جامبىل وبلىسىندا بولعان جانتۇرشىگەرلىك وقيعا تاعى دا كوپشىلىكتىڭ نازارىن اۋدارىپ، تالقىلاۋعا ءتۇستى. وبلىستىڭ تالاس اۋدانىندا ونىنشى سىنىپتىڭ وقۋشىسى كولىكتە بوسانىپ، نارەستەنى جول جيەگىنە لاقتىرىپ كەتكەن. اۋىر جاراقاتتان جاڭا تۋعان ءسابيدىڭ باس سۇيەگى جارىلىپ، بىردەن شەتىنەپ كەتكەن...
مىنە، بۇل بىرنەشە كۇننەن بەرى ەلىمىزدەگى تەلەارنالار جاڭالىقتارىنان تۇسپەي كەلە جاتقان باستى تاقىرىپ دەسەك بولادى. باستى تاقىرىپ دەمەي نە دەيمىز؟ كۇندە نە بولىپ، نە قويعانىن، كىمنىڭ جازالاناتىنىن، كىمنىڭ جۇمىستان كەتكەنىن بۇگە-شۇگەسىنە دەيىن اقتارىپ جاتىر ارنالار.
كۇن سايىن دابىرا قىلىپ، سەنساسيا جاساپ، بولعان وقيعانى قايتا-قايتا جاڭالىقتاردان كورسەتىپ، ەلگە جاريالاۋ قانشالىقتى قاجەت؟ ول قىزدىڭ كەلەشەك تاعدىرىنا ۇلكەن سوققى جاساپ جاتىرعاندارىن سول ارنالار تۇسىنسە عوي. نەگە ءبىزدىڭ تەلەارنالار سول جاعىنان ويلانىپ، سارالامايدى؟ ەگەر وسى وقيعانى بۇكىل ەلگە دابىرا قىلماي، قاجەتتى ورىندار عانا زاڭ جۇزىندە ءتيىستى شارالار قولدانسا دا جەتپەي مە؟ قاتەلىك كەتتى ونى مويىنداۋىمىز كەرەك. الايدا بۇعان بارشا قوعام كىنالى. «ادام بالاسىن زامان وسىرەدى، كىمدە-كىم جامان بولسا، ونىڭ زامانداسىنىڭ ءبارى ۆينوۆات» دەمەپ پە ەدى ۇلى اباي؟! ەندەشە، قارشاداي قىزدى قارالاي بەرگەنىمىز ءجون بە؟ ءوزى سورلاپ، قينالىپ جاتىرعان قىزدىڭ جاراسىنا تۇز سەۋىپ، ودان سايىن جاعدايدى ۋشىقتىرۋدىڭ قاجەتى قانشا؟! بۇل سەنساسيالاردىڭ ارتىندا ءبىر قىزدىڭ تاعدىرى، ءبىر اۋلەتتىڭ، ءتىپتى ۇلتتىڭ ءقادىرى جاتىر. قىزدارىمىزدى قارالاۋ ارقىلى ۇلتىمىزدى ماسقارالاپ وتىرعانىمىزدى نەگە تۇسىنبەيمىز؟
ودان دا وسىنداي جاعدايلار بولاشاقتا قايتالانباس ءۇشىن نە ىستەۋىمىز كەرەك؟ بالالار مەن جاسوسپىرىمدەر تاربيەسى نەگە كەمشىن؟ دەگەن سىندى سۇراقتارعا باس قاتىرىپ، نەگە سولاردى شەشۋ جولىن ىزدەمەيمىز؟ ايتپەسە ءار جاڭالىق سايىن سول وقيعانى قازبالاي بەرگەننەن نە ۇتامىز؟ سول تەلەارنالار ۇرپاققا شىنىمەن جاندارى اشىسا، ءۇندى سەريالدارى مەن ءار بەس مينۋت سايىن قايتالاناتىن جارنامالارىنىڭ ورنىنا جاستارعا تاربيە بەرەتىن، يماندىلىققا شاقىراتىن بەينەروليكتەر جۇرگىزىپ، عيبراتتى باعدارلامالار كورسەتسىن، جاستارىمىزدىڭ ۇلتتىق داستۇرىمىزگە ۇڭىلۋلەرىنە بارىنشا كۇش سالسىن. ب ا ق حالىقتىڭ كوزى، قۇلاعى بولسا، سىزدەردىڭ ۇرپاق تاربيەسىنە قوسار ۇلەستەرىڭىز ۇلكەن. الايدا، تەلەارنالار ۇرپاق تاربيەسىنەن گورى، سەنساسيا جاساپ، وزدەرىنە ۇپاي جيناۋدى كوبىرەك ويلايدى.
ۆەنەرا مۇرات قىزى،
استانا
