رەسەيلىك رەپ-انشى ءتيماتيدىڭ رەپەرتۋارىنداعى ايگىلى «لادا سەدان» ءانىن دومبىرا اۋەنىنە سالىپ ورىنداپ جۇرگەن «Made in kz» جوباسىنىڭ اۆتورى،  ديدجەي-دومبىراشى  باۋىرجان يتيكەيەۆ «El.kz» سايتىنا  توپتىڭ شىعارماشىلىعى تۋرالى ەگجەي-تەگجەيلى بايانداپ بەرگەن ەكەن. نازارلارىڭىزعا سول سۇحباتتى ۇسىنامىز. 

 – باۋىرجان، سوڭعى كەزدەرى الەۋمەتتىك جەلى قولدانۋشىلارىنىڭ اراسىندا توپتارىڭىزدىڭ ورىنداۋىنداعى اندەر كەڭ تارالىپ ۇلگەردى. كوپشىلىك سىزدەر تۋرالى بىلگىسى كەلەدى. الدىمەن، «Made in kz» جوباسىنىڭ قالاي دۇنيەگە كەلگەنىن ايتىپ بەرسەڭىز.

– توبىمىز وتكەن جىلدىڭ تامىز ايىندا قۇرىلدى. ءوزىم ديدجەي بولا ءجۇرىپ، دومبىراشىلارعا زاماناۋي اۋەندەردى تارتقىزعاندى ۇناتاتىنمىن. ءبىر كۇنى «نەگە وسى دومبىرانى وزىمە ۇيرەنىپ الماسقا؟» دەگەن وي كەلدى. ءوزىم كەزىندە دومبىرا مەكتەبىنە ءتۇسىپ تۇرىپ، وقۋدى ورتا جولدان تاستاپ كەتكەن اداممىن. سول كەزدە بالالىق جاساعانىمدى ەسەيە كەلە ءتۇسىندىم. ءبىر جارىم جىل ۋاقىتىمدى دومبىرا كۋرستارىنا جۇمساپ، بىرتىندەپ ديدجەي-دومبىراشى رەتىندە تانىلا باستادىم. ءبىرشاما ۋاقىتتان سوڭ، وسى جوبانى ارى قاراي دامىتپاق نيەتپەن ماقسات حاسانوۆ دوسىم ەكەۋمىز بىرىگىپ ونەر كورسەتە باستادىق. ماعان دومبىرا تارتۋدى ۇيرەتكەن – وسى ماقسات. اۋەندەرىمىزدى ەرنار سماعۇلوۆ ەسىمدى جىگىت وڭدەيدى. قاتارىمىزعا ءانشى قىز قوسىلسا، توبىمىز ودان سايىن قۇلپىرا تۇسەتىنىن تۇيسىنگەن ساتتە بىردەن كاستينگ ۇيىمداستىرا قويدىق. قالىڭ قىزدىڭ ىشىنەن كوڭىلىمىزگە جاققانى ادجەرا لەسبەكوۆا بولدى.

– ۇشەۋىڭىزدىڭ دە مۋزىكالىق بىلىمدەرىڭىز بار شىعار؟

– جوق، ارامىزدا ماقساتتىڭ عانا كاسىبي ءبىلىمى بار. ول – قۇرمانعازى  اتىنداعى قازاق ۇلتتىق كونسەرۆاتورياسىنىڭ تۇلەگى، «الداسپان» ەتنو-روك توبىنىڭ مۇشەسى. بۇگىندە «جۇلدىز FM» راديوسىندا مۋزىكالىق رەداكتور بولىپ جۇمىس جاسايدى. ال، ادجەرا الماتىداعى ابىلايحان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتىندە ءبىلىم الادى. ال، مەن ماماندىعىم بويىنشا تاۋ-كەن ينجەنەرىمىن. كەزىندە كەن وندىرىسىندە جۇمىس ىستەگەنمىن. ءبىراق، كەيىن ونەر جولىن تاڭدادىم.

– ءسىز دە راديودا قىزمەت ەتەدى دەپ ەستىگەن ەدىم.

– ءيا، مەن ءقازىر «رەكورد» راديوسىنىڭ راديوجۇرگىزۋشىسى جانە ديدجەي قىزمەتىن قاتار اتقارامىن.

– جوبانى باستاۋىڭىزعا نە تۇرتكى بولدى؟

– ءقازىر وزگە ۇلت وكىلدەرى قازاقتىڭ دومبىراسىن قۇشاقتاپ، جيىن-تويلارعا ءجيى باراتىن بولدى. ولاردىڭ قازاق ءتىلىن بۇرمالاپ ءان سالىپ، كۇيدى دۇرىس تارتپاۋى مەنىڭ نامىسىما تيەدى. سونىڭ وزىندە حالىق ولاردىڭ ونەرىن «ەكزوتيكا» كورەدى. مەن جاستارعا قازاقتىڭ قارا دومبىراسىنىڭ كەز كەلگەن شەتەلدىك مۋزىكانى ويناۋعا قاۋقارى جەتەتىنىن كورسەتكىم كەلدى. ال، ولاردىڭ كوپشىلىگى دومبىرا دەسە، تەك ءداستۇرلى انشىلەر جانە ايتىسكەرلەردى ەلەستەتەتىنى وتىرىك ەمەس. جاستار جاڭا فورماتتاعى كرەاتيۆتى دۇنيەلەردى تەز قابىلدايدى. تەك ولارعا سونى ءوز تىلىندە جەتكىزە بىلسەك بولعانى. بۇل باعىتتا بىزگە اسىلبەك ەڭسەپوۆتىڭ ورىنداۋىنداعى كۇيلەر ۇلگى بولىپ ءجۇر.

– دەمەك، «Made in kz» جوباسىنىڭ ءستيلى «دەككو» جانرىنا ۇقسايدى.

– ءيا، نەگىزى سول ستيلگە كەلەدى. مارقۇم دومبىراشى، سازگەر جاسارال ەڭسەپوۆ اعامىز دومبىراعا ميكروفون سالىپ، وعان ارانجيروۆكا جاساپ، وسى جانردىڭ نەگىزىن قالاپ كەتتى. ءوزىمدى بۇل ءىستىڭ جالعاستىرۋشىسىمىن دەمەيمىن، تەك ديدجەي رەتىندە وزىندىك شەشىمىمدى قوستىم. مىسالى، «لادا سەدان» دومبىرادا وتە ءساتتى ورىندالادى» دەپ كىم ويلاعان؟ مۋزىكادا جەتى-اق نوتا بار بولسا، ونىڭ جەتەۋى دە دومبىرانىڭ پەرنەسىنە قونعان. ەندەشە، نەگە بىزگە ۇلتتىق اسپابىمىزدىڭ كەرەمەت مۇمكىندىگىن بۇكىل الەمگە كورسەتپەسكە؟!

– سوندا ءسىز كلۋبتا دا دومبىرانىڭ اۋەنىن قويىپ ءجۇرسىز بە؟

– ءيا، كلۋبتا حالىق ءانى «قاماجاي»، تولەگەن مۇحامەدجانوۆتىڭ «دەتستۆو» كۇيى، «تۇركىمەن ءبيى» شىعارماسى جانە ت.ب. اۋەندەرگە جاساعان رەميكستەرىمدى قوسامىن. كەلگەن قوناقتار سول اۋەندەردى تىڭدايدى، بيلەيدى. ولار ءۇشىن بۇل ەرەكشە دۇنيە ەكەندىگىن تاڭىرقاعان جۇزدەرىنەن بايقايمىن.

– مەنىڭ بىلۋىمشە، سىزدەر ەڭ العاش رەسەيلىك رەپ-انشى ءتيماتيدىڭ رەپەرتۋارىنداعى «لادا سەداننىڭ» كاۆەر نۇسقاسىمەن تانىلدىڭىزدار. سولاي ما؟

– ءدال سولاي. نەگىزى ونىڭ الدىندا ستينگتىڭ «Shape of my heart» ءانىن جانە تاعى ءبىراز داڭقتى دجاز شىعارمالاردى ورىنداعان بولاتىنبىز. ءبىراق، حالىقتىڭ نازارى ساپالى جۇمىستارىمىزعا ەمەس، «لادا سەدانعا» ءتۇستى. ءوزىڭىز دە تۇسىنەسىز، تىڭدارمان ەڭ الدىمەن، قابىلداۋعا جەڭىل، تانىمال دۇنيەگە ۇمتىلادى. «لادا سەداندى» جارىققا شىعارۋدى ماقسات تۇتپاعان دا ەدىك. ستۋدياداعى كەزەكتى دايىندىقتا «ينستاگرامعا» سالۋ ءۇشىن اۋەسقوي ۆيدەوعا تۇسىرە سالعان بولاتىنبىز. سونداعى ۆيدەومىزدىڭ ويلاماعان جەردەن جۇلدىزى جاندى.

– قازىرگە دەيىن ەڭ كوپ تىڭدالعان اۋەندەرىڭىز قايسى؟

– ءدال ءقازىر Kygo ەسىمدى نورۆەگيالىق ديدجەيدىڭ «Stole the show» اتتى انىنە جاساعان كاۆەرىمىز «فەيسبۋك» الەۋمەتتىك جەلىسىندە قىزۋ تالقىلانىپ جاتىر.

– مەنى قىزىقتىرعان تاعى ءبىر سۇراق: ادجەرانىڭ شىن ەسىمى كىم؟

– ادجەرانىڭ شىن اتى – ايگەرىم. ءبىراق، نەگە ەكەنىن بىلمەيمىن، اناسى ونى ادجەرا دەپ اتاپ كەتكەن ەكەن. 

– العاشقى بەينەباياندارىڭىز قاشان جارىققا شىعادى؟  

–مەنىڭ youtube-ارنامداعى ۆيدەولاردى بەينەبايان دەپ اتاۋعا كەلمەيدى. ولاردى حالىققا ءوزىمىزدىڭ باعىتىمىز قانداي ەكەنىن ءتۇسىندىرۋ ءۇشىن تۇسىرەمىز. ال، العاشقى بەينەبايانىمىز جاقىن ارادا تىڭدارمان قاۋىمعا جول تارتادى. بۇل ءبىزدىڭ كلۋبتىق بي باعىتىندا جازىلعان اۆتورلىق جۇمىسىمىز بولعالى تۇر.

– ودان وزگە قانداي جوسپارلارىڭىز بار؟ ءبىر ساتتە جارق ەتىپ، ارتىنشا جوق بولىپ كەتپەيسىزدەر مە؟

– جوق، جۇمىسىمىزدى وسى قارقىنمەن جالعاستىرا بەرەمىز. جاقىندا بىزگە لاتۆيادان شاقىرتۋ كەلدى. بۇيىرسا، ەۋروپانىڭ 4 ەلىندە وتەتىن شىعارماشىلىق سامميتتە ونەر كورسەتەمىز. شاقىرۋشى تاراپ ءبىزدى شەتەلدىكتەرگە «ۇلتتىق اسپاپپەن زاماناۋي اۋەندەردى ورىندايتىن ەرەكشە توپ» دەپ تانىستىرماقشى. مۇنى توبىمىزدىڭ العاشقى جەڭىستەرىنىڭ ءبىرى دەپ بىلەمىن.

سونداي-اق، ءقازىر قازاق جانە ورىس تىلدەرىندە اۆتورلىق اندەرىمىزدى كوبەيتىپ جاتىرمىز. بۇدان بىلاي «ينتەرنەت-جوبا» عانا ەمەس، كادىمگى توپ رەتىندە تانىلۋدى كوزدەيمىز. ءبىراق، مۇنى «جۇلدىز بولۋعا ۇمتىلۋ» دەپ ءتۇسىنىپ قالماڭىزدار! باستى ماقسات – قازاقتىڭ قارا دومبىراسىن جۇرتشىلىققا تاعى ءبىر قىرىنان تانىستىرۋ.

– عالامتورداعى تانىمالدىلىق سىزدەرگە كوممەرسيالىق جاعىنان دا تابىس اكەلگەن بولار؟

– جاسىراتىنى جوق، وسى جوبا ارقىلى ءبىزدى تانيتىن جانداردىڭ قاتارى كوبەيدى، تابىسىمىز دا جوعارىلادى. اياق استىنان بولعان مۇنداي وڭ وزگەرىس داعدارىس ۋاقىتىندا ادامعا وزگەشە سەرپىن بەرەدى ەكەن (كۇلدى).

توبىمىزدىڭ از ۋاقىت ىشىندە تانىلۋىنا سەبەپشى بولعان سۇيىكتى تىڭدارماندارىمىزعا تاماشا توسىنسىيلار دايىنداپ وتىرمىز.  دومبىرانى بۇرىن-سوڭدى ەشكىم كورىپ-بىلمەگەن جاڭا قىرىنان تانىتپاق نيەتىمىز بار. قىسقاسى، جاڭالىق كۇتىڭىزدەر!

– ساتتىلىك تىلەيمىز! اڭگىمەڭىزگە راحمەت!

اڭگىمەلەسكەن: روزا ارەن