەتپەگەن، اۋزى دۋالى ايتىسكەرلەر: مۇحتار نيازوۆ، بولاتبەك ورازبايەۆ، مەيىربەك سۇلتانحان، رينات زايتوۆ، رۇستەم قايىرتاي، ەرشات قايبولدين سىندى اقىندار. تاعى ايتىسقا جاڭادان قادام باسىپ كەلە جاتقان جاس اقىندار دا قاتىستى. ءوزىنىڭ ءادىل باعاسىن بەرىپ، ايتىسكەرلەرگە سىني كوزقاراستارىن ايتپاققا ءادىل قازى القالارى تاعايىندالعان. بەلگىلى اقىن، ايتىس جاناشىرى ءجۇرسىن ەرمان، كومپوزيتور التىنبەك قورازبايەۆ پەن باۋىرجان جاقىپ  تورەلىك ەتتى.

           - بۇل جوبانىڭ باستى ەرەكشەلىگى- جاستاردىڭ ايتىسقا قىزىعۋشىلىعىن ارتتىرۋ، ايتىستى باسقا قىرىنان كورسەتۋگە، ياعني تىڭ يدەالارمەن بايىتىپ، باسقا فورماتتا كورەرمەن نازارىنا ۇسىنباققا جانە وسى ارقىلى جاس كورەرمەندەردى ايتىسقا تارتۋ ماقساتىندا ۇيىمداستىرىلعان. اقىندار ەلىمىزدىڭ ءار ايماعىنان كەلگەن سوڭ، ءبىز ولاردى تۇرمىستىق جاعىنان قامتاماسىز ەتىپ وتىرامىز. سونداي - اق، شارشى الاڭدا اقىندارعا ءسوز ەركىندىگىن بەردىك. ءبىز بۇعان دەيىن دە باسقا جوبالاردى قولعا العان بولاتىنبىز، بۇل جوبا باسقا جوبالارعا قاراعاندا اۋقىمدى بولعاندىقتان،  ءوز كۇشىمىزدى سالۋعا تىرىسىپ جاتىرمىز- دەيدى "ايتىس الاڭى" جوباسىنىڭ ۇيىمداستىرۋشىسى ابزال مامان.

         اتالمىش باعدارلاما ەكى بولىمنەن تۇرادى: العاشقى ءبولىمى: "تاقىرىپتىق ايتىس". بۇل بولىمىندە ايتىسكەرلەرگە "ينفورمبيۋرودا" كورسەتىلگەن وزەكتى اقپاراتتاردىڭ ۇزىندىسىنە ساي تاپسىرما بەرىلىپ، سىنعا تۇسەدى. ال، ەكىنشى ءبولىمى: "پاروديالىق ايتىس". اقىندار بۇل بولىمدە بەلگىلى ءبىر تۇلعانىڭ اتىمەن شارشى الاڭدا جەكپە-جەككە شىعادى، ياعني باس تورەشى ءجۇرسىن ەرمان 9 ۇياشىقتىڭ بىرىنەن ۇياشىق تاڭداپ، اقىنداردىڭ كىمنىڭ اتىنان سايىسقا تۇسەتىنىن ايتادى.

        قازىرگى ۋاقىتتا ىرىكتەۋ اياقتالىپ، 4 اقىن وزا شاۋىپ الدىعا شىعادى. توپ جارعان اقىندار جارتىلاي فينالدا ب ا ق سىنايدى. بۇعان دەيىن دە وزەكتى تاقىرىپتاردى تىلگە تيەك ەتكەن اقىندار، جارتىلاي فينالدا "كەلىن مەن ەنە"، "قازىرگى سەريالدار" تاقىرىبىن قوزعاسا، ايتىستىڭ ەكىنشى ءبولىمى، ياعني "پاروديالىق ايتىستا" كارىم ءماسىموۆ پەن يمانعالي تاسماعامبەتوۆ، مەيرامبەك بەسپايەۆ پەن مس سايلاۋبەكتىڭ اتىنان جىر تولعايدى. ال، وسى ەكى ايتىستان ۇزدىك شىققان قوس ايتىسكەر بىردەن فينالعا شىعادى. اقتىق سىندا "قازاق حاندىعىنىڭ 550 جىلدىعىن" ءسوز ەتسە، پاروديادا ءابىلقايىر حان مەن كەنەسارى بوپ ايتىسادى. 

        ايتا كەتەيىك، توپتان سۋىرىلىپ، ات باسى الدا كەلگەن ايتىسكەرلەرگە "ايتىس الاڭى" جوباسى تاراپىنان 2 ميلليون تەڭگە كولەمىندە قوماقتى سىياقى تابىس ەتىلەدى. جوبانىڭ باستى دەمەۋشىسى رەتىندە: "ارمان شاي" كومپانياسىنىڭ تاراپىنان دا سىيلىقتار ۇسىنىلادى.

       "ايتىس الاڭى" جوباسى ءوزىنىڭ جاڭا فورماتتا، تىڭ باستامالاردىڭ ناتيجەسىندە كورەرمەن نازارىنا ۇسىنىلىپ وتىر. حالقىمىزدىڭ قانىنا سىڭگەن اتا ءداستۇرىمىزدى تانىتۋ ءۇشىن ايتىس تاپتىرماس قۇرال رەتىندە كورسەتىلگەن، سوندىقتان دا بۇل جوبانىڭ ۇلت ۇلاعاتىن ۇلىقتاۋعا ۇپايى باسىم.

گۇلدەن ءابدىباقىت