ۋكراينا پرەزيدەنتى پەتر پوروشەنكو ۋكراين پاسپورتىنان ورىس تىلىندەگى سوزدەردى الىپ تاستاۋ تۋرالى پەتيسياعا جاۋاپ بەردى، - دەپ حابارلايدى «قامشى» پورتالى ازاتتىققا سىلتەمە جاساپ.
پرەزيدەنتتىڭ رەسمي سايتىندا جاريالانعان جاۋاپتا: «ۋكراينا ازاماتتارىنىڭ ۋكراينا پاسپورتتارىندا جوعارعى رادا اگرەسسيا جۇرگىزىپ وتىر دەپ تاپقان مەملەكەتتىڭ تىلىندە اقپاراتتى قايتالاپ جازۋعا قارسىلىعىن قولدايمىن» دەلىنگەن.
ۋكراينانىڭ ەۋروپا وداعىنا كىرىگۋ ۇمتىلىسىن ەسكەرە وتىرىپ، پوروشەنكو ۋكراينا پاسپورتىنداعى اقپاراتتى قوسىمشا اعىلشىن تىلىندە جازۋدى ۇسىنعان. پوروشەنكونىڭ سوزىنە قاراعاندا، ول بۇل ۇسىنىستى ۇكىمەتكە جولداپ قويعان.
پوروشەنكو بۇعان دەيىن اعىلشىن ءتىلى ۋكراينادا ۋكراين تىلىمەن قاتار «ەكىنشى جۇمىس ءتىلى» مارتەبەسىن العانىن قولدايتىنىن بىلدىرگەن.
«ۋكراينسكايا پراۆدا» گازەتىنىڭ حابارلاۋىنشا، تامىز ايىندا لۆوۆ قالاسىنىڭ تۇرعىنى سۆياتوسلاۆ ليتينسكيي ۋكراينا ازاماتتىعى تۋرالى پاسپورتىن ورىس تىلىندەگى اقپاراتسىز الۋعا سوت ارقىلى قول جەتكىزگەن.
پىكىر قالدىرۋ