قازاقستاندا تۋبەركۋلەزبەن سىرقاتتانۋ 6 جىلدىڭ ىشىندە 1،6 ەسەگە تومەندەدى. بۇل تۋرالى ق ر دەنساۋلىق ساقتاۋ جانە الەۋمەتتىك دامۋ ۆيسە-مينيسترى الەكسەي سوي استانا قالاسىندا وتكەن «كوشى-قون جانە تۋبەركۋلەز: ورتالىق ازيا ەلدەرىندە تۋبەركۋلەزدى ترانسشەكارالىق باقىلاۋ» اتتى ايماقتىق كەزدەسۋدە مالىمدەدى. بۇل تۋرالى «قامشى» پورتالى قازاقپاراتقا سىلتەمە جاساپ حابارلايدى.  

 «سالاماتتى قازاقستان» مەملەكەتتىك باعدارلاماسىن جۇزەگە اسىرۋ اياسىندا حالىقتىڭ تۋبەركۋلەزبەن سىرقاتتانۋىن تومەندەتۋدە ايتارلىقتاي جەتىستىكتەرگە قول جەتكىزدىك. ەلىمىزدە اتالعان اۋرۋمەن سىرقاتتانۋ 6 جىلدىڭ ىشىندە 1،6 ەسەگە، ونىڭ سالدارىنان تۋىندايتىن ءولىم-جىتىم 2،6 ەسەگە تومەندەدى»، - دەدى ا. سوي.

ۆيسە-مينيستر ءارتۇرلى ساراپتامالىق باعالاۋلار بويىنشا قازاقستان جىل سايىن 300-500 مىڭنان 1 ملن-عا دەيىن ەڭبەك ميگرانتتارىن قابىلدايتىنىن، ولاردىڭ 15 پايىزى جۇقپالى اۋرۋلارمەن، ونىڭ ىشىندە تۋبەركۋلەز جانە ايتۆ-مەن اۋىراتىنىن جەتكىزدى. وتاندارىنا اۋرۋى انىقتالعان 10 ادامنىڭ كوپ دەگەندە بىرەۋى عانا قايتارىلادى. وزگە ميگرانتتار ەلىمىزدىڭ دەنساۋلىق ساقتاۋ جۇيەسىنە ءوز اۋىرتپاشىلىعىن جۇكتەپ وتىر. شامامەن ميگرانتتار اعىنىنىڭ ۇشتەن ءبىر بولىگى 2 ءىرى قالانىڭ ەنشىسىندە: الماتى جانە استانا.

رەسپۋبليكادا تۋبەركۋلەزبەن سىرقاتتانعان ميگرانتتارعا تۋبەركۋلەزگە قارسى كومەك شارالارى ددسۇ ەۋروپالىق ايماعىنداعى (2012 ج. ۆولفحەزەدەگى ءباتۋالاستىق مالىمدەمەسى) تۋبەركۋلەزدى ترانسشەكارالىق باقىلاۋ مەن ەمدەۋدىڭ ەڭ تومەنگى پاكەتىنە سايكەس جۇزەگە اسىرىلادى. بۇل - ميگرانتتار اراسىنداعى تۋبەركۋلەز بەن كوپتەگەن ءارى كەڭ كولەمدى دارىلەرگە تۇراقتىلىعى بار تۋبەركۋلەزدى دياگنوستيكالاۋدىڭ ساپاسى مەن قولجەتىمدىلىگىن ارتتىرۋ بولىپ تابىلادى. شارالار جيتس، تۋبەركۋلەز، بەزگەك اۋرۋلارىمەن كۇرەس بويىنشا جاھاندىق قور گرانتىنىڭ شەڭبەرىندە دەنساۋلىق ساقتاۋ سالاسىندا ءبىلىم بەرۋ جانە قايىرىمدىلىق شارالارىن وتكىزۋمەن اينالىساتىن حالىقارالىق ۇكىمەتتىك ەمەس «Project HOPE» (پروەكت حوۋپ) گۋمانيتارلىق ۇيىمىمەن بىرلەسە وتىرىپ جۇرگىزىلەدى.

قازاقستاندا 2014-2020 جىلدارعا ارنالعان تۋبەركۋلەزبەن كۇرەس بويىنشا كەشەندىك جوسپار جۇزەگە اسىرىلۋدا. اتالعان جوسپارعا ميگرانتتار اراسىندا تۋبەركۋلەزدى ەمدەۋ مەن الدىن الۋ بويىنشا قىزمەتتەردى جەتىلدىرۋ، جوعارعى دەڭگەيدە كەزدەسۋلەردى ۇيىمداستىرۋ ارقىلى ايماقتىق ديالوگقا باستاماشىلىق ەتۋ شارالارى كىرەدى.

كەزدەسۋ اياسىندا ەكى كۇننىڭ ىشىندە جۇمىس توپتارىندا جانە پلەنارلىق وتىرىستاردا جۋىق اراداعى 12 ايعا جۇمىس قۇرالى بولاتىن ارەكەتتەر جوسپارى (جول كارتاسى) تالقىلاناتىن بولادى.

ەستەرىڭىزگە سالا كەتەيىك، قازاقستاندا «Project HOPE» ءوزىنىڭ تۋبەركۋلەزبەن كۇرەس باعدارلاماسىن 1993 جىلدان باستاعان بولاتىن. سول ۋاقىتتان بەرى تۋبەركۋلەزدى باقىلاۋ بويىنشا ءارتۇرلى جوبالاردى ەنگىزۋگە قاتىسىپ كەلەدى. شاراعا قازاقستان، قىرعىزستان، تاجىكستان، رەسەي جانە وزبەكستان ەلدەرىنىڭ جەتەكشى ماماندارى، دەنساۋلىق ساقتاۋ جانە كوشى-قون ماسەلەلەرىمەن اينالىساتىن مينيسترلىك پەن ۆەدومستۆولاردىڭ، دۇنيەجۇزىلىك دەنساۋلىق ساقتاۋ ۇيىمىنىڭ، كوشى-قون حالىقارالىق ۇيىمى جانە ۇلتتىق تۋبەركۋلەزگە قارسى ورتالىقتارىنىڭ، سونىمەن قاتار ۇەۇ وكىلدەرى قاتىستى.