شىمكەنتتىك پوليسەيلەر جاس قىزدى ولىمنەن امان الىپ قالدى. بۇل تۋرالى «قامشى» پورتالى TVK-عا سىلتەمە جاساپ دەپ حابارلايدى.

وقيعا 20 قاراشا كۇنى تۇندە تىركەلدى. جاس قىز رىسقۇلوۆ كوشەسىندە ورنالاسقان كوپىردەن سەكىرىپ كەتپەكشى بولعان. ءوتىپ بارا جاتقان ادامدار قىزدىڭ بۇل ارەكەتى تۋرالى پوليسياعا حابار بەرگەن. وقيعا بولعان جەرگە كەلگەن ءتارتىپ ساقشىلارى قىزدى ارەڭ قۇتقارىپ قالدى.

ەسكە سالا كەتەيىك، الماتىدا 8 قاراشا كۇنى پوليسەيلەر ءدال وسىنداي وقيعانىڭ الدىن العان بولاتىن.  قالالىق ءىىد مالىمەتىنشە، اۋەزوۆ اۋدانى بويىنشا "بۋران-11" جول-پاترۋلدىك پوليسياسىنىڭ ەكيپاجى 8 قاراشا كۇنى حابارلاما العان. "ءبىر مينۋتتان كەيىن ءبىز قابدولوۆ پەن سايىن كوشەلەرىنىڭ قيىلىسىنا كەلىپ جەتتىك. جولدىڭ ارعى بەتىندەگى قىز ءوزىن ولتىرۋگە شەشىم قابىلداعان ەدى. ءبىز جاقىنداۋعا مۇمكىندىك الۋ ءۇشىن ونىمەن الىستان اڭگىمەلەستىك"، - دەدى الماتى ءىىد جول-پاترۋلدىك پوليسيا پولكىنىڭ ينسپەكتورى ءادىل ءادىلحانوۆ.

اڭگىمەلەسۋ بارىسىندا پوليسەيلەر قىزدىڭ مۇنداي قادامعا وتباسىنداعى كەلەڭسىزدىكتەردەن بارعالى وتىرعانىن انىقتاعان. "ءبىزدىڭ بىلۋىمىزشە، ونىڭ ەمشەكتەگى بالاسى بار. بۇل ءبىزدىڭ اڭگىمەنى ۇزارتۋىمىزعا سەبەپ بولدى. ءبىز وعان بالاسى تۋرالى ويلاۋىن ۇسىندىق. ول بىرنەشە ۋاقىت بويى تومەن قاراپ تۇردى دا، سەكىرىپ كەتپەكشى بولدى. سول كەزدە مەن جۇگىرىپ بارىپ ونى ۇستاپ قالدىم. وسىلايشا قىز قۇتقارىلدى"، - دەدى قۇقىق قورعاۋ ورگاندارىنىڭ قىزمكەرلەرى.