كەشە قازاقستان رەسپۋبليكاسىنىڭ ورتالىق سايلاۋ كوميسسياسىندا (وسك) «ايەلدەردىڭ، جاستاردىڭ جانە قوعامداعى الەۋمەتتىك وسال توپتاردىڭ سايلاۋ قۇقىقتارىنىڭ ساقتالۋىن قاداعالاۋ» تاقىرىبىندا سەمينار-ترەنينگ ءوتتى.
 استانادا ورنالاسقان ەۋروپاداعى قاۋىپسىزدىك جانە ىنتىماقتاستىق ۇيىمى (ەقىۇ) باعدارلامالار ءوفيسىنىڭ، اتالعان ۇيىمعا قاراستى دەمو­كراتيالىق ينستيتۋتتار مەن ادام قۇقىقتارى جونىندەگى بيۋرو­نىڭ، مينيسترلىكتەردىڭ، ورتالىق مەم­لەكەتتىك ورگانداردىڭ، قازاقستاندا پارلامەنتاريزمدى دامىتۋ قورىنىڭ جانە ۇكىمەتتىك ەمەس ۇيىمداردىڭ (ۇەۇ) وكىلدەرى قاتىسقان سەميناردىڭ اشىلۋ ساتىندە وسك ءتوراعاسىنىڭ ورىن­باسارى ۆلاديمير فووس جۇرت­شىلىققا ءوزىنىڭ قۇتتىقتاۋ ءسوزىن ارنادى. سونداي-اق، ول بۇل باسقوسۋدىڭ ماڭىزدىلىعىنا توقتالا كەلىپ، كورسەتىلگەن تاقىرىپ اياسىندا ءوزىنىڭ وي-پىكىرلەرىن جەتكىزدى.
– بۇگىنگى سەمينار-ترەنينگتىڭ ايەلدەردىڭ، جاستاردىڭ جانە حالىقتىڭ الەۋمەتتىك وسال توپتارىنىڭ سايلاۋ قۇقىقتارىنىڭ ساقتالۋىن قادا­عالاۋعا ارنالۋىنىڭ وزىندىك ءمانى بار. كوبىنەسە ەلدىڭ ءدال وسى توپتا­رى سايلاۋ ۇدەرىسىنە جەتكىلىكتى دەڭگەيدە تارتىلماي قالادى. سونىمەن قاتار، ولاردىڭ بيلىك ورگاندارىنا ۇسىنىلۋى دا جەتكىلىكسىز، – دەدى ۆ.فووس.
جيىن بارىسىندا استاناداعى ەقىۇ باعدارلامالار ءوفيسى باسشى­سىنىڭ ورىنباسارى ميركو گيۋنتەر سەمينارعا قاتىسۋشىلارعا ساتتىلىك تىلەي وتىرىپ، ازاماتتاردىڭ سايلاۋ قۇقىعىن زاڭمەن قورعاۋدى قامتاماسىز ەتۋ ماسەلەلەرىن كەڭىنەن ءسوز ەتتى.
ەقىۇ-نىڭ دەموكراتيالىق ينس­تي­تۋتتار مەن ادام قۇقىقتارى ءجونىن­دەگى بيۋروسىنىڭ (دياقب) سايلاۋ ءىسى بويىنشا كەڭەسشىسى راديۆوە گرۋيچ ءوز كەزەگىندە گەندەرلىك تەڭدىكتى ساقتاۋ تۇرعىسىندا باياندادى. ونىڭ ايتۋىنشا، گەندەرلىك ساياسات جانە ايەلدەر قۇقىقتارى تۋرالى كەيبىر نەگىزگى حالىقارالىق ستاندارتتار ماتىندەرىنىڭ سايلاۋ ۇدەرىسىنە تىكەلەي قاتىسى بار.
ال وسك مۇشەسى ءلاززات سۇلەيمەن ايەلدەردىڭ سايلاۋ ۇدەرىسىنە قاتىسۋىنا بايلانىستى ايتا كەلىپ، 2007-2015 جىلدار ارالىعىندا ەلىمىزدە وتكەن پارلامەنت سەناتىنىڭ، ءماجىلىستىڭ، ءماسليحاتتاردىڭ، سونداي-اق، اۋىل وكرۋگتەرى اكىمدەرىنىڭ سايلاۋلارىنا ەرلەر مەن ايەلدەردىڭ قاتىسۋىنا بايلانىستى جاسالعان قورىتىندى تالداۋ دەرەكتەرىن كەلتىردى.
قازاقستاندا پارلامەنتاريزمدى دامىتۋ قورىنىڭ پرەزيدەنتى زاۋرەش باتالوۆا حالىقتىڭ وسال توپتارىنىڭ ساي­لاۋ قۇقىقتارىن قورعاۋدى قامتا­ما­سىز ەتۋدەگى ازاماتتىق قوعامنىڭ رولىنە باسا نازار اۋداردى.
وسك مۇشەسى مارات سارسەمبايەۆ جوعارىدا ايتىلعان توپتاردىڭ ساي­لاۋ قۇقىقتارىنىڭ بۇۇ مەن ەقىۇ قۇجاتتارى اياسىندا ساقتالۋ ماسەلە­لەرىنە توقتالدى ءارى وسى جونىندەگى قازاقستان مەن ۇيىم اراقاتىناسىن ءسوز ەتتى.
سونىمەن قاتار، جيىندا قاتى­سۋ­شىلار سايلاۋ ناۋقاندارىندا ادام قۇقىقتارىن، حالىقارالىق باي­قاۋدى رەتتەيتىن بۇۇ مەن ەقىۇ-نىڭ قۇجاتتارىن تالقىلادى. بۇعان قوسا، ولار حالىقارالىق بايقاۋدىڭ ەرەكشەلىكتەرىن قاراستىرا كەلىپ، قازاقستان وكىلدەرىنىڭ ەقىۇ/دياقب ميسسيالارىنىڭ قۇرامىندا ءجۇرىپ جيناعان تاجىريبەلەرىمەن ءبولىستى.
ترەنينگ سوڭىندا قازاقستاندىق بايقاۋشىلاردىڭ تاجىريبەسىن ودان ءارى جەتىلدىرۋ باعىتىندا پىكىر الماسۋ بولدى.

دەرەككوز: ەگەمەن قازاقستان