بۇگىن تاڭەرتەڭ الماتىدا ۇستى-ۇستىنە ءۇش مارتە جەر سىلكىندى. وسىعان بايلانىستى الماتى قالاسىنىڭ توتەنشە جاعدايلار جونىندەگى دەپارتامەنتى تۇسىنىكتەمە بەرىپ، تۇرعىنداردىڭ الاڭداۋىنا ەش نەگىز جوق دەپ مالىمدەدى.

بۇل تۋرالى «قامشى» پورتالى قازاقپاراتقا سىلتەمە جاساپ  حابارلايدى.

«بىزگە كەلىپ تۇسكەن ساراپتامالىق اقپاراتقا سايكەس، الماتى قالاسىندا قالا تۇرعىندارى ءۇشىن ءقاۋىپ تۋدىراتىنداي ەشقانداي ءىرى جەر سىلكىنىستەرى، ءزىلزالا بولمايدى. بۇگىنگى وقيعالارعا قاتىستى جەر استى ءدۇمپۋى سەزىلگەن جوق. ءقاۋىپتى جەر سىلكىنىسى بولۋى مۇمكىن دەگەن اقپارات كەلىپ تۇسكەن جاعدايدا تۇرعىندارعا الدىن الا سمس-حابارلامالار جىبەرىلەتىن بولادى»، - دەپ اتاپ ءوتتى الماتى قالالىق تجد باسپا ءسوز حاتشىسى ساندۋعاش بايمۇحامبەتوۆا.

ەستەرىڭىزگە سالا كەتەيىك، «ق ر بعم عك ستاە» مم سەيسميكالىق ستانساسى جەلىسىنىڭ حابارلاۋىنشا، 21 قاراشا كۇنى ءۇش رەت جەر سىلكىنىسىن تىركەلدى.

العاشقىسىنىڭ وشاعى الماتى قالاسىنان باتىسقا قاراي 473 شاقىرىم جەردە قىرعىزستان اۋماعىندا ورنالاسقان. جەر سىلكىنىسىنىڭ ەنەرگەتيكالىق كلاسى - 11،1، ماگنيتۋداسى - 5،1. تەرەڭدىگى - 5 شاقىرىم.

ەكىنشىسى جەرگىلىكتى ۋاقىت بويىنشا ساعات 06.46-دا جەر سىلكىنىسى تىركەلدى. ءزىلزالا وشاعى قىرعىزستان اۋماعىندا، الماتى قالاسىنان باتىسقا قاراي 467 شاقىرىم قاشىقتىقتا ورنالاسقان. جەر سىلكىنىسىنىڭ ەنەرگەتيكالىق كلاسى - 8.5. ماگنيتۋداسى - MPV 3.6. تەرەڭدىگى - 5 شاقىرىم. 
ءۇشىنشىسى الماتى ۋاقىتى بويىنشا تاڭعى ساعات 08.35-تە تىركەلدى. ونىڭ وشاعى الماتى قالاسىنان وڭتۇستىك-باتىسقا قاراي 486 شاقىرىم جەردە قىرعىزستان اۋماعىندا ورنالاسقان. جەر سىلكىنىسىنىڭ ەنەرگەتيكالىق كلاسى - 9.9، ماگنيتۋداسى - 4،1. تەرەڭدىگى - 0-5 شاقىرىم.