ءال-فارابي اتىنداعى قازۇۋ ۇجىمى ق ر پرەزيدەنتى – ۇلت كوشباسشىسى ن.ءا. نازاربايەۆتىڭ «ۇلت جوسپارى – قازاقستاندىق ارمانعا باستايتىن جول» باعدارلامالىق ماقالاسىنىڭ نەگىزگى باعىتتارىن تالقىلادى، - دەپ حابارلايدى «قامشى» پورتالى.
ەلباسى العا قويعان تاپسىرمالاردى جۇزەگە اسىرۋ جولىنداعى ۋنيۆەرسيتەت مىندەتتەرى تۋرالى جيىندا قازۇۋ-دىڭ الەۋمەتتىك دامۋ جونىندەگى پرورەكتورى شولپان ەربول قىزى جامانبالايەۆا بايانداما جاسادى.
ەلباسى ماقالاسىندا ايتىلعان قازاقستاندى تەرەڭدەتە جاڭعىرتۋ ماقساتىندا اتقارىلعان اۋقىمدى ىستەرگە شولۋ جاساي وتىرىپ، شولپان ەربول قىزى بەس ينستيتۋتتىق رەفورمانىڭ قازىرگى جاھاندىق داعدارىس كەزەڭىندەگى كوكەيتەستىلىگىن اتاپ ءوتتى. 2016 جىلدىڭ 1 قاڭتارىنان باستاپ وسى بەس باعىتتاعى ۇلت جوسپارىن ورىنداۋدىڭ پراكتيكالىق كەزەڭى باستالدى. مەملەكەتتى، ەكونوميكا مەن قوعامدى دامىتۋ ءۇشىن قاعيداتتى جاڭا قۇقىقتىق ورتا قالىپتاستىراتىن 59 زاڭ كۇشىنە ەندى. «ۇلت جوسپارى – ەلىمىزدى داعدارىستان الىپ شىعاتىن دارا جول. ول قازاقستان حالقىن قيىندىقتان قۇتقارىپ قانا قويماي، الەمدىك باسەكەگە قابىلەتتى 30 ەلدىڭ قاتارىنا قوسىلۋعا مۇمكىندىك بەرەدى. سوندىقتان بۇل باعدارلامانى جەتە ءتۇسىنۋ ازدىق ەتەدى، ءارقايسىمىز ونىڭ جۇزەگە اسىرىلۋىنا بەلسەندى قاتىسۋىمىز كەرەك»، – دەدى پرورەكتور.
ءال-فارابي اتىنداعى قازۇۋ بۇگىنگى تاڭدا بەس رەفورما اياسىندا وزىندىك جول كارتاسىن جاسادى جانە وقىتۋشى-پروفەسسورلاردان قۇرالعان عىلىمي ورتا ولاردى جۇزەگە اسىرۋدىڭ وزەكتىلىگىن تەرەڭ ۇعىنادى.
ەلباسىنىڭ العاشقى رەفورماسى «مەملەكەتتىك قىزمەت تۋرالى» جاڭا زاڭ نەگىزىندە مەملەكەتتىك اپپاراتتىڭ تيىمدىلىگىن ارتتىرۋعا باعىتتالىپ وتىر. ەلباسى ماقالاسىندا قازاقستان بارلىق پوستكەڭەستىك ەلدەردىڭ ىشىندە العاش بولىپ مەملەكەتتىك قىزمەتشىلەردىڭ جاڭا كادرلىق كورپۋسىن بايقاۋ جانە مەريتوكراتيا قاعيداتتارى ارقىلى قالىپتاستىرۋعا كىرىسكەنى تۋرالى ايتىلدى. «قازىرگى تاڭدا مەملەكەتتىك قىزمەتتى دامىتۋدىڭ جاڭا كەزەڭىنە قاراي وتىرىپ، ءبىز اكىمشىلىك مەملەكەتتىك قىزمەتشىنىڭ مانسابى ونىڭ بىلىكتىلىگى جانە جيناقتاعان تاجىريبەسىنە، وعان ەڭبەكاقى تولەۋدىڭ جاڭا جۇيەسى ونىڭ بىلىكتىلىگى مەن اتقاراتىن جۇمىسىنىڭ سيپاتىنا، كولەمى مەن ناتيجەسىنە بايلانىستى ەكەنىن كورەمىز. سونداي-اق مەملەكەتتىك قىزمەتشىلەردىڭ جۇمىس پەن تۇرمىستاعى ءجۇرىس-تۇرىسىنىڭ قالىپتارى رەگلامەنتتەلگەن مەملەكەتتىك قىزمەتشىلەردىڭ جاڭا ەتيكالىق كودەكسى جاسالدى. جاڭا ينستيتۋت – ەتيكا بويىنشا ەلىمىزدە وكىلەتتى وكىلدەر ينستيتۋتىن قۇرۋ كوزدەلىپ وتىر»، – دەي كەلە شولپان ەربول قىزى اتالعان مەحانيزمدەردىڭ ۋنيۆەرسيتەتتەگى كورىنىستەرىنە توقتالدى. «ءال-فارابي اتىنداعى قازۇۋ بۇگىندە ناتيجەگە باعىتتالعان باسقارۋعا كوشكەن. ۋنيۆەرسيتەتتە ءاربىر وقىتۋشىنىڭ، ناتيجەسىندە جوو-نىڭ باسەكەگە قابىلەتتىلىگىن ارتتىرۋعا مۇمكىندىك بەرەتىن رەيتينگتىك جۇيە ەنگىزىلگەن. قازۇۋ-دىڭ سوڭعى جىلدارى ءبىلىم كەڭىستىگىندە ۇلكەن سەرپىلىس جاساپ، بيىل الەمنىڭ ۇزدىك 800 ۋنيۆەرسيتەتى اراسىندا 275-ورىنعا كوتەرىلۋى – سونىڭ ايقىن دالەلى. ۋنيۆەرسيتەتكە وقىتۋشىلاردى قابىلداۋ بايقاۋ نەگىزىندە جۇزەگە اسادى جانە ولار ەڭبەكتىك قاتىسۋ ۇلەسىنە قاراي ۇستەمەاقى الادى. ۋنيۆەرسيتەتتە 2011 جىلى ەتيكالىق تالاپتارعا نەگىزدەلگەن ءال-فارابي اتىنداعى قازۇۋ قىزمەتكەرلەرى مەن وقىتۋشىلارىنىڭ ۇجىمدىق مادەنيەت كودەكسى جانە ءال-فارابي اتىنداعى قازۇۋ ستۋدەنتىنىڭ ار-نامىس كودەكسى قابىلداندى. سونداي-اق ءبىز ءار فاكۋلتەتتە ەتيكا بويىنشا كوميسسيا قۇردىق، ولار بۇگىنگى تاڭدا تولىققاندى جۇمىس اتقارۋدا. ءبىز «ۋنيۆەرسيتەت جەمقورلىقتان تازا» جوباسىن جۇزەگە اسىرۋعا كىرىسىپ كەتتىك. ەلىن، جەرىن شىن سۇيەتىن، ءبىلىمدى دە بىلىكتى مامان دايارلاۋ ماقساتىندا كوپتەگەن الەۋمەتتىك جوبالار جۇمىس ىستەۋدە. ەندىگى ءبىزدىڭ ماقساتىمىز – وسى مەحانيزمدەردى جەتىلدىرۋ، جۇزەگە اسىرا بەرۋ، ولاردىڭ ءبىزدىڭ ومىرىمىزگە ەتەنە ەنۋىن قامتاماسىز ەتۋ»، – دەدى پرورەكتور.
تالقىلاۋ بارىسىندا ۇجىم مۇشەلەرى ەل مەن قوعامدى دامىتۋداعى ناقتى مىندەتتەردى كۇندەلىكتى ومىردە، ەكونوميكالىق قىزمەتتە نەمەسە قوعامدىق قاتىناستاردا قولدانۋدىڭ ماڭىزدىلىعىن ەرەكشە سەزىنەتىندىكتەرىن جەتكىزدى. بارشا قازۇۋ ۇجىمى باس باعدارلامانى ءبىراۋىزدان قولدايدى جانە ونى جۇزەگە اسىرۋدى پارىز سانايدى.
