كوزايىم-كوڭىل
جاقىننىڭ ءقادىرى
اياۋلى اناشىم ايمان جانپەيىس قىزىنىڭ،
ءقادىرلى قايىن ەنەم حانيزا تەمىروۆانىڭ،
اسىل جارىم قىمبات جولدىعۇل قىزىنىڭ
تۋىلعان كۇندەرىنە جىر-شاشۋ!
...ءتۇن تىلگىلەپ سانانى،
كۇن قىسقارىپ بارادى...
ەڭسە باسىپ، جانشىدى،
تەڭگەنىڭ ساتپاق بالاعى...
«شىقپا، جانىم، شىداشى...»
كەتە كورمە «ءتۇن اسىپ»...
قالاي قيام جاقىندى،
ءبارى، ءبارى شىن اسىل...
شىن جاناشىر اناشىم،
پەيىلى پاك بالاسىڭ...
سەنسىز مەنىڭ ءومىرىم،
تابا المايدى جاراسىم!
بىلمەگەندە ءجوندى ءبىز،
قامقور، قالقان بولدىڭىز.
ىستىققا دا كۇيدىڭىز،
سۋىققا دا توڭدىڭىز.
ۇيقىسىز تاڭ اتىرعان،
«قۇلىنىم!» دەپ شاقىرعان.
اينالايىن اناشىم،
«ايمان» دەگەن اتىڭنان!
باتىر قىزى اتاندىڭ،
جانپەيىستەي اتامنىڭ.
ارقالادىڭ اناشىم،
سالماق-جۇگىن اتاننىڭ...
ۇلىڭ ءۇشىن قۋاندىڭ،
ورگە شىقسا تاسى مىڭ.
اۋىرماشى انا-جان،
مىڭ جاساشى، اسىلىم!
******* ******* *******
...تۇبىنە ءتۇستىم تۇنىقتىڭ،
ءومىردىڭ ءمانىن شىن ۇقتىم.
تاعدىرىمەن تەل وسكەن،
ءۇش جۇرتى بار جىگىتتىڭ...
ءوز جۇرتىڭ – كۇنشىل، سوم الماس...
بارلىعىڭدى – كورە الماس،
جوقتىعىڭا – بەرە الماس،
جاقسى بولساڭ – كۇندەگەن،
جامان بولساڭ – جۇندەگەن...
قالادى سۇلدەر، قۇر دەنەڭ...
سىنشىل جۇرتىڭ – ناعاشىڭ،
اتىڭا تاققان تاعا شىن،
بارىڭدى بەرىپ جاعاسىڭ...
كىسى بولساڭ – سۇيەنگەن،
كىشى بولساڭ – كۇيىنگەن.
باعا مەن سىنىڭ – كۇيىڭنەن...
ءمىنشىل جۇرتىڭ – قايىنىڭ،
شاماسىن تانى جايىنىڭ،
كەرەگى – قولدىڭ ۇزىنى،
بەدەلىڭ – جاعاڭ قىزىلى،
اسىرساڭ عانا – جاعارسىڭ،
جاسىرساڭ – داۋعا قالارسىڭ...
سال-سەرى، كەربەز سىلقىمدار،
سەزىمنىڭ شوعىن جۇلقىڭدار!
سۇيەنىش، قورعان، تىلەۋقور،
جاناشىر ۇشەم جۇرتىم بار...
...تاعدىردىڭ تالاي تالاسى،
پەندەنىڭ – يمان پاناسى.
ەر جىگىتتىڭ بولادى –
ءۇش جۇرتى، ەكى اناسى...
قامقورشى پەيىل، دارا ءۇندى،
قايىرىم بويعا تارالدى.
حانىمنان كەم كورمەيمىن،
حانيزاداي انامدى!
اناما ايتسام بازىنا،
«اناشىم» دەگەن تازا ءۇن، ءا؟!
حانيزا – اراب تىلىندە،
قىمبات بايلىق، قازىنا!
ءبىر دىڭگەكتىڭ تەزىمىز،
سەزىمىمىزدى – سەزىڭىز...
مەيىرىمىنە شومىلعان،
قازىنامىز – ءوزىڭىز!
انانى سىيلاۋ – ۇلعا سىن،
انانى اقىن جىرلاسىن.
كوشىرمەڭىز سەكىلدى،
ومىرلىك جارىم قىمباتىم!
سىندارمەن بىتەر سىرالعى ءىس،
سۇتپەنەن سىڭگەن تۇرار كۇش...
جانىما مەنىڭ نۇر قۇيعان،
قىمباتىم ءۇشىن مىڭ العىس!
******* ******* *******
قىمباتىم مەنىڭ، سەرىگىم،
وزىمدەي سۇيەر سەنى كىم؟!.
داۋىلدا مەنى قۇلاتپاس،
سەزىمىڭ مەنەن سەنىمىڭ!
جالعاندا جالعىز - جارىمسىڭ،
كەشىمسىڭ، ءتۇنىم، تاڭىمسىڭ...
جاراتقان يەم بۇيىرتقان،
باعىمسىڭ، تاعىم، بارىمسىڭ!
ءومىردىڭ تاتقان كەرمەگىن،
قۋانىش، ءۇمىت، سەنگەنىم...
ەرتەڭگە بىرگە ۇمتىلعان،
سىڭارىمسىڭ سەن مەنىڭ!..
******* ******* *******
ءۇش اسىلىم، ءۇش ايىم،
شابىتتى قالاي تۇسايىن؟!.
قوس انام مەن جارىمدى،
قۇشاعىما قىسايىن!
سەندەرمەن شىڭعا تەڭدەسەم،
قيىندىقتارمەن بەلدەسەم...
بار ارمانىم – جالعاندا،
مۇڭدارىڭدى كورمەسەم...
جۇرەكتىڭ جاققان جالىنىن،
اسىل جاندارىم – دارىنىم...
كەمىتە كورمە جاراتقان،
جاقىندارىمنىڭ ءقادىرىن!
قاجىمۇقان عابدوللا
