الماتى اكىمدىگى رەسپۋبليكا الاڭىنداعى "تاۋەلسىزدىك تاڭى" ەسكەرتكىشىنىڭ نەگە قورشاۋعا الىنعانىن ءتۇسىندىردى. بۇل تۋرالى «قامشى» پورتالى قازاقپاراتقا سىلتەمە جاساپ حابارلايدى.

قالالىق مادەنيەت باسقارماسىنىڭ باسشىسىنىڭ مىندەتىن ورىنداۋشى ەربولات اۋەزوۆ قازاقپارات اگەنتتىگىنىڭ ارنايى ساۋالىنا جاۋاپ بەرىپتى. 

«ەسكەرتكىش ورناتىلعالى بەرى مادەني نىسانعا ارنايى جوندەۋ جۇمىستارى جۇرگىزىلمەگەن. سالدارىنان پوستامەنتتىڭ گرانيت تاقتايشالارى سىنىپ، بىر-بىرىنەن اجىراعاندىقتان، اعىمداعى جوندەۋ جۇمىستارى جۇرگىزىلىپ جاتىر. جۇمىس 25 قاراشادا اياقتالادى»، - دەدى ەربولات اۋەزوۆ.
ايتا كەتۋ كەرەك، جەلتوقسان مەن ساتبايەۆ كوشەلەرىنىڭ قيىلىسىنداعى «تاۋەلسىزدىك تاڭى» ەسكەرتكىشى 2006 جىلى ورناتىلدى. جۇمىستىڭ اۆتورى - قازاقستان ديزاينەرلەر وداعىنىڭ ءتوراعاسى تيمۋر سۇلەيمەنوۆ. 
اتالعان ەسكەرتكىش قازاننىڭ ايىنىڭ سوڭىندا قورشاۋعا الىنعان بولاتىن. قورشاۋ ىشىندە ەكى اپتاداي جۇمىس جۇرگىزىلگەن جوق. ءقازىر ەسكەرتكىشتى قالپىنا كەلتىرۋ جۇمىستارى باستالدى.