مەملەكەت باسشىسى ن. نازاربايەۆ بۇگىن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىقتىڭ كوشى-قونى جانە جۇمىسپەن قامتىلۋى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىنا قول قويدى.
اتالعان زاڭ جوباسى ەلىمىزگە جوعارى بىلىكتى شەتەلدىك ماماندار تارتۋ ءۇشىن قولايلى جاعداي قالىپتاستىرۋ باعىتىندا پرەزيدەنتتىك بەس ينستيتۋسيونالدىق رەفورمانى جۇزەگە اسىرۋ جونىندەگى 100 ناقتى قادام – ۇلت جوسپارىن ىسكە اسىرۋعا، سونداي-اق حالىقتىڭ كوشى-قونى جانە جۇمىسپەن قامتىلۋى سالاسىنداعى ساياساتتى ودان ءارى جەتىلدىرۋگە باعىتتالعان.
سونداي-اق، زاڭدا شەتەلدە تۇراتىن قانداستارىمىزدى اتامەكەنگە قونىستاندىرۋدىڭ جانە ولاردى الەۋمەتتىك قامسىزداندىرۋدىڭ جاڭا مۇمكىندىكتەرى قاراستىرىلعان. زاڭ كۇشىنە ەنگەن سوڭ، وتانداستاردىڭ ەل ازاماتتىعىن الۋ مەرزىمى قىسقارىپ، تاعى ءبىرقاتار جەڭىلدىكتەر ۇسىنىلماق.
جاڭا زاڭ ءماتىنى اقپارات قۇرالدارىندا جاريالاناتىن بولادى.
كەلىپ تۇر اقوردانى التى ايلانعىم
(ەلباسىمىزدىڭ
ق ر «حالىقتىڭ كوشى-قونى» تۋرالى
زاڭىنا قول قويۋىنا
وراي)
ارتتاعى ەل ءۇمىت ارتىپ جىبەردى دەپ،
ءار كۇنى قايرتتانىپ، تۇرەم بىلەك.
پاتشاڭ ارمانىڭدى ورىنداسا،
جۇرەگىڭ كەتەدى ەكەن شىن ەلجىرەپ!
استانام الپامىستاي مارقايدى ءار كۇن،
ساپىندا ول بۇگىن ماسكەۋ، شاڭحايلاردىڭ...
قاعبانى ايلاناتىن قاجىلارداي،
كەلىپ تۇر اقوردانى التى ايلانعىم!!
ءبىر قازاق ءبىر قازاقتى جەتەلەسەڭ،
كەتەسىڭ ارالاسىپ ەتەنە سەن!
زاڭعا اناۋ قويعان قولىن نۇرەكەڭنىڭ،
بارىپ ءبىر قىسقىڭ كەلىپ كەتەدى ەكەن!!!
قۋانىش سىيلاسام دەپ ءار اپتادا،
جۇگىردىم ماجىلىسكە دالاق قاعا.
ايتىلىپ قالا ما دەپ جاقسى حابار،
تەلمىردى ەل «Facebook»-تەگى پاراقشاما.
اققۋلار ۇشسىن بەرى تۇتاس كولدەن،
باقىت قوي ەلىڭە كەپ، قۇشاققا ەنگەن!
ەسىگىن جازداي قاقتىم ءمينيستردىڭ،
قولىمدا ەسكى پورتفەل مۇقاش بەرگەن...
مىنەكي، ارتتا قالدى سونىڭ ءبارى،
ەلباسىم ەل تىلەگىن ورىندادى.
بۇل دا ءبىر يگىلىكپەن بىتكەن شارۋا،
ماڭگىلىك ەل بولۋدىڭ جولىنداعى.
...نەمەرە، شوبەرەڭدى مىنگەستىرىپ،
ەندى ءبىر جالتاقتاماي، شىن كوششى، جۇرت!
بۇل زاڭنىڭ ءمانى بولەك، ءجونى باسقا،
بىلگەنگە، ءبىر نۇكتەسى – ءبىر بەستىلىك!!!
اۋىت مۇقيبەك
24.11.2015
استانا
