قازاقستاننىڭ ۇلتتىق ەكونوميكا ءمينيسترى ەربولات دوسايەۆ ەل اراسىنداعى رەسپۋبليكالىق بيۋدجەتتىڭ قيىن جاعدايى تۋرالى ۇرەيدى جۋرناليستەر تۋعىزىپ ءجۇر دەپ ايىپتادى. بۇل تۋرالى «قامشى» پورتالى حابارلايدى.

پارلامەنتكە كەلىپ رەسپۋبليكالىق بيۋدجەتكە قاتىستى تۇسىنىك بەرگەن ە. دوسايەۆ مىرزا جۋرناليستەردىڭ سۇراقتارىنا دا جاۋاپ بەردى.

رەسپۋبليكالىق بيۋدجەتكە قاتىستى قويىلعان سۇراقتارعا «ازىرگە ەشتەڭە ايتا المايمىن. ءالى ەشتەڭە دايىن» ەمەس دەگەن مينيستر جۋرناليستەردىڭ وزىنە تاپ بەردى.

«ەل اراسىندا ۇرەيدى سىزدەر تۋعىزىپ جۇرسىزدەر. ءبىز ءتيىستى ەسەپتەر قاشان اياقتالاتىنىن، ۇلتتىق بانكتە تالقىلاۋ ءجۇرىپ جاتقانىن، بۇل پروسەستىڭ ءبارى جاريا تۇردە وتەتىنىن ايتتىق. بارلىعىنا ەسەپ بەرەمىز. قانداي دا ءبىر پارامەترلەردى ايتۋعا ءازىر ەرتە. ءبىز وسى زاڭ بويىنشا 1 جەلتوقسانعا دەيىن ۇلگەرەمىز» دەيدى ەربولات دوسايەۆ.

ەستەرىڭىزگە سالساق، پارلامەنتتە 2016-2018 جىلدارعا ارنالعان رەسپۋبليكالىق بيۋدجەت تۋرالى زاڭ تالقىلانىپ جاتىر. بۇعان دەيىن قارجى ۆيسە-مينيسترى لەنا كارمازينا جاعدايدىڭ كۇردەلى ەكەنىن، تەڭگە باعامى مەن ينفلياسيا دەڭگەيى الاڭداتۋشىلىق تۋعىزىپ وتىرعانىن مالىمدەگەن ەدى.