بۇگىن «بەينەۋ-بوزوي» ۋچاسكەسىندە «بەينەۋ-بوزوي-شىمكەنت» (ببش) ماگيسترالدىق گاز قۇبىرىن (مگق) پايدالانۋعا بەرۋ رەسمي  ءراسىمى ءوتتى، - دەپ حابارلايدى «قامشى» پورتالى قازاقپاراتقا سىلتەمە جاساپ. 

«ببش» مگق قۇرىلىسى قازاقستان رەسپۋبليكاسىن ۇدەمەلى  يندۋستريالىق-يننوۆاسيالىق دامىتۋ جونىندەگى مەملەكەتتىك باعدارلاماعا كىرەدى. وسى جوبانىڭ ارقاسىندا رەسپۋبليكانىڭ وڭتۇستىگىن باتىستاعى كەن ورىندارىنان وتاندىق تابيعي گازبەن تۇراقتى قامتاماسىز ەتۋ مۇمكىندىگى تۋدى.

«بەينەۋ-بوزوي» ۋچاسكەسىن - گاز قۇبىرىن پايدالانۋعا بەرۋ ءوزىنىڭ ماڭىزدىلىعىنا قاراي تاريحي وقيعا بولىپ تابىلادى، ول ەلىمىزدىڭ بارلىق ماگيسترالدىق گاز قۇبىرلارىن ءبىرىڭعاي گاز تاسىمالداۋ جۇيەسىنە قوستى. بۇل قازاقستاننىڭ اۋماعى ارقىلى كەز كەلگەن باعىتتا گاز تاسىمالداۋدى ءارتاراپتاندىرۋعا جانە يمپورتتىق گازعا دەگەن تاۋەلدىلىكتى تولىعىمەن جويۋعا مۇمكىندىك بەردى. وسىلايشا، قازترانسگاز ترانزيتتىك الەۋەتتى ارتتىرۋ جانە ەنەرگيا رەسۋرستارىن تاسىمالداۋ بويىنشا مەملەكەت باسشىسى العا قويعان مىندەتتەردى ىسكە اسىرۋدى جالعاستىرادى، - دەپ اتاپ ءوتتى «قازترانسگاز» اق باسقارما ءتوراعاسى قايرات شارىپبايەۆ.

وسى جوبانى اياقتاۋ 2016 جىلدىڭ ءساۋىر ايىنا جوسپارلانعان بولاتىن، الايدا گاز قۇبىرى 5 اي بۇرىن - جىلىتۋ ماۋسىمىنىڭ باستالۋىنا قاراي پايدالانۋعا ەنگىزىلدى. بۇدان باسقا، ءتيىمدى مەنەدجمەنت پەن يننوۆاسيالىق باسقارۋ ناتيجەسىندە «قازترانسگاز» اق اتالعان ۋچاسكەنى سالۋ بارىسىندا باستاپقى جوسپارلانعان سومادان شامامەن 150 ملرد. تەڭگە (500 ميلليون اقش دوللارى) ۇنەمدەدى. الەمدىك ەكونوميكاداعى تۇراقسىز احۋال جانە قارجىلاندىرۋ كوزدەرىنىڭ شەكتەلۋى جاعدايىندا ءدال وسىنداي ۇنەمدى تاسىلدەر ينفراقۇرىلىمدىق جوبالاردى دامىتۋدى جالعاستىرۋعا مۇمكىندىك بەرەدى.

سونىمەن قاتار ماگيسترالدىق گاز قۇبىرىنىڭ ارقاسىندا رەسپۋبليكا حالقىنىڭ تەڭ جارتىسى تۇراتىن وڭتۇستىك وبلىستارداعى 577 ەلدى مەكەنگە قوسىمشا گاز بەرىلەتىن بولادى.

ەسكە سالا كەتەيىك، جوبانى ىسكە اسىرۋ 2010 جىلعى جەلتوقساندا باستالعان بولاتىن، قازاقستاندىق «قازترانسگاز» جانە  قىتايلىق «Trans-Asia Gas Pipeline Cوmpany Limited» كومپانيالارىنىڭ تەڭ ۇلەستىك نەگىزىندە «بەينەۋ - شىمكەنت» گاز قۇبىرى» ج ش س قۇرىلدى. گاز قۇبىرىن پايدالانۋعا ەنگىزۋ قازاقستان رەسپۋبليكاسىنىڭ بارلىق ماگيسترالدىق گاز قۇبىرلارىن: «سويۋز»، «ورتا ازيا - ورتالىق»، «بۇحارا - ورال»، «بۇحارا گازدى اۋدانى  - تاشكەنت - بىشكەك - الماتى»، «گازلي - شىمكەنت»، «قازاقستان - جۇڭگو» ءبىرىڭعاي گاز تاسىمالداۋ جۇيەسىنە بىرىكتىرۋگە مۇمكىندىك بەرەدى.