امەريكالىق ەر ادام 2001 جىلعى 11 قىركۇيەكتە بولعان تەررورلىق شابۋىلدار كەزىندە، سودان كەيىن تاياۋدا پاريجدە بولعان تەراكتىلەر كەزىندە امان قالعان، - دەپ حابارلايدى «قامشى» پورتالى Tengrinews.kz-كە سىلتەمە جاساپ.
32 جاستاعى ەر ادام ءوزىنىڭ ادام سەنگىسىز وقيعاسى جايلى "باتاكلان" تەاترىنان شىققاننان كەيىن تىلشىلەرگە ايتىپ بەرگەن.
11 قىركۇيەكتەگى تەررورلىق اكتىلەر كەزىندە ءوزىن مەتيۋ دەپ تانىستىرعان ەر ادام ەگىز عيماراتتىڭ ءبىرىنىڭ كىرەبەرىسىندە تۇرىپتى. ول وسى عيماراتقا جۇمىس بابىمەن كەلگەن ەكەن. جارىلىس بولعان ساتتە ول ءقاۋىپتى ايماقتان شىعىپ ۇلگەرەدى. "مەن مەنحەتتەننىڭ بويىمەن جۇگىردىم. ءبىراق "باتاكلاندا" بولعان وقيعا مىڭ ەسە قورقىنىشتى بولدى"، - دەيدى ول.
مەتيۋ تەاتر ىشىندە كونسەرت كورگەنىن ايتىپ بەردى، سول ۋاقىتتا تەاترعا لاڭكەستەر كىرىپ كەلىپ، ادامداردى اتا باستاعان. امەريكالىق مۇندا دا كىرەبەرىستە تۇرىپتى، اياعىنا وق ءتيىپتى. "اتىس بىرەر ساتكە توقتاعان كەزدە مەن سانتيمەترلەپ ەڭبەكتەپ شىعا بەردىم. سودان كەيىن ارەڭ دەگەندە ەسىكتى اشىپ، سىرتقا شىققاننان كەيىن ەس-تۇسىمدى بىلمەي قۇلاپ ءتۇستىم"، - دەدى امەريكالىق.
ەسكە سالا كەتەيىك، 14 قاراشاعا قاراعان ءتۇنى پاريجدە بەلگىسىز بىرەۋلەر ەڭ الدىمەن قالاداعى مەيرامحانالاردىڭ بىرىنە شابۋىل جاسادى. سونىمەن قاتار، فرانسيا-گەرمانيا ماچى ءوتىپ جاتقان "ستاد دە فرانس" ستاديونىنىڭ ماڭىنان دا جارىلىستىڭ دىبىسى ەستىلدى. لاڭكەستەر "باتاكلان" تەاترىندا ادامداردى كەپىلگە الدى. سوڭعى دەرەك بويىنشا، 129 ادام قازا تاۋىپ، 350 ادام جاراقاتتاندى. جەتى لاڭكەستىڭ كوزى جويىلدى.
پىكىر قالدىرۋ