قاراعاندى وبلىستىق سوتىندا «احمەتوۆ ءىسى» بويىنشا «توپار جىلىجايلارىنا» قاتىستى جەتىنشى ەپيزود بويىنشا كۋاگەرلەردەن جاۋاپ الىنۋدا. ايتارلىعى، سوتقا جاۋاپ بەرۋگە شاقىرىلعان كۋاگەرلەردىڭ بارلىعى «توپار حولدينگتىك كومپانياسى» ءجشس-نىڭ يەسى سەرىك احمەتوۆتىڭ ءوزى بولعانىن حابارلادى. 6 قاراشاداعى سوت وتىرىسىندا كۇدىكتى عۇمار راقىمجانوۆتىڭ كومەكشىسى ەرنار نۇركەيەۆتەن جاۋاپ الىندى. ول 2014 جىلى تەرگەۋ ورگاندارىنىڭ تەكسەرىستەرى باستالعان كەزدە «توپار حولدينگتىك كومپانياسىنىڭ» قۇرامىنا كىرەتىن كاسىپورىنداردىڭ فورمالدى قۇرىلتايشىلارىنىڭ باسقوسۋى بولعانى تۋرالى اڭگىمەلەدى.

بۇعان دەيىن سوتتا تۇسىنىك بەرگەن «توپار جىلىجايلارى» ءجشس-نىڭ ديرەكتورى الەكساندر زابيروۆ 2014 جىلدىڭ كۇزىندە قاراعاندى وبلىسى اكىمىنىڭ كەڭەسشىسى ع. راقىمجانوۆتىڭ كومەكشىسىنىڭ قالا سىرتىنداعى ۇيىندە جينالىس بولعانىن حابارلاعان-دى. كەيىنىرەك سوتتا ا. زابيروۆتىڭ وسى ءسوزىن كۋاگەر ەلەنا ۆەچكينزوۆا دا راستادى. «بۇل وقيعا 2014 جىلدىڭ قازان ايىندا بولعان. ماعان راقىمجانوۆتىڭ ءوزى نە كومەكشىسى تەلەفون سوعىپ، بارلىق كاسىپورىنداردىڭ جەتەكشىلەرىنە باسقوسۋ تۋرالى حابارلاۋدى تاپسىردى. ۆيشنيەۆكا (قازىرگى اتاۋى ارشالى) كەنتىندەگى جەر ۇيلەردىڭ بىرىندە كەزدەستىك. ەستۋىمشە، ول راقىمجانوۆتىڭ كومەكشىسىنىڭ ءۇيى ەكەن. سول جەردە بىر-بىرىمىزبەن جاقىنىراق تانىسىپ، ءار كومپانيانىڭ جاعدايىن تالقىلادىق»،- دەدى ول 4 قاراشاداعى سوت وتىرىسىندا.

الدىڭعى ەكى كۋاگەردىڭ سوتتاعى ءسوزىن ع. راقىمجانوۆتىڭ كومەكشىسى ەرنار نۇركەيەۆ تە راستادى. ول بولعان وقيعانى بىلايشا اڭگىمەلەدى: «بۇل وقيعا شامامەن وسىدان ءبىر جىل بۇرىن بولعان. جۇمىستان كەيىن مەن، جۇرگىزۋشى جانە ع. راقىمجانوۆ ۇشەۋمىز س. احمەتوۆتىڭ تەلمان كەنتىندەگى ۇيىنە باردىق. جۇرگىزۋشى ەكەۋمىز كولىكتىڭ ىشىندە قالدىق. راقىمجانوۆ ۇيگە كىرىپ كەتتى دە، ءبىر ساعاتتان كەيىن شىقتى. ءبىز كەلگەن جولىمىزبان كەرى قايتتىق. جول ۇستىندە راقىمجانوۆ ماعان جينالىس وتكىزەتىن جەر تابۋ قاجەتتىگىن ايتتى. ەرتەڭىنە مەن بىرنەشە كونفەرەنس-زالداردى ۇسىندىم. ءبىراق ول بارىنەن باس تارتىپ، بولمەنى قالا سىرتىنان ىزدەۋىمدى ءوتىندى. سول كەزدە ويىما ارشالى كەنتىندەگى اكە-شەشەمنىڭ ءۇيى تۇسە كەتتى. راقىمجانوۆ تا بۇعان بىردەن كەلىستى. ءسويتتى دە ماعان كەزدەسۋگە زابيروۆتى، ۆەچكينزوۆانى، مۇشتاقوۆتى، ءشيمپفتى جانە تاعى باسقالاردى شاقىرۋدى تاپسىردى. مەن بارىنە حابارلاسىپ، باس قوساتىن جەردىڭ مەكەن-جايىن ايتتىم. سول كۇنى تۇسكە تامان اتالعان ادامداردىڭ بارلىعى اكە-شەشەمنىڭ ۇيىندە باس قوستى. جينالىس توردەگى بولمەدە ءوتتى. ولار ەسىكتى جاۋىپ الىپ، 1،5-2 ساعات وتىردى. اڭگىمەنىڭ نە جونىندە بولعانىن ەستىگەن جوقپىن».

سونداي-اق ەرنار نۇركەيەۆ سوتقا بەرگەن تۇسىنىگىندە «توپار حولدينگتىك كومپانياسى» ءجشس-نىڭ كاسىپورىندارى وندىرگەن ونىمدەردى پرەمەر-مينيسترى سەرىك احمەتوۆتىڭ ۇيىنە ءوزى بىرنەشە رەت جەتكىزگەنى تۋرالى اشىپ ايتتى. 2013 جىلدىڭ باسىندا ع. راقىمجانوۆ وعان  ع. ماتايەۆتىڭ جۇرگىزۋشىسى الىبەكتىڭ تەلەفونىنىڭ ءنومىرىن بەرەدى. ەرنار «توپاردان» شىعارىلىپ، اق پاكەتتەرگە سالىنعان قيارلار مەن قىزاناقتاردى الىبەك ارقىلى ع. ماتايەۆتىڭ جانە س. احمەتوۆتىڭ ۇيىنە جىبەرىپ تۇرعان. «مەن ۇنەمى الىبەكپەن تەلەفونى ارقىلى حابارلاسىپ، وسى پاكەتتەردى بەرىپ وتىردىم. كەي كەزدەرى ونىڭ ۋاقىتى بولماعاندا س. احمەتوۆتىڭ جۇرگىزۋشىسى قۋاندىقتىڭ وزىنە اپاراتىنمىن. الگى ونىمدەردى ماتايەۆتىڭ ۇيىنە جانە تەلمان كەنتىندەگى احمەتوۆتىڭ دە ۇيىنە اپارعان كەزدەرىم بولدى. كەيبىر قيارلار مەن قىزاناقتاردى تالداۋ جاساۋعا الىپ وتىراتىن»،- دەپ ءتۇسىندىردى ە. نۇركەيەۆ.

ءامينا باكىر