Qara shaldan bata alyp, qarasha úıden attanǵan, 
Qudaıynyń aldynda shahıt keship, maqtalǵan, 
Tolqyny asaý teńizdeı tula boıda tasyp qan, 
Arystandaı aqyryp, ata jaýyn shoshytqan, 
Abylaıdyń urpaǵy, 
Sultandardyń sultany -
Ázireıil kózimen suńqardaıyn suqtanyp,
Shiderisi sheshilgen tulpardaıyn tepsinip, 
Azattyqqa asyqqan, 
Eı, meniń eren týǵan, erlik qylǵan 
Han Kenem!..

Sózderine túkirip bodan qylmaq ulyqtyń, 
Bir baıraqtyń astyna batyrlardy jıyp myń,
Damyl tappaı urysty dalıǵan bul dalada, 
Uıqy kórmeı al úıde, 
shyryldady sharana...

Kekilik Seńgir deıtuǵyn qyrǵyzdardyń jerinde, 
Qyrǵyz-qazaq soǵysty Maıtóbeniń belinde.
Áskeri kóp qyrǵyzdar qorshaýǵa aldy qazaqty, 
Jalǵyz qalǵan Han Kene, 
Ólim kútti azapty...
Eki rákát namazyn oqyp alyp batyrym, 
O dúnıe esigin ashyp jatty aqyryn. 
Abdyrady sonda jurt, jeńildik pe, jeńdik pe? 
Basyn shaıqap, tańyrqap ólim jeńgen órlikke. 
Tilip, 
Kesip, 
Azaptap, 
Salsań da daǵy jábirge, 
Iilmeıdi eshqashan - ıilgen bas Táńirge!..

Eki rákát bul namaz - Han Keneden qalǵan baq, 
Eki rákát namazben - eki ǵumyr jalǵanbaq.
Han Kenem-aı!..
Sen qusap, 
Dinim úshin bulqynyp, 
Jurtym úshin julqynyp, 
Shahıttiktiń shárbatyn 
Ketem keıde
Armandap...

Birjan Ahmer